പുതിയ അത്യാഡംബര കാര് സ്വന്തമാക്കി തെലുങ്ക് നടിയും അവതാരകയും നിര്മാതാവുമായ ലക്ഷ്മി മഞ്ചു. ബ്രിട്ടീഷ് ആഡംബര വാഹന നിര്മാതാക്കളായ ആസ്റ്റണ് മാര്ട്ടിന് DB 11 മോഡലാണ് മഞ്ചു സ്വന്തമാക്കിയത്. പുതിയ വാഹനത്തിനൊപ്പമുള്ള ചിത്രങ്ങള് ട്വിറ്റ് ചെയ്താണ് ആസ്റ്റണ് മാര്ട്ടിന് സ്വന്തമാക്കിയ വിവരം താരം ആരാധകരെ അറിയിച്ചത്. പൂര്ണമായും നിര്മിച്ച് ഇറക്കുമതി ചെയ്യുന്ന ആസ്റ്റണ് മാര്ട്ടന് DB 11-ന് 4.27 കോടി രൂപയാണ് ഇന്ത്യയിലെ വിപണി വില.
DB 9 പ്ലാറ്റ്ഫോമിന്റെ അടിസ്ഥാനത്തില് കരുത്ത് അല്പം കൂട്ടി ഈ വര്ഷം തുടക്കത്തിലാണ് പുതിയ DB 11 ഇന്ത്യയിലെത്തിയത്. 5.2 ലിറ്റര് ടര്ബോചാര്ജ്ഡ് V12 എന്ജിനാണ് വാഹനത്തിനു കരുത്തുപകരുന്നത്. 600 ബിഎച്ച്പി പവറും 700 എന്എം ടോര്ക്കും ഈ എന്ജിന് സൃഷ്ടിക്കും. മണിക്കൂറില് 322 കിലോമീറ്ററാണ് വാഹനത്തിന്റെ പരമാവധി വേഗം. പൂജ്യത്തില് നിന്ന് നൂറ് കിലോമീറ്റര് വേഗം കൈവരിക്കാന് കേവലം 3.9 സെക്കന്ഡ് മാത്രം മതി.
