യമഹ എൻമാക്സ് 155 ടെക് മാക്സ് മോഡലിന്റെ ഡിസൈൻ ഇന്ത്യയിൽ പേറ്റന്റ് ചെയ്തതോടെ വാഹനത്തിന്റെ ഇന്ത്യൻ വിപണിയിലേക്കുള്ള സാധ്യതകൾ വർധിച്ചിരിക്കുകയാണ്. ഏറോക്സ് 155-ൽ നിന്ന് വ്യത്യസ്തമായി കംഫർട്ടിന് പ്രാധാന്യം നൽകുന്ന ഈ മാക്സി സ്കൂട്ടർ, YECVT, TFT ഡിസ്പ്ലേ തുടങ്ങിയ പ്രീമിയം ഫീച്ചറുകളോടെയാണ് വരുന്നത്.
ഇന്ത്യൻ ഇരുചക്ര വാഹന വിപണിയിൽ പ്രീമിയം മാക്സി സ്കൂട്ടർ വിഭാഗം കൂടുതൽ സജീവമാകുന്നതിനിടെ, യമഹ എൻമാക്സ് 155 ടെക് മാക്സ് വീണ്ടും ശ്രദ്ധാകേന്ദ്രമാകുന്നു. ഈ മോഡലിന്റെ ഡിസൈൻ ഇന്ത്യയിൽ പേറ്റന്റ് ചെയ്തതോടെയാണ് വാഹനപ്രേമികൾക്കിടയിൽ പുതിയ ചർച്ചകൾക്ക് തുടക്കമായത്. ഡിസൈൻ പേറ്റന്റ് മാത്രം ലോഞ്ച് ഉറപ്പാക്കുന്നില്ലെങ്കിലും, ഭാവിയിൽ ഇന്ത്യൻ വിപണിയിലേക്കുള്ള സാധ്യതകൾ കമ്പനി തുറന്നുവെക്കുന്നുവെന്ന വിലയിരുത്തലാണ് ഉയരുന്നത്.
നിലവിൽ ഇന്ത്യയിൽ വിൽപ്പനയിലുള്ള ഏറോക്സ് 155 സ്പോർട്ടി സ്വഭാവമുള്ള സ്കൂട്ടറാണെങ്കിൽ, എൻമാക്സ് 155 ടെക് മാക്സ് കൂടുതൽ കംഫർട്ടും ദീർഘദൂര യാത്രയും ലക്ഷ്യമിട്ടാണ് ഒരുക്കിയിരിക്കുന്നത്. വലിയ ഫ്രണ്ട് അപ്രൺ, ഉയർന്ന വിൻഡ്സ്ക്രീൻ, വിശാലമായ സ്റ്റെപ്പ്-അപ്പ് സീറ്റ്, വലിയ ഫ്ലോർബോർഡ്, ഇന്റഗ്രേറ്റഡ് ഗ്രാബ് റെയിലുകൾ എന്നിവ ഇതിന് യഥാർഥ മാക്സി സ്കൂട്ടറിന്റെ ഭാവം നൽകുന്നു. ടെക് മാക്സ് പതിപ്പിൽ പ്രത്യേക ഗ്രാഫിക്സ്, പ്രീമിയം പെയിന്റ് സ്കീം, കോൺട്രാസ്റ്റ് സ്റ്റിച്ചിംഗോടുകൂടിയ സീറ്റ് എന്നിവയും ലഭ്യമാണ്.
ഈ മോഡലിന്റെ ഏറ്റവും വലിയ പ്രത്യേകത യമഹയുടെ പുതിയ YECVT (Yamaha Electric Continuously Variable Transmission) സംവിധാനമാണ്. സാധാരണ സി.വി.ടി.യിൽ നിന്ന് വ്യത്യസ്തമായി, ടൗൺ മോഡിലും സ്പോർട്ട് മോഡിലും ത്രോട്ടിൽ റെസ്പോൺസ് മാറ്റാൻ ഇതിലൂടെ കഴിയും. കൂടാതെ, ഓവർടേക്കിംഗിനും കയറ്റങ്ങൾ കയറുന്നതിനുമായി ഡൗൺഷിഫ്റ്റ് ഫംഗ്ഷനും ഒരുക്കിയിട്ടുണ്ട്.
Related Articles
155 സിസി ലിക്വിഡ്-കൂൾഡ് ബ്ലൂ കോർ സിംഗിൾ സിലിണ്ടർ എഞ്ചിനാണ് എൻമാക്സ് 155 ടെക് മാക്സിന് കരുത്തേകുന്നത്. വേരിയബിൾ വാൽവ് ആക്ചുവേഷൻ (VVA) സാങ്കേതികവിദ്യയുള്ള ഈ എഞ്ചിൻ ആഗോള വിപണിയിൽ 15 പി.എസ്. കരുത്തും 14 എൻ.എം. ടോർക്കും ഉൽപ്പാദിപ്പിക്കുന്നു. ഫീച്ചറുകളുടെ കാര്യത്തിലും ഈ സ്കൂട്ടർ സമ്പന്നമാണ്. 4.2 ഇഞ്ച് ടി.എഫ്.ടി. കളർ ഡിസ്പ്ലേ, സ്മാർട്ട്ഫോൺ കണക്ടിവിറ്റി, ഗാർമിൻ നാവിഗേഷൻ, മൈറൈഡ് ആപ്പ് ഇന്റഗ്രേഷൻ, സ്മാർട്ട് കീ, യു.എസ്.ബി. ടൈപ്പ്-സി ചാർജിംഗ്, ഓട്ടോമാറ്റിക് സ്റ്റാർട്ട്-സ്റ്റോപ്പ്, ട്രാക്ഷൻ കൺട്രോൾ, ഡ്യുവൽ ചാനൽ എ.ബി.എസ്., ഫുൾ-ഫേസ് ഹെൽമറ്റ് സൂക്ഷിക്കാവുന്ന അണ്ടർസീറ്റ് സ്റ്റോറേജ് എന്നിവയും ഇതിലുണ്ട്.
13 ഇഞ്ച് അലോയ് വീലുകൾ, മുന്നിലും പിന്നിലും 230 എം.എം. ഡിസ്ക് ബ്രേക്കുകൾ, ടെലിസ്കോപിക് ഫ്രണ്ട് ഫോർക്കുകൾ, പ്രീലോഡ് അഡ്ജസ്റ്റബിൾ ട്വിൻ റിയർ ഷോക്ക് അബ്സോർബറുകൾ എന്നിവയും എൻമാക്സിന്റെ പ്രത്യേകതകളാണ്. അതേസമയം, യമഹ ഇന്ത്യ ഇതിന്റെ ലോഞ്ച് സംബന്ധിച്ച് ഇതുവരെ ഔദ്യോഗിക പ്രഖ്യാപനം നടത്തിയിട്ടില്ല. അതിനാൽ 2026 അവസാനത്തോടെ വാഹനം വിപണിയിൽ എത്തുമെന്ന റിപ്പോർട്ടുകൾ ഇപ്പോൾ അഭ്യൂഹങ്ങൾ മാത്രമാണ്. എങ്കിലും ഡിസൈൻ പേറ്റന്റ് ഫയൽ ചെയ്തതോടെ ഇന്ത്യയിൽ എൻമാക്സ് 155 ടെക് മാക്സ് അവതരിപ്പിക്കാനുള്ള സാധ്യതകൾ കൂടുതൽ ശക്തമായിരിക്കുകയാണ്.
