ഹ്യുണ്ടായിയുടെ പുതിയ മിഡ്സൈസ് എസ്യുവി ഇന്ത്യൻ നിരത്തുകളിൽ പരീക്ഷണയോട്ടം തുടരുന്നു. 2026 ദീപാവലിയോടെ വിപണിയിലെത്തുമെന്ന് പ്രതീക്ഷിക്കുന്ന ഈ മോഡൽ, 1.5 ലിറ്റർ പെട്രോൾ, സിഎൻജി എഞ്ചിൻ ഓപ്ഷനുകളിലും എഡിഎഎസ് പോലുള്ള നൂതന ഫീച്ചറുകളോടും കൂടിയാകും എത്തുക.
മിഡ്സൈസ് എസ്യുവി വിഭാഗത്തിലേക്ക് പുതിയ മോഡലുമായി ഹ്യുണ്ടായി എത്തുന്നു. വരാനിരിക്കുന്ന പുതിയ എസ്യുവിയുടെ പരീക്ഷണ വാഹനത്തെ വീണ്ടും ഇന്ത്യൻ നിരത്തുകളിൽ കണ്ടെത്തി. ദീപാവലി 2026നോട് അനുബന്ധിച്ച് വാഹനം വിപണിയിലെത്തുമെന്നാണ് പ്രതീക്ഷിക്കുന്നത്. ലോഞ്ചിന് മുന്നോടിയായി വിപുലമായ പരീക്ഷണങ്ങളാണ് കമ്പനി നടത്തുന്നത്. ഏറ്റവും പുതിയ പരീക്ഷണ വാഹനത്തിന്റെ പ്രത്യേകത അതിലെ കാമഫ്ലാഷാണ്. ‘ബ്രിങ് ഇറ്റ് ഓൺ’ എന്ന സന്ദേശത്തിനൊപ്പം കമ്പാനിയൻ, എക്സ്പ്രഷൻ, ട്രാൻസ്ഫോം, ഇൻസ്പിരേഷൻ, ഇന്നൊവേഷൻ, ആംബിഷൻ, റിഫ്ലെക്ഷൻ തുടങ്ങിയ വാക്കുകളും വാഹനത്തിൽ പതിച്ചിട്ടുണ്ട്.
ഹ്യുണ്ടായി ബയോണിനെ അടിസ്ഥാനമാക്കിയുള്ള മോഡൽ?
പുതിയ ഹ്യുണ്ടായി എസ്യുവി ആഗോള വിപണിയിൽ വിൽക്കുന്ന ഹ്യുണ്ടായി ബയോൺ കോംപാക്ട് ക്രോസ്ഓവറിനെ അടിസ്ഥാനമാക്കിയുള്ളതായിരിക്കുമെന്നാണ് റിപ്പോർട്ടുകൾ. ഇന്ത്യയിൽ അവതരിപ്പിക്കുമ്പോഴും ബയോൺ എന്ന പേര് തന്നെ നിലനിർത്താൻ സാധ്യതയുണ്ട്. പരീക്ഷണ വാഹനത്തിൽ കാമഫ്ലാഷ് നൽകിയതിനാൽ ഡിസൈനിന്റെ ഭൂരിഭാഗം വിശദാംശങ്ങളും വ്യക്തമല്ല. എന്നാൽ വാഹനത്തിന്റെ ഉയർന്നുനിൽക്കുന്ന രൂപകൽപ്പന, വലിപ്പമേറിയ വീൽ ആർച്ചുകൾ, ഫ്ലാറ്റ് റൂഫ്, പുൾ-ടൈപ്പ് ഡോർ ഹാൻഡിലുകൾ എന്നിവ വ്യക്തമായി കാണാം. വീൽ ആർച്ചുകളിൽ കട്ടിയുള്ള ക്ലാഡിങ്, അലോയ് വീലുകൾ, നേരായ രീതിയിലുള്ള പിൻ വിൻഡ്ഷീൽഡ് എന്നിവയും വാഹനത്തിലുണ്ട്. പിൻഭാഗത്ത് തിരശ്ചീനമായി നീളുന്ന ലൈറ്റിങ് ഘടകമുള്ള ടെയിൽഗേറ്റും പുതിയ എസ്യുവിയിൽ കാണാം.
