പ്ലസ് വൺ രണ്ടാം അലോട്ട്മെന്റ്; ഒക്ടോബർ 6 വൈകിട്ട് അഞ്ചിന് അവസാനിക്കും
രണ്ടാം പ്രവേശന നടപടി പൂര്‍ത്തിയായ ശേഷമുള്ള സീറ്റൊഴിവ് വെബ്സൈറ്റില്‍ ഒക്ടോബര്‍ 10ന് രാവിലെ 9ന് പ്രസിദ്ധീകരിക്കും.
തിരുവനന്തപുരം: പ്ലസ് വണ്‍ രണ്ടാം അലോട്ട്മെന്റ് പ്രകാരമുള്ള വിദ്യാര്‍ഥി പ്രവേശനം ഇന്ന് അവസാനിക്കും. മുഖ്യഘട്ടത്തിലെ അവസാന അലോട്ട്മെന്‍റായതിനാല്‍ അവസരം ലഭിച്ചവര്‍ ഫീസടച്ച്‌ സ്ഥിരപ്രവേശനം നേടണം. ആദ്യ അലോട്ട്മെന്റില് താല്‍ക്കാലിക പ്രവേശനം എടുത്തവരും രണ്ടാം അലോട്ട്മെന്റില് മാറ്റമൊന്നുമില്ലെങ്കില്‍ ഇന്ന് വൈകീട്ട് അഞ്ചിനകം സ്ഥിരപ്രവേശനം നേടണം. അലോട്ട്മെന്റ് ലഭിച്ചിട്ടും പ്രവേശനം നേടാത്തവരെയും പ്രവേശനം നേടിയ ശേഷം ടി.സി വാങ്ങിയവരെയും സപ്ലിമെന്‍ററി അലോട്ട്മെന്റില് പരിഗണിക്കില്ല. രണ്ടാം പ്രവേശന നടപടി പൂര്‍ത്തിയായ ശേഷമുള്ള സീറ്റൊഴിവ് വെബ്സൈറ്റില്‍ ഒക്ടോബര്‍ 10ന് രാവിലെ 9ന് പ്രസിദ്ധീകരിക്കും.
ഈ സീറ്റുകളിലേക്ക് അന്നു രാവിലെ ഒമ്പതു മുതല്‍ 14ന് വൈകീട്ട് അഞ്ചുവരെ സപ്ലിമെന്‍ററി അലോട്ട്മെന്‍റിന് അപേക്ഷിക്കാം. കാന്‍ഡിഡേറ്റ് ലോഗിനിലെ 'RENEW APPLICATION' എന്ന ലിങ്കിലൂടെ ഒഴിവുകള്‍ക്കനുസൃതമായി പുതിയ ഓപ്ഷന്‍ നല്‍കി അപേക്ഷ അന്തിമമായി സമര്‍പ്പിക്കണം. ഇതുവരെ അപേക്ഷിക്കാന്‍ APPLY ONLINE-SWS എന്ന ലിങ്കിലൂടെ ഓണ്‍ലൈനായി അപേക്ഷ സമര്‍പ്പിക്കണം.
പ്രവേശന തുടര്‍ പ്രവര്‍ത്തനങ്ങള്‍ക്കായി 'Create Candidate Login-SWS എന്ന ലിങ്കിലൂടെ കാന്‍ഡിഡേറ്റ് ലോഗിന്‍ സൃഷ്ടിക്കണം. തെറ്റായ വിവരങ്ങള്‍ കാരണം അലോട്ട്മെന്റ് റദ്ദാക്കപ്പെട്ടവര്‍ സപ്ലിമെന്‍ററി അലോട്ട്മെന്‍റിന് പരിഗണിക്കാനായി കാന്‍ഡിഡേറ്റ് ലോഗിനിലെ 'RENEW APPLICATION' എന്ന ലിങ്കിലൂടെ പിഴവുകള്‍ തിരുത്തി ഒാപ്ഷനുകള്‍ നല്‍കി അപേക്ഷിക്കണം.
