ദ്രാവിഡിന്റെ സഹപരിശീലകനായി ഇന്ത്യന് ടീം മുന് ബാറ്റിംഗ് പരിശീലകന് വിക്രം റാത്തോഡിനെ എത്തിക്കാനും രാജസ്ഥാന് ശ്രമിക്കുന്നുണ്ട്.
ജയ്പൂര്: ഐപിഎല്ലില് രാജസ്ഥാന് റോയല്സിനെ പരിശീലിപ്പിക്കാന് ഇന്ത്യന് ടീം മുന് പരിശീലകന് രാഹുല് ദ്രാവിഡെത്തുമെന്നുള്ള വാര്ത്തകള് പുറത്തുവന്നിരുന്നു. എന്നാല് രാജസ്ഥാന് റോയല്സ് ഇക്കാര്യം ഇതുവരെ സ്ഥിരീകരിച്ചിട്ടില്ല. അധികം വൈകാതെ ഔദ്യോഗിക സ്ഥിരീകരണ വന്നേക്കും. ദ്രാവിഡ് വന്നെങ്കിലും കുമാര് സംഗക്കാര ഡയറക്റ്ററായി തുടര്ന്നേക്കുമാണ് അറിയുന്നത്. ടി20 ലോകകപ്പ് നേട്ടത്തിന് പിന്നാലെ ഇന്ത്യയുടെ പരിശീലക സ്ഥാനം ഒഴിഞ്ഞതിന് പിന്നാലെയാണ് ദ്രാവിഡ് വീണ്ടും ഐപിഎല്ലില് പരിശീലകനായി തിരിച്ചെത്തുന്നത്. അടുത്ത സീസണിലേക്കാണ് ദ്രാവിഡ് രാജസ്ഥാന്റെ പരിശീലകനായി കരാറൊപ്പിട്ടതെന്ന് ക്രിക് ഇന്ഫോ റിപ്പോര്ട്ട് ചെയ്തു.
ദ്രാവിഡിന്റെ സഹപരിശീലകനായി ഇന്ത്യന് ടീം മുന് ബാറ്റിംഗ് പരിശീലകന് വിക്രം റാത്തോഡിനെ എത്തിക്കാനും രാജസ്ഥാന് ശ്രമിക്കുന്നുണ്ട്. ഐപിഎല് മെഗാ താരലേലത്തിന് മുന്നോടിയായി നിലനിര്ത്തേണ്ട താരങ്ങള് ആരൊക്കെയാണെന്ന കാര്യത്തില് ദ്രാവിഡ് അടുത്തിടെ ടീം മാനേജ്മെന്റുമായി ചര്ച്ചകള് നടത്തിയിരുന്നുവെന്നും ക്രിക് ഇന്ഫോ റിപ്പോര്ട്ടില് പറയുന്നു. രാജസ്ഥാന് റോയല്സിന്റെ മുന് മെന്ററും ഡയറക്ടറും കൂടിയാണ് രാഹുല് ദ്രാവിഡ്. മുമ്പ് രാജസ്ഥാന് റോയല്സിന്റെ ക്യാപ്റ്റനായിരുന്ന ദ്രാവിഡ് 2013ല് ടീമിനെ ചാമ്പ്യന്സ് ലീഗ് ടി20 ഫൈനലിലേക്ക് നയിച്ചിട്ടുണ്ട്. വീണ്ടും ദ്രാവിഡ് എത്തുമ്പോള് സമ്മിശ്ര പ്രതികരണമാണ് ലഭിക്കുന്നത്. രാജസ്ഥാന് ക്യാപ്റ്റന് സഞ്ജു സാംസണെ ദേശീയ ടീമില് നിന്ന് എപ്പോഴും മാറ്റിനിര്ത്തിയിട്ടുണ്ടെന്നാണ് ദ്രാവിഡ് എന്നാണ് ആരാധകരുടെ വാദം. എന്നാല് ദ്രാവിഡ് വരുന്നത് ഒരു ടീമെന്ന നിലയില് രാജസ്ഥാന് ഗുണം ചെയ്യുമെന്ന് പറയുന്ന ആരാധകരുമുണ്ട്. ചില പോസ്റ്റുകള് വായിക്കാം...
2014, 2015 സീസണുകളിലാണ് ദ്രാവിഡ് രാജസ്ഥാന്റെ ഡയറക്ടറായും മെന്ററുമായത്. ഈ കാലഘട്ടത്തിലാണ് സഞ്ജു രാജസ്ഥാന് റോയല്സിലെ താരമായത്. 2015ല് ഡല്ഹി ക്യാപിറ്റല്സിലേക്ക് പോയ ദ്രാവിഡ് 2019 മുതല് ദേശീയ ക്രിക്കറ്റ് അക്കാദമി തലവനാവുന്നതുവരെ ആ പദവിയില് തുടര്ന്നു.രാജസ്ഥാന് റോയല്സിന് വിലക്ക് വന്ന രണ്ട് വര്ഷം സഞ്ജു ഡല്ഹി ക്യാപിറ്റല്സില് കളിച്ചതും ഇതേ കാലഘട്ടത്തിലാണ്. ഇന്ത്യയുടെ അണ്ടര് 19 ടീം പരിശീലകനായും ദ്രാവിഡ് ഇതിനിടെ പ്രവര്ത്തിച്ചു.
2021ലാണ് ദ്രാവിഡ് ഇന്ത്യയുടെ മുഖ്യപരിശീലകനായത്. ദ്രാവിഡിന് കീഴില് കഴിഞ്ഞ ജൂണില് ഇന്ത്യ ടി20 ലോകകപ്പ് കീരീടം നേടിയതിനൊപ്പം കഴിഞ്ഞ വര്ഷം ഏകദിന ലോകകപ്പിന്റെ ഫൈനലിലും രണ്ട് തവണ ലോക ടെസ്റ്റ് ചാംപ്യന്ഷിപ്പിന്റെ ഫൈനലിലും കളിച്ചു. നിലവില് ടീം ഡയറക്ടര് കുമാര് സംഗക്കാരയാണ് രാജസ്ഥാന് റോയല്സിന്റെ പരിശീലന കാര്യങ്ങള് കൂടി നോക്കുന്നത്. ആദ്യ ഐപിഎല്ലില് കിരീടം നേടിയ രാജസ്ഥാന് 2022ല് സഞ്ജുവിന് കീഴില് റണ്ണേഴ്സ് അപ്പായി. 2023ല് പ്ലേ ഓഫ് ബര്ത്ത് നേരിയ വ്യത്യാസത്തില് നഷ്ടമായ രാജസ്ഥാന് കഴിഞ്ഞ സീസണില് എലിമിനേറ്ററിലാണ് പുറത്തായത്.
