1,890 സിസി എഞ്ചിൻ, 412 കിലോ ഭാരം! ഇതാ 72 ലക്ഷം രൂപ വിലയുള്ള ഒരു 'ഇന്ത്യൻ' ബൈക്ക്

അമേരിക്കൻ ഇരുചക്ര വാഹന നിർമാതാക്കളായ ഇന്ത്യൻ മോട്ടോർസൈക്കിൾ തങ്ങളുടെ പുതിയ ബൈക്ക് റോഡ്‍മാസ്റ്റർ എലൈറ്റ് ഇന്ത്യൻ വിപണിയിൽ അവതരിപ്പിച്ചു. 71.82 ലക്ഷം രൂപ എക്സ്-ഷോറൂം വിലയിലാണ് റോഡ്‍മാസ്റ്റർ എലൈറ്റിനെ അവതരിപ്പിച്ചത്. ഇതിൻ്റെ ഓൺറോഡ് വില 72 ലക്ഷം രൂപയിൽ കൂടുതലായിരിക്കും. ഇത് ഇന്ത്യൻ വിപണിയിൽ വിൽപ്പനയ്‌ക്കെത്തുന്ന ഏറ്റവും വില കൂടിയ മോട്ടോർസൈക്കിളുകളിലൊന്നായി മാറുന്നു. ഇതൊരു ലിമിറ്റഡ് എഡിഷൻ മോഡലാണ്. ഇതിൽ 350 യൂണിറ്റുകൾ മാത്രമേ ലോകമെമ്പാടും വിൽക്കുകയുള്ളൂ. പ്രത്യേക പെയിൻ്റ് സ്‍കീമോടുകൂടിയാണ് കമ്പനി റോഡ്മാസ്റ്ററിനെ അവതരിപ്പിച്ചിരിക്കുന്നത്. ഇന്ത്യൻ സ്‌കൗട്ട്, ചീഫ്‌ടൈൻ, സ്‌പ്രിംഗ്‌ഫീൽഡ്, ചീഫ് തുടങ്ങിയവ ഇന്ത്യൻ പോർട്ട്‌ഫോളിയോയിലെ മറ്റ് ചില മോഡലുകളിൽ ഉൾപ്പെടുന്നു.  

റോഡ്‌മാസ്റ്റർ എലൈറ്റിന് ചുവപ്പിൻ്റെയും കറുപ്പിൻ്റെയും ഷേഡുകൾ സംയോജിപ്പിച്ച് സ്വർണ്ണ ആക്‌സൻ്റുകൾ ഉൾക്കൊള്ളുന്ന ഒരു പ്രത്യേക പെയിൻ്റ് സ്കീം ലഭിക്കുന്നു. ഗ്ലോസ് ബ്ലാക്ക് ഡാഷ്‌ബോർഡ്, ബ്ലാക്ക്ഡ്-ഔട്ട് വിൻഡ്‌സ്‌ക്രീൻ, ഹാൻഡ് പെയിൻ്റ് ചെയ്ത ഗോൾഡൻ സ്ട്രിപ്പുകൾ എന്നിവ കൊണ്ട് അലങ്കരിച്ച ഈ ബൈക്ക് ചുവപ്പും കറുപ്പും നിറങ്ങളുടെ സംയോജനത്തിലാണ് അവതരിപ്പിച്ചിരിക്കുന്നത്. ഒരു മുഴുനീള ടൂറിംഗ് മോട്ടോർസൈക്കിൾ ആയതിനാൽ, റോഡ്‍മാസ്റ്റർ എലൈറ്റ് വളരെ വലുതാണ്. 

മോട്ടോർസൈക്കിളിന് എക്‌സ്‌ക്ലൂസീവ് 'എലൈറ്റ്' ബാഡ്‌ജിംഗും ലഭിക്കുന്നു. കസ്റ്റം പെയിൻ്റ് ഷോപ്പുകളായ ജിസിപിയും സിവിപിയും കൈകൊണ്ട് വരച്ചതാണ് മോട്ടോർസൈക്കിളിലെ സ്വർണ്ണ പിൻ വരകൾ. മോട്ടോർസൈക്കിളിലെ മറ്റ് വിശദാംശങ്ങളിൽ ഗ്ലോസ് ബ്ലാക്ക് ഡാഷ്, ഹീറ്റിംഗ്, കൂളിംഗ് ഫംഗ്‌ഷനുകളുള്ള നിറവുമായി പൊരുത്തപ്പെടുന്ന സീറ്റുകൾ, പാസഞ്ചർ ആംറെസ്റ്റുകൾ, ബാക്ക്‌ലിറ്റ് സ്വിച്ച് ക്യൂബുകൾ എന്നിവ ഉൾപ്പെടുന്നു. ഫെയറിംഗ്, ടൂറിംഗ് ട്രങ്ക് തുടങ്ങിയ സ്ഥലങ്ങളിൽ സ്പീക്കറുകൾ സ്ഥിതി ചെയ്യുന്ന 12-സ്പീക്കർ സൗണ്ട് സിസ്റ്റം മോട്ടോർസൈക്കിളിൻ്റെ സവിശേഷതയാണ്. ബ്ലൂടൂത്ത് കണക്റ്റിവിറ്റി, ആപ്പിൾ കാർപ്ലേ തുടങ്ങിയ സവിശേഷതകളുള്ള ഏഴ് ഇഞ്ച് ടിഎഫ്‍ടി ഡിസ്‌പ്ലേയും ഇതിന് ലഭിക്കുന്നു. സ്പീഡോമീറ്ററും റെവ് കൗണ്ടറും ചേർന്നാണ് ഡിസ്പ്ലേ.

പ്രകടനത്തെക്കുറിച്ച് പറയുമ്പോൾ, 170 എൻഎം ടോർക്ക് സൃഷ്ടിക്കുന്ന 1,890 സിസി ശേഷിയുള്ള എയർ കൂൾഡ് വി-ട്വിൻ എഞ്ചിനാണ് കമ്പനി ഇതിന് നൽകിയിരിക്കുന്നത്. 412 കിലോഗ്രാം ഭാരമുള്ള റോഡ്മാസ്റ്റർ എലൈറ്റിന് മുൻവശത്ത് ടെലിസ്‌കോപിക് ഫോർക്കും പിന്നിൽ എയർ അഡ്ജസ്റ്റുമുള്ള മോണോഷോക്ക് സസ്പെൻഷൻ സജ്ജീകരണവുമുണ്ട്. ഡ്യുവൽ ഫ്രണ്ട് ഡിസ്‌ക് ബ്രേക്കുകളും ഒരു പിൻ ഡിസ്‌കും ആണ് ബ്രേക്കിംഗ് ചുമതലകൾ കൈകാര്യം ചെയ്യുന്നത്. മോട്ടോർസൈക്കിളിന് 20.8 ലിറ്റർ ഇന്ധന ടാങ്കും 403 കിലോഗ്രാം (കെർബ്) ഭാരവുമുണ്ട്. ഒരു വലിയ സാഡിൽബാഗും ഒരു ടോപ്പ് ബോക്സും അതിൻ്റെ പിൻഭാഗത്ത് നൽകിയിരിക്കുന്നു. ഇത് മൊത്തം 136 ലിറ്റർ സ്‌റ്റോറേജ് സ്‌പേസ് നൽകുന്നു. ഇത് പൂട്ടാനും സാധിക്കും. 

• Indian Roadmaster Elite