Tork Kratos price : ടോർക്ക് ക്രാറ്റോസ് ഇലക്ട്രിക് ബൈക്ക് എത്തി
ടോർക്ക് ക്രാറ്റോസ് ഇലക്ട്രിക് മോട്ടോർസൈക്കിളിൽ ഫാസ്റ്റ് ചാർജറുമായാണ് വരുന്നത്. ബൈക്ക് പൂർണ്ണമായി ചാർജ് ചെയ്യാൻ ഒരു മണിക്കൂർ മാത്രമേ എടുക്കൂ. മുൻ T6X ഇലക്ട്രിക് ബൈക്കിനെ അടിസ്ഥാനമാക്കിയാണ് ക്രാറ്റോസ് ഇവി വരുന്നത്.
പൂനെ (Pune) ആസ്ഥാനമായുള്ള സ്റ്റാർട്ടപ്പായ ടോർക്ക് മോട്ടോർസൈക്കിൾസ് പുതിയ ക്രാറ്റോസ് ഇലക്ട്രിക് ബൈക്ക് ഇന്ത്യയിൽ അവതരിപ്പിച്ചു. ബാറ്ററിയിൽ പ്രവർത്തിക്കുന്ന പുതിയ മോട്ടോർസൈക്കിളിന് 1.02 ലക്ഷം രൂപയാണ് ദില്ലി എക്‌സ്-ഷോറൂം വില (സബ്‌സിഡി ഉൾപ്പെടെ) എന്ന് ഹിന്ദുസ്ഥാന്‍ ടൈംസ് ഓട്ടോ റിപ്പോര്‍ട്ട് ചെയ്യുന്നു. ക്രാറ്റോസ്, ക്രാറ്റോസ് ആർ എന്നിങ്ങനെ ബൈക്ക് രണ്ട് പതിപ്പുകളിലാണ് അവതരിപ്പിച്ചിരിക്കുന്നത് എന്നാണ് റിപ്പോര്‍ട്ടുകള്‍.
രണ്ട് പതിപ്പുകളുടെയും ഓർഡർ ബുക്കുകൾ കമ്പനി ഇന്ന് മുതൽ തുറന്നിട്ടുണ്ട്. നിലവിൽ ബുക്കിംഗ് തുറന്നിരിക്കുന്ന കമ്പനിയുടെ ഔദ്യോഗിക വെബ്‌സൈറ്റിൽ താൽപ്പര്യമുള്ള ഉപഭോക്താക്കൾക്ക് വെറും 999 രൂപ നൽകി മോട്ടോർസൈക്കിൾ ബുക്ക് ചെയ്യാം. ഈ വർഷം ഏപ്രിലോടെ ബൈക്കിന്‍റെ ഡെലിവറികൾ നടക്കും എന്നാണ് സൂചനകള്‍.
പുതിയ ടോർക്ക് ക്രാറ്റോസ് ഇവി ഘട്ടം ഘട്ടമായി പാൻ ഇന്ത്യയിൽ ലഭ്യമാക്കും. പ്രാരംഭ ഘട്ടത്തിൽ പൂനെ, മുംബൈ, ഹൈദരാബാദ്, ചെന്നൈ, ദില്ലി തുടങ്ങിയ പ്രധാന ഇന്ത്യൻ നഗരങ്ങളിൽ ഇത് അവതരിപ്പിക്കും. രണ്ടാം ഘട്ടം മോട്ടോർസൈക്കിളിനെ കൂടുതൽ നഗരങ്ങളിലേക്ക് എത്തിക്കും.
ഈ മോട്ടോർസൈക്കിളിന് 48V സിസ്റ്റം വോൾട്ടേജുള്ള IP67-റേറ്റഡ് 4 Kwh ലിഥിയം-അയൺ ബാറ്ററി പായ്ക്ക് ലഭിക്കുന്നു. ഇതിന് 180 കിലോമീറ്റർ IDC പരിധി വാഗ്‍ദാനം ചെയ്യുന്നു. യഥാർത്ഥ റേഞ്ച് 120 കിലോമീറ്ററാണ്. മണിക്കൂറിൽ 100 കിലോമീറ്റർ വേഗത കൈവരിക്കാൻ ഈ ബൈക്കിന് സാധിക്കും. 7.5 Kw പരമാവധി പവറും 28 Nm ന്റെ പീക്ക് ടോർക്ക് ഔട്ട്പുട്ടും ഉള്ള ഒരു ആക്സിയൽ ഫ്ലക്സ് തരം ഇലക്ട്രിക് മോട്ടോർ ലഭിക്കുന്നു. പൂജ്യത്തില്‍ നിന്ന് 40 കിലോമീറ്റർ വേഗത ആര്‍ജ്ജിക്കുന്നത് 4 സെക്കൻഡുകള്‍ മാത്രം മതിയെന്ന് കമ്പനി അവകാശപ്പെടുന്നു. ഉയർന്ന-സ്പെക്ക് ക്രാറ്റോസ് ആറിന് 9.0 Kw/38 Nm നൽകുന്ന കൂടുതൽ ശക്തമായ മോട്ടോർ ലഭിക്കുന്നു, കൂടാതെ സ്റ്റാൻഡേർഡ് മോഡലുമായി താരതമ്യപ്പെടുത്തുമ്പോൾ ഉയർന്ന വേഗത 105 kmph ആണ്.
