വെസ്റ്റ് ഇന്‍ഡീസിനെതിരായ അഞ്ചാം ടി20 മത്സരത്തിനുള്ള ഇന്ത്യന്‍ ടീമിലേക്ക് വെറ്ററന്‍ പേസര്‍ ഭുവനേശ്വര്‍ കുമാറിനെ തിരിച്ചുവിളിച്ചു. നാലാം മത്സരത്തില്‍ അര്‍ഷ്ദീപ് സിംഗിന് പരുക്കേറ്റതിനെ തുടര്‍ന്നാണ് ഈ അപ്രതീക്ഷിത മാറ്റം. ഐപിഎല്ലിലെ മികച്ച പ്രകടനമാണ് ഭുവനേശ്വറിന് തുണയായത്.
ബെംഗളൂരു: വെസ്റ്റ് ഇന്‍ഡീസിനെതിരായ അഞ്ചാം ട്വന്റി-20 മത്സരത്തിനുള്ള ഇന്ത്യന്‍ ടീമിലേക്ക് വെറ്ററന്‍ പേസര്‍ ഭുവനേശ്വര്‍ കുമാറിനെ തിരിച്ചെത്തി. ശനിയാഴ്ച ബംഗളൂരുവില്‍ നടക്കുന്ന പരമ്പര നിര്‍ണയിക്കുന്ന അഞ്ചാം മത്സരത്തിന് മുന്നോടിയായാണ് 36കാരനായ ഭുവനേശ്വറിനെ സ്‌ക്വാഡില്‍ ഉള്‍പ്പെടുത്തിയത്. ന്യൂസിലാന്‍ഡ് പര്യടനത്തിനുള്ള ഇന്ത്യന്‍ ടി20 ടീമിലേക്ക് താരത്തെ നേരത്തെ തിരഞ്ഞെടുത്തിരുന്നെങ്കിലും, പ്രതീക്ഷിച്ചതിലും നേരത്തെ ടീമിലേക്ക് വിളി എത്തുകയായിരുന്നു.
ഹൈദരാബാദില്‍ നടന്ന നാലാം ട്വന്റി-20 മത്സരത്തിനിടെ പേസര്‍ അര്‍ഷ്ദീപ് സിംഗിന്റെ തോളിന് പരുക്കേറ്റതിനെ തുടര്‍ന്നാണ് ഭുവനേശ്വറിനെ പെട്ടെന്ന് ടീമിലേക്ക് ഉള്‍പ്പെടുത്തിയത്. 2022 നവംബറിലാണ് ഭുവനേശ്വര്‍ അവസാനമായി ഇന്ത്യക്കായി ടി20 മത്സരം കളിച്ചത്. ന്യൂസിലാന്‍ഡ് പരമ്പരയ്ക്ക് മുന്നോടിയായി ബംഗളൂരുവിലെ സെന്റര്‍ ഓഫ് എക്‌സലന്‍സില്‍ പരിശീലനം നടത്തവേയാണ് താരത്തിന് വിളി വന്നത്. ചിന്നസ്വാമി സ്റ്റേഡിയത്തില്‍ നടക്കുന്ന അവസാന മത്സരത്തില്‍ അര്‍ഷ്ദീപ് കളിക്കുന്ന കാര്യത്തില്‍ മത്സരത്തിന് തൊട്ടുമുമ്പ് മാത്രമായിരിക്കും തീരുമാനമെടുക്കുക.
പരമ്പര 2-2 എന്ന നിലയില്‍ നില്‍ക്കെ, റണ്ണൊഴുകുന്ന പിച്ചുകളില്‍ ബാറ്റ്‌സ്മാന്മാരെ നിയന്ത്രിക്കാന്‍ ഭുവനേശ്വറിന്റെ അനുഭവസമ്പത്ത് ഇന്ത്യക്ക് വലിയ തുണയാകും. ഐപിഎല്‍ 2026ല്‍ റോയല്‍ ചലഞ്ചേഴ്‌സ് ബംഗളൂരുവിനായി കാഴ്ചവെച്ച മികച്ച പ്രകടനമാണ് ഭുവനേശ്വര്‍ കുമാറിന്റെ ദേശീയ ടീമിലേക്കുള്ള തിരിച്ചുവരവിന് വഴിയൊരുക്കിയത്. 16 മത്സരങ്ങളില്‍ നിന്ന് 7.95 എക്കോണമിയില്‍ 28 വിക്കറ്റുകള്‍ വീഴ്ത്തിയ താരം, ആര്‍സിബിയുടെ കിരീട സംരക്ഷണത്തില്‍ നിര്‍ണ്ണായക പങ്കുവഹിച്ചിരുന്നു. പുതിയ പന്തിലെ സ്വിംഗും ഡെത്ത് ഓവറുകളിലെ കൃത്യതയുമാണ് താരത്തെ വീണ്ടും ടീമിലെത്തിച്ചത്.
പുതുക്കിയ ഇന്ത്യന്‍ ടി20 സ്‌ക്വാഡ്: ശ്രേയസ് അയ്യര്‍ (ക്യാപ്റ്റന്‍), അഭിഷേക് ശര്‍മ, വൈഭവ് സൂര്യവംശി, ഇഷാന്‍ കിഷന്‍ (വിക്കറ്റ് കീപ്പര്‍), സഞ്ജു സാംസണ്‍ (വിക്കറ്റ് കീപ്പര്‍), തിലക് വര്‍മ്മ (വൈസ് ക്യാപ്റ്റന്‍), ശിവം ദുബെ, കുല്‍ദീപ് യാദവ്, അക്‌സര്‍ പട്ടേല്‍, രവി ബിഷ്‌ണോയ്, നിതീഷ് കുമാര്‍ റെഡ്ഡി, അര്‍ഷ്ദീപ് സിംഗ്, പ്രിന്‍സ് യാദവ്, മയങ്ക് യാദവ്, നമന്‍ ധീര്‍, ഭുവനേശ്വര്‍ കുമാര്‍.
