ഒന്നുകില്‍ നന്നായി കളിക്കൂ, അല്ലെങ്കില്‍ സഞ്ജുവിന് വഴി മാറി കൊടുക്കൂ; ഋഷഭ് പന്തിനോട് വിവിഎസ് ലക്ഷ്മണ്‍
ഋഷഭ് പന്തിന്റെ പകരക്കാരനായി സഞ്ജുവിനെ ടീം മാനേജ്മെന്റും സെലക്ടര്‍മാരും കാണുന്നു എന്നതാണ് ഇത് കാണിക്കുന്നത്. ഋഷഭ് പന്തിന് ഒരുപാട് അവസരങ്ങള്‍ ലഭിച്ചു കഴിഞ്ഞു. ലഭിച്ച അവസരങ്ങള്‍ പാഴാക്കുന്നതിനെക്കുറിച്ച് ടീം മാനേജ്മെന്റും പന്തിനോട് സംസാരിച്ചിട്ടുണ്ടാവുമെന്നാണ് കരുതുന്നത്
ഹൈദരാബാദ്: ഇന്ത്യന്‍ ടീം തന്നിലര്‍പ്പിച്ച വിശ്വാസം കാക്കാന്‍ ഋഷഭ് പന്ത് തയാറാവണമെന്ന് മുന്‍ താരം വിവിഎസ് ലക്ഷ്മണ്‍. ഫോം വീണ്ടെടുത്തില്ലെങ്കില്‍ പന്തിന്റെ സ്ഥാനം സഞ്ജു സാംസണ്‍ സ്വന്തമാക്കുമെന്നും ലക്ഷ്മണ്‍ പറഞ്ഞു. വെസ്റ്റ് ഇന്‍ഡീസിനെതിരായ ടി20 പരമ്പരക്കുള്ള ഇന്ത്യന്‍ ടീമില്‍ സഞ്ജു സാംസണെ ഉള്‍പ്പെടുത്തിയത് ഋഷഭ് പന്തിനുള്ള ശക്തമായ സന്ദേശമാണെന്നും ലക്ഷ്മണ്‍ പറഞ്ഞു.
ഋഷഭ് പന്തിന്റെ പകരക്കാരനായി സഞ്ജുവിനെ ടീം മാനേജ്മെന്റും സെലക്ടര്‍മാരും കാണുന്നു എന്നതാണ് ഇത് കാണിക്കുന്നത്. ഋഷഭ് പന്തിന് ഒരുപാട് അവസരങ്ങള്‍ ലഭിച്ചു കഴിഞ്ഞു. ലഭിച്ച അവസരങ്ങള്‍ പാഴാക്കുന്നതിനെക്കുറിച്ച് ടീം മാനേജ്മെന്റും പന്തിനോട് സംസാരിച്ചിട്ടുണ്ടാവുമെന്നാണ് കരുതുന്നത്. ആത്യന്തികമായി സെലക്ടര്‍മാരും ടീം മാനേജ്മെന്റും തന്നിലര്‍പ്പിച്ച വിശ്വാസം നീതീകരിക്കേണ്ടത് ഋഷഭ് പന്തിന്റെ ചുമതലണ്. നിര്‍ഭാഗ്യവശാല്‍ പന്തിന് ഇതുവരെ അതിന് കഴിഞ്ഞിട്ടില്ല.
എങ്കിലും ഋഷഭ് പന്ത് ടീമിന്റെ എക്സ് ഫാക്ടര്‍ തന്നെയാണ് ഇപ്പോഴും. ഒറ്റ ഇന്നിംഗ്സ് കൊണ്ട് കളിയുടെ ഗതിയാകെ മാറ്റി മറിക്കാന്‍ കഴിവുള്ള താരമാണ് ഋഷഭ് പന്തെന്ന് ഞാനിപ്പോഴും വിശ്വസിക്കുന്നു. പക്ഷെ പ്ലേയിംഗ് ഇലവനില്‍ സ്ഥാനം നിലനിര്‍ത്താനുള്ള കടുത്ത സമ്മര്‍ദ്ദത്തിലാണ് ഋഷഭ് പന്ത് ഇപ്പോഴെന്ന് ഞാന്‍ കരതുന്നു. അതുകൊണ്ടുതന്നെ അതയാളുടെ പ്രകടനത്തെയും സാരമായി ബാധിക്കുന്നുണ്ട്.
ഐപിഎല്ലിന് ശേഷമെ ധോണി വിരമിക്കല്‍ സംബന്ധിച്ച് എന്തെങ്കിലും തീരുമാനമെടുക്കാന്‍ സാധ്യതയുള്ളൂവെന്നും ലക്ഷ്മണ്‍ പറഞ്ഞു. സഞ്ജുവിന്റെയും ഋഷഭ് പന്തിന്റെയും പ്രകടനം വിലയിരുത്തിയാവും സെലക്ടര്‍മാരും ഇക്കാര്യത്തില്‍ നിലപാടെടുക്കുകയെന്നും ലക്ഷ്മണ്‍ പറഞ്ഞു.
നിലവിലെ സാഹചര്യത്തില്‍ ടി20 ലോകകപ്പില്‍ ഋഷഭ് പന്ത് തന്നെയാവും ആദ്യ ചോയ്സ്. സഞ്ജു പകരക്കാരനാവും. ഈ രണ്ട് യുവതാരങ്ങളും അവര്‍ക്ക് ലഭിക്കുന്ന അവസരങ്ങള്‍ ഉപയോഗിക്കുന്നില്ലെങ്കില്‍ ധോണിയിലേക്ക് സെലക്ടര്‍മാര്‍ മടങ്ങിപ്പോയേക്കാമെന്നും ലക്ഷ്മണ്‍ പറഞ്ഞു.