ജിയോഫെൻസിംഗ്, ഫൈൻഡ് മൈ വെഹിക്കിൾ ഫീച്ചർ, മോട്ടോർവാക്ക് അസിസ്റ്റ്, ക്രാഷ് അലേർട്ട്, വെക്കേഷൻ മോഡ്, ട്രാക്ക് മോഡ് അനാലിസിസ്, സ്മാർട്ട് ചാർജ് അനാലിസിസ് എന്നിങ്ങനെയുള്ള മറ്റ് ചില അധിക കണക്റ്റിവിറ്റി ഫീച്ചറുകൾക്കൊപ്പം ഫാസ്റ്റ് ചാർജിംഗ് ക്രാറ്റോസ് ആർ മോട്ടോർസൈക്കിളിൽ മാത്രമേ ലഭ്യമാകൂ. സ്റ്റാൻഡേർഡ് മോഡൽ ഒരൊറ്റ വൈറ്റ് കളർ ഓപ്‌ഷനിൽ മാത്രമേ ലഭ്യമാകൂവെങ്കിലും, ഉയർന്ന സ്പെക്ക് മോഡൽ വൈറ്റ്, ബ്ലൂ, റെഡ്, ബ്ലാക്ക് എന്നിങ്ങനെയുള്ള ചോയ്‌സുകളുടെ ശ്രേണിയിലാണ് വരുന്നത്.
വിപുലമായ ഗവേഷണത്തിന് ശേഷം ആറ് വർഷങ്ങളോളം പുതിയ ക്രാറ്റോസ് ഇവി പരീക്ഷിക്കുകയും വികസിപ്പിക്കുകയും ചെയ്‍തതായി കമ്പനി അവകാശപ്പെടുന്നു. ഇവി നിർമ്മാതാവ് അവകാശപ്പെടുന്നത് തങ്ങളുടെ ക്രാറ്റോസ് ഇലക്ട്രിക് ബൈക്ക് ചില പ്രധാന നവീകരണങ്ങളിലൂടെ കടന്നുപോയി എന്നും അകത്ത് നിന്ന് പൂർണ്ണമായും നവീകരിച്ചുവെന്നും ആണ്. കമ്പനി അതിന്റെ ഫ്രെയിം, എർഗണോമിക്സ്, ഫീച്ചറുകൾ, കൂടാതെ ബാറ്ററി പാക്കിൽ പോലും മാറ്റങ്ങൾ അവതരിപ്പിച്ചു.
ടോർക്കിൽ നിന്നുള്ള ക്രാറ്റോസ് ഇലക്ട്രിക് ബൈക്ക് TIROS എന്ന് വിളിക്കുന്ന കമ്പനിയുടെ ഇൻ-ഹൗസ് ഹോം-ബിൽറ്റ് ഓപ്പറേറ്റിംഗ് സിസ്റ്റത്തോടുകൂടിയാണ് വരുന്നത്. അതിനുപുറമെ, മോട്ടോർസൈക്കിൾ ടോർക്കിന്റെ ഇൻ-ഹൗസ് വികസിപ്പിച്ച ബാറ്ററിയിൽ നിന്നും ആക്സിയൽ ഫ്ലക്സ് മോട്ടോറിൽ നിന്നും പവർ ഉല്‍പ്പാദിപ്പിക്കും. പൂർണ്ണമായും ഇന്ത്യൻ നിർമ്മിത ഉൽപ്പന്നമാക്കി മാറ്റും. ഇന്ത്യയിൽ നിലവിലുള്ള 150cc-160 സിസി സ്‌പോർട്‌സ് കമ്മ്യൂട്ടർ മോട്ടോർസൈക്കിളുകളുമായി താരതമ്യപ്പെടുത്താവുന്നതാണ് ഇതിന്റെ പ്രകടനം എന്നാണ് റിപ്പോര്‍ട്ടുകള്‍.
