തുടക്കം മുതല് രാഹുല് താളം കണ്ടെത്തിയപ്പോള് അമിത പ്രതിരോധത്തിലേക്ക് പോയ ശുഭ്മാന് ഗില്ലിന് പിടിച്ചു നില്ക്കാനായില്ല. ഇന്നലെ 14 റണ്സെടുത്തിരുന്ന ഗില് ഇന്ന് ഒമ്പത് റണ്സ് കൂടി കൂട്ടിച്ചേര്ത്ത് 23 റണ്സുമായി മടങ്ങി.
ഹൈദരാബാദ്: ഇംഗ്ലണ്ടിനെതിരായ ഹൈദരാബാദ് ക്രിക്കറ്റ് ടെസ്റ്റില് ഒന്നാം ഇന്നിംഗ്സില് ഇന്ത്യ മികച്ച ലീഡിലേക്ക്. ഇംഗ്ലണ്ടിന്റെ ഒന്നാം ഇന്നിംഗ്സ് സ്കോറായ 246 റണ്സിന് മറുപടിയായി 119-1 എന്ന സ്കോറില് ക്രീസിലിറങ്ങിയ രണ്ടാം ദിനം സ്റ്റംപെടുക്കുമ്പോള് ഏഴ് വിക്കറ്റ് നഷ്ടത്തില് 421 റണ്സെന്ന നിലയിലാണ്. 81 റണ്സോടെ രവീന്ദ്ര ജഡേജയും 35 റണ്സോടെ അക്സര് പട്ടേലും ക്രീസില്. മൂന്ന് വിക്കറ്റ് കൈിലിരിക്കെ ഇന്ത്യക്കിപ്പോള് 175 റണ്സിന്റെ ഒന്നാം ഇന്നിംഗ്സ് ലീഡുണ്ട്. പിരിയാത്ത എട്ടാം വിക്കറ്റ് കൂട്ടുകെട്ടില് അക്സര്-ജഡേജ സഖ്യം 63 റണ്സ് കൂട്ടിച്ചേര്ത്തിട്ടുണ്ട്. ജഡേജക്ക് പുറമെ കെ എല് രാഹുലിന്റെ തകര്പ്പന് അര്ധസെഞ്ചുറിയാണ് ഇന്ത്യക്ക് രണ്ടാം ദിനം കരുത്തായത്.
തുടക്കത്തിലെ ഞെട്ടി ഇന്ത്യ
രണ്ടാം ദിനം ആദ്യ ഓവറില് തന്നെ ഇന്ത്യയെ ഞെട്ടിച്ചാണ് ഇംഗ്ലണ്ട് തുടങ്ങിയത്. ആദ്യ ഓവര് എറിയാനെത്തിയ ജോ റൂട്ടിനെതിരെ യശസ്വി ജയ്സ്വാള് ബൗണ്ടറി നേടിയെങ്കിലും ആ ഓവറില് തന്നെ യശസ്വിയെ സ്വന്തം ബൗളിംഗില് കൈപ്പിടിയിലൊതുക്കി റൂട്ട് ഇന്ത്യയെ ഞെട്ടിച്ചു. 74 പന്തില് 80 റണ്സെടുത്ത് യശസ്വി മടങ്ങിയത്. 10 ഫോറും മൂന്ന് സിക്സും അടങ്ങുന്നതാണ് യശസ്വിയുടെ ഇന്നിംഗ്സ്. പിന്നാലെ നാലാം നമ്പറില് കെ എല് രാഹുല് ആണ് ക്രീസിലെത്തിയത്.
