ലോകത്തിലെ ഏറ്റവും മികച്ച ബൗളര്മാരെ നേരിടുമ്പോള് വൈഭവ് കാണിക്കുന്ന മാനസിക കരുത്താണ് അവനെ മറ്റുള്ളവരില് നിന്ന് വ്യത്യസ്തനാക്കുന്നതെന്ന് മുന് വെസ്റ്റ് ഇന്ഡീസ് താരം ഇയാന് ബിഷപ്പ് അഭിപ്രായപ്പെട്ടു.
മുംബൈ: പ്രൊഫഷണല് കായിക ലോകത്ത് വെറും 15 വയസുള്ളപ്പോള് ലോകത്തെ മികച്ച താരങ്ങളെ നേരിടണമെങ്കില് അസാമാന്യ പ്രതിഭ ആവശ്യമാണ്. രാജസ്ഥാന് റോയല്സിന്റെ കൗമാര താരം വൈഭവ് സൂര്യവന്ഷി ഇപ്പോള് ചെയ്തുകൊണ്ടിരിക്കുന്നത് അതാണ്. ലോകോത്തര ബൗളര്മാരെ ഭയമില്ലാതെ നേരിടുന്ന ഈ ബീഹാര് സ്വദേശിയുടെ ബാറ്റിംഗ് ശൈലി ഇതിനോടകം തന്നെ മുന് താരങ്ങളുടെയും ക്രിക്കറ്റ് ലോകത്തിന്റെയും പ്രശംസ പിടിച്ചുപറ്റി കഴിഞ്ഞു.
ലോകത്തിലെ ഏറ്റവും മികച്ച ബൗളര്മാരെ നേരിടുമ്പോള് വൈഭവ് കാണിക്കുന്ന മാനസിക കരുത്താണ് അവനെ മറ്റുള്ളവരില് നിന്ന് വ്യത്യസ്തനാക്കുന്നതെന്ന് മുന് വെസ്റ്റ് ഇന്ഡീസ് താരം ഇയാന് ബിഷപ്പ് അഭിപ്രായപ്പെട്ടു. ''മാനസികമായി അവന് വളരെ കരുത്തനാണ്. ലോകത്തിലെ ഏറ്റവും മികച്ച ബൗളര്മാരായ ജസ്പ്രിത് ബുംറയെയൊക്കെ അവന് നേരിടുന്ന രീതി അതിശയിപ്പിക്കുന്നതാണ്. ബേസ്ബോള് ശൈലിയിലുള്ള അവന്റെ ബാറ്റ് സ്വിംഗ് സാങ്കേതികമായി ഏറെ സവിശേഷമാണ്.'' ബിഷപ്പ് പറഞ്ഞു. ഷോര്ട്ട് പിച്ച് പന്തുകളില് വൈഭവിന് ചെറിയ പോരായ്മകള് ഉണ്ടെങ്കിലും, ആ പന്തുകളെ സിക്സറിലേക്ക് പറത്തിക്കൊണ്ട് ബൗളര്മാരുടെ ആത്മവിശ്വാസം തകര്ക്കാനുള്ള കഴിവ് അവനുണ്ടെന്നും അദ്ദേഹം കൂട്ടിച്ചേര്ത്തു.
റെക്കോര്ഡുകള് തകര്ക്കുന്ന പ്രകടനം
ഐപിഎല് ചരിത്രത്തില് ഏറ്റവും വേഗത്തില് 400 റണ്സ് തികയ്ക്കുന്ന താരം എന്ന റെക്കോര്ഡ് ഈ സീസണില് വൈഭവ് സ്വന്തമാക്കി. വെറും 9 ഇന്നിംഗ്സുകളില് നിന്നായി 238.10 എന്ന അവിശ്വസനീയമായ സ്ട്രൈക്ക് റേറ്റിലാണ് താരം ഇത്രയും റണ്സ് അടിച്ചുകൂട്ടിയത്. നിലവില് ഓറഞ്ച് ക്യാപ്പിനായുള്ള പോരാട്ടത്തില് ആദ്യ മൂന്ന് സ്ഥാനങ്ങളില് വൈഭവ് ഇടംപിടിച്ചിട്ടുണ്ട്. പാറ്റ് കമ്മിന്സ്, ജോഷ് ഹേസല്വുഡ്, ഭുവനേശ്വര് കുമാര്, അര്ഷ്ദീപ് സിംഗ് തുടങ്ങിയ വമ്പന് ബൗളര്മാരെ ആദ്യ പന്തില് തന്നെ സിക്സര് അടിച്ചുകൊണ്ടാണ് ഈ കൗമാരതാരം തന്റെ വരവറിയിച്ചത്.
ഇന്ത്യന് ടീമിലേക്കുള്ള വിളി ദൂരെയല്ല
ഐപിഎല്ലിലെ തകര്പ്പന് പ്രകടനത്തോടെ ഇന്ത്യന് ദേശീയ ടീമിലേക്കുള്ള വൈഭവിന്റെ അരങ്ങേറ്റത്തെക്കുറിച്ചുള്ള ചര്ച്ചകള് സജീവമായിട്ടുണ്ട്. ടീമിലേക്ക് തിരഞ്ഞെടുക്കപ്പെട്ടാല്, സച്ചിന് ടെണ്ടുല്ക്കറുടെയും (16 വയസ്സും 205 ദിവസവും) ഷഫാലി വര്മ്മയുടെയും (15 വയസ്സും ഏഴ് മാസവും 27 ദിവസവും) ഏറ്റവും പ്രായം കുറഞ്ഞ അരങ്ങേറ്റ താരം എന്ന റെക്കോര്ഡുകള് വൈഭവിന്റെ പേരിലാകും.