വലിയ സ്ക്രീനും എഡിഎഎസും
ഇന്റീരിയറിന്റെ പൂർണ വിവരങ്ങൾ പുറത്തുവന്നിട്ടില്ലെങ്കിലും വലിയ ടച്ച്സ്ക്രീൻ ഇൻഫോടെയ്ൻമെന്റ് സംവിധാനം, ഡിജിറ്റൽ ഡ്രൈവർ ഡിസ്പ്ലേ എന്നിവ പ്രതീക്ഷിക്കാം. ഹ്യുണ്ടായിയുടെ നാല് ഡോട്ട് അടയാളമുള്ള സ്റ്റിയറിങ് വീലും വാഹനത്തിലുണ്ടാകും. ലെതറെറ്റ് സീറ്റുകൾ, മുന്നിലും പിന്നിലും പാർക്കിങ് സെൻസറുകൾ, വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, റിയർ പാർക്കിങ് ക്യാമറ എന്നിവയും വാഹനത്തിൽ ലഭിച്ചേക്കും. സൺറൂഫ്, 360 ഡിഗ്രി ക്യാമറ, ഒന്നിലധികം എയർബാഗുകൾ, എഡിഎഎസ് എന്നിവയും പ്രധാന സവിശേഷതകളായേക്കും.
Related Articles
പെട്രോൾ, സിഎൻജി ഓപ്ഷനുകൾ
പുതിയ ഹ്യുണ്ടായി എസ്യുവിയിൽ 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എൻജിൻ നൽകാൻ സാധ്യതയുണ്ട്. ക്രെറ്റയിൽ ഉപയോഗിക്കുന്ന എൻജിൻ തന്നെയായിരിക്കും പുതിയ മോഡലിലും എത്തുകയെന്നാണ് സൂചന. സിഎൻജി പതിപ്പും ഉപഭോക്താക്കൾക്ക് ലഭിച്ചേക്കും. വാഹനത്തിന്റെ അടിഭാഗത്ത് സിഎൻജി ടാങ്ക് സ്ഥാപിക്കുന്ന രീതിയായിരിക്കും ഉപയോഗിക്കുക. ഇതുവഴി ബൂട്ട് സ്പേസ് പരമാവധി പ്രയോജനപ്പെടുത്താൻ സാധിക്കും. മാനുവൽ, ഓട്ടോമാറ്റിക് ഗിയർബോക്സ് ഓപ്ഷനുകളും പ്രതീക്ഷിക്കാം.
2027 മാർച്ചോടെ പുതിയ ഹ്യുണ്ടായി ഇലക്ട്രിക് എസ്യുവി
ബയോൺ അടിസ്ഥാനമാക്കിയുള്ള പുതിയ എസ്യുവിക്ക് പിന്നാലെ മറ്റൊരു കോംപാക്ട് ഇലക്ട്രിക് എസ്യുവിയുമായും ഹ്യുണ്ടായി എത്തും. ഇ-ജിഎംപി (കെ) പ്ലാറ്റ്ഫോമിനെ അടിസ്ഥാനമാക്കിയുള്ള ഈ ഇലക്ട്രിക് മോഡൽ 2027 മാർച്ചോടെ വിപണിയിലെത്തുമെന്ന് ഹ്യുണ്ടായി സ്ഥിരീകരിച്ചിട്ടുണ്ട്. തമിഴ്നാട്ടിലെ ഹ്യുണ്ടായിയുടെ നിർമാണശാലയായിരിക്കും പുതിയ പ്രാദേശികമായി വികസിപ്പിക്കുന്ന ഇലക്ട്രിക് എസ്യുവിയുടെ പ്രധാന ഉൽപ്പാദന കേന്ദ്രം. ടാറ്റ നെക്സോൺ ഇവി, മഹീന്ദ്ര എക്സ്യുവി 3എക്സ്ഒ ഇവി തുടങ്ങിയ മോഡലുകളുമായാണ് പുതിയ ഹ്യുണ്ടായി ഇലക്ട്രിക് എസ്യുവി മത്സരിക്കുക.