രഞ്ജി ട്രോഫി: ബിഹാറിന് മുന്നില് തകര്ന്നടിഞ്ഞ് കേരളം, സെഞ്ചുറിയുമായി പൊരുതി ശ്രേയസ് ഗോപാൽ
തുടക്കം മുതല് രാഹുല് താളം കണ്ടെത്തിയപ്പോള് അമിത പ്രതിരോധത്തിലേക്ക് പോയ ശുഭ്മാന് ഗില്ലിന് പിടിച്ചു നില്ക്കാനായില്ല. ഇന്നലെ 14 റണ്സെടുത്തിരുന്ന ഗില് ഇന്ന് ഒമ്പത് റണ്സ് കൂടി കൂട്ടിച്ചേര്ത്ത് 23 റണ്സുമായി മടങ്ങി. 66 പന്തുകള് നേരിട്ട ഗില് രണ്ട് ബൗണ്ടറികള് മാത്രമാണ് നേടിയത്.
ഗില് മടങ്ങിയശേഷം ക്രീസിലെത്തിയ ശ്രേയസ് അയ്യര്ക്കെതിരെ ഷോര്ട്ട് ബോള് തന്ത്രം ഇംഗ്ലണ്ട് പരീക്ഷിച്ചെങ്കിലും അത് അതിജീവിച്ച ശ്രേയസ് രാഹുലിനൊപ്പം 64 റണ്സ് കൂട്ടുകെട്ടിലൂടെ ഇന്ത്യയെ ഇംഗ്ലണ്ട് സ്കോറിന് അടുത്തെത്തിച്ചു. ലഞ്ചിന് പിന്നാലെ സിക്സ് അടിക്കാനുള്ള ആവേശത്തില് ശ്രേയസ്(35) മടങ്ങിയെങ്കിലും ജഡേജയും രാഹുലും ചേര്ന്ന് ഇന്ത്യയെ ലീഡിലേക്ക് നയിച്ചു. സെഞ്ചുറിയിലേക്കെന്ന് തോന്നിച്ച രാഹുല് റെഹാന് അഹമ്മദിനെ സിക്സ് അടിക്കാനുള്ള ആവേശത്തില് 86 റണ്സില് വീണു. എട്ട് ഫോറും രണ്ട് സിക്സും അടങ്ങുന്നതാണ് രാഹുലിന്റെ ഇന്നിംഗ്സ്.
രാഹുല് മടങ്ങിയശേഷം ശ്രീകര് ഭരതുമൊത്ത് മികച്ച കൂട്ടുകെട്ടുണ്ടാക്കിയ ജഡേജ ഇന്ത്യയുടെ ലീഡ് 100 കടത്തി. 41 റണ്സെടുത്ത ഭരത്തിനെ റൂട്ട് വിക്കറ്റിന് മുന്നില് കുടുക്കിയതിന് പിന്നാലെ അശ്വിന്(1) റണ്ണൗട്ടായി. എന്നാല് അക്സര് പട്ടേലുമൊത്ത് വീണ്ടുമൊരു കൂട്ടുകെട്ടിലൂട ജഡേജ ഇന്ത്യക്ക് മികച്ച ലീഡ് ഉറപ്പാക്കി.
ഇന്നലെ ഒന്നാം ദിനം ഇംഗ്ലണ്ടിന്റെ ഒന്നാം ഇന്നിംഗ്സ് 246 റണ്സിൽ അവസാനിച്ചിരുന്നു.ടോസ് നേടി ബാറ്റിംഗിനിറങ്ങിയ ഇംഗ്ലണ്ട് നല്ല തുടക്കത്തിനുശേഷമാണ് തകര്ന്നടിഞ്ഞത്. ഇന്ത്യയുടെ സ്പിന് ത്രയമായ അശ്വിനും ജഡേജക്കും അക്സര് പട്ടേലിനും മുന്നില് ബാസ്ബോള് ശൈലിയില് ബാറ്റ് വീശാന് ശ്രമിച്ച ഇംഗ്ലണ്ട് അടിതെറ്റി വീഴുകയായിരുന്നു. ക്യാപ്റ്റന് ബെന് സ്റ്റോക്സ് വാലറ്റക്കാരെ കൂട്ടുപിടിച്ച് നടത്തിയ ചെറുത്തുനില്പ്പാണ് 155-7ല് നിന്ന് ഇംഗ്ലണ്ടിനെ 246ല് എത്തിച്ചത്.
