കൊച്ചി: രാജ്യത്ത് ആഢംബര കാറുകൾക്കും എസ്യുവികൾക്കും വില കൂടും. ചരക്ക് സേവന നികുതി സെസ് ഉയർത്താൻ തീരുമാനിച്ചതാണ് വില കൂടാൻ കാരണം. ഇതോടെ ആഢംബര വാഹനങ്ങളുടെ നികുതി 53 ശതമാനമാകും.
സ്പോർട്സ് യൂട്ടിലിറ്റി വെഹിക്കിളോ വലിയ സെഡാനോ വാങ്ങാൻ പദ്ധതിയുണ്ടെങ്കിൽ ഇനി 10 ശതമാനം നികുതി അധികം നൽകണം. ആഡംബര കാറുകൾക്കും എസ്യുവികൾക്കും ചരക്ക് സേവന നികുതി സെസ് ഉയർത്താൻ കേന്ദ്രധനമന്ത്രി അരുൺ ജെയ്റ്റിലിയുടെ അധ്യക്ഷതയിൽ ചേർന്ന ജിഎസ്ടി കൗൺസിൽ തീരുമാനിച്ചു. നിലവില് 28 ശതമാനം ജിഎസ്ടിയും 15 ശതമാനം സെസും ഉള്പ്പെടെ 43 ശതമാനമാണ് ഈ ശ്രേണിയില്പ്പെട്ട വാഹനങ്ങള്ക്ക് നൽകേണ്ട നികുതി. സെസ് 25 ശതമാനമാക്കി വർദ്ധിപ്പിക്കുന്നതോടെ നികുതി 53 ശതമാനമാകും. നാല് മീറ്ററിലധികം നീളവും 1,500 സിസിയിൽ അധികം എഞ്ചിൻ കരുത്തുള്ള വാഹനങ്ങൾക്കുമാണ് 53 ശതമാനം നികുതി ഈടാക്കുക. 1200 സിസിയുള്ള വാഹനത്തിന് 28 ശതമാനം ജിഎസ്ടിയ്ക്ക് പുറമേ ഒരു ശതമാനം സെസും 1500 സിസി വരെയുള്ള വാഹനത്തിന് 3 ശതമാനം അധിക സെസും എന്ന നില തുടരും.
ചരക്ക് സേവന നികുതി നടപ്പാക്കിയപ്പോൾ മധ്യനിര വാഹനങ്ങൾക്കും ആഡംബര വാഹനങ്ങൾക്കും ഒരേ നികുതി ഏർപ്പെടുത്തിയത് വിമർശനത്തിന് വഴി വച്ചിരുന്നു. ഇത് മറികടക്കുന്നതിനാണ് ആഡംബര കാറുകൾക്കും എസ്യുവികൾക്കും നികുതി കൂട്ടുന്നത്. കൂടുതല് അന്തരീക്ഷ മലിനീകരണം സൃഷ്ടിക്കുന്ന കാറുകള്ക്കും ഹൈബ്രിഡ് കാറുകള്ക്കും ഒരേ നികുതിയാണെന്ന ആരോപണം ചെറുക്കാനും നികുതി ഉയര്ത്തുന്നതോടെ കേന്ദ്രത്തിനാവും. നികുതി കൂട്ടാനുള്ള നിർദ്ദേശം ജിഎസ്ടി കൗൺസിൽ അംഗീകരിച്ചെങ്കിലും നിയമം പ്രാബല്യത്തിലാകുന്ന മുറയ്ക്കേ കാർ വില കൂടുകയുള്ളൂ.
