വിപണിയില്‍ തരംഗമാകാന്‍ മഹീന്ദ്ര എക്സ്‌യുവി 700 വരുന്നൂ
ടൊയോട്ട ഫോർച്യൂണർ, ഫോഡ് എൻഡവർ തുടങ്ങിയ എസ്‍യുവികള്‍ക്കു കനത്ത വെല്ലുവിളിയുമായി രാജ്യത്തെ പ്രമുഖ വാഹന നിര്‍മ്മാതാക്കളായ മഹീന്ദ്ര ആന്‍റ് മഹീന്ദ്രയുടെ എക്സ്‌യുവി 700 വിപണിയിലെത്താന്‍ തയ്യാറെടുക്കുന്നു. വാഹനം അടുത്ത ദീപാവലിക്ക് വിപണിയിലെത്തുമെന്നാണ് പുതിയ റിപ്പോര്‍ട്ടുകല്‍. മഹീന്ദ്രയുടെ കൊറിയൻ പങ്കാളികളായ സാങ്‌യോങ്ങിന്റെ പ്രീമിയം എസ്‌യുവി റെക്സ്റ്റണിനെയായിരിക്കും മഹീന്ദ്ര എക്സ്‌യുവി 700 എന്ന പേരിൽ ഇന്ത്യയിൽ പുറത്തിറക്കുക. ഫെബ്രുവരിയില്‍ ദില്ലിയില്‍ നടക്കുന്ന രാജ്യാന്തര വാഹന മേളയിൽ പ്രദർശിപ്പിക്കുന്ന വാഹനത്തെ ഒക്ടോബറിൽ വിപണിയിലെത്തിക്കും എന്നാണ് വിവരങ്ങള്‍. എന്നാല്‍ കമ്പനി ഇക്കാര്യം ഔദ്യോഗികമായി സ്ഥിരീകരിച്ചിട്ടില്ല.
2016ലെ പാരിസ് ഓട്ടോഷോയിൽ പ്രദർശിപ്പിച്ച എൽഐവി-2 കൺസെപ്റ്റിൽ നിന്നും വികസിപ്പിച്ചിരിക്കുന്ന വാഹനം 2017ലാണ് യുകെ വിപണിയിലെത്തിയത്. വൈ 400 എന്ന കോഡ് നാമത്തിലാണ് ഇന്ത്യയിലെത്തുന്ന വാഹനത്തിന്‍റെ കോഡ് നാമം.
പ്രീമിയം എസ് യു വി സെഗ്മെന്റിലെ ബെസ്റ്റ് ഇൻ ക്ലാസ് ഫീച്ചറുകളുമായിട്ടാകും എക്സ്‌യുവി 700 എത്തുക. ഡ്യുവൽ ടോണ്‍ കളർ തീമിലുള്ള ക്യാമ്പിൻ, ടച്ച് സ്ക്രീൻ ഇൻഫർടെൻമെന്റ് സിസ്റ്റം എന്നിവ പുതിയ വാഹനത്തിന്‍റെ പ്രത്യേകതകളാണ്. 2.2 ലീറ്റർ ടർബൊ ഡീസൽ എൻജിൻ 4000 ആർപിഎമ്മിൽ 181 ബിഎച്ചിപി കരുത്തും 1400 മുതൽ 2800 വരെ ആർപിഎമ്മിൽ 400 എൻഎം ടോർക്കും ഉത്പാദിപ്പിക്കും. മാന്വല്‍, ഓട്ടോമാറ്റിക് വകഭേദങ്ങളും ഒപ്പം 5 സീറ്റർ ഏഴ് സീറ്റർ വകഭേദങ്ങവും ലഭ്യമാണ്. 4.85 മീറ്റർ നീളവും 1.96 മീറ്റർ വീതിയും 1.8 മീറ്റർ ഉയരവുമുള്ള വാഹനത്തിന്‍റെ വീല്‍ ബേയ്‍സ് 2865 എംഎമ്മാണ്. മണിക്കൂറിൽ 185 കിലോമീറ്ററാണ് ഉയർന്ന വേഗം.
മോഹിപ്പിക്കുന്ന വിലയാണ് വാഹനത്തിന്‍റെ മറ്റൊരു വലിയൊരു പ്രത്യേകത. ഫോർച്യൂണറിനെക്കാള്‍ നാലു മുതൽ അഞ്ചു ലക്ഷം രൂപവരെ വിലക്കുറവായിരിക്കും എക്സ്‌യുവി 700 എന്നാണ് റിപ്പോര്‍ട്ടുകള്‍.
