ഏകദിന ടീമില് നിന്ന് വിരമിക്കുന്നു എന്ന അഭ്യൂഹങ്ങൾക്കിടെ, ഇന്ത്യൻ ക്യാപ്റ്റൻ രോഹിത് ശർമ്മ ഹെഡ് കോച്ച് ഗൗതം ഗംഭീറുമായി ലോർഡ്സിൽ സൗഹൃദം പങ്കിട്ടു. ബിസിസിഐ വിരമിക്കൽ വാർത്തകൾ നിഷേധിച്ചതിന് പിന്നാലെയായിരുന്നു ഇരുവരും പരിശീലനത്തിനിടെ ചിരിച്ചുല്ലസിച്ചത്.
ലണ്ടന്: ഇന്ത്യന് ഏകദിന ടീമില് നിന്ന് രോഹിത് ശര്മ്മ വിരമിക്കുന്നു എന്ന അഭ്യൂഹങ്ങള്ക്കിടെ, ഹെഡ് കോച്ച് ഗൗതം ഗംഭീറുമായി സൗഹൃദത്തില് ലോര്ഡ്സ് മൈതാനത്ത് ഇന്ത്യന് ക്യാപ്റ്റന്. ഇംഗ്ലണ്ടിനെതിരായ ഏകദിന പരമ്പരയ്ക്ക് ശേഷം രോഹിത് വിരമിക്കുമെന്ന തരത്തില് ഉയര്ന്ന വാര്ത്തകള് ബിസിസിഐ സെക്രട്ടറി ദേവാജിത് സൈക്കിയ വെള്ളിയാഴ്ച പൂര്ണമായും നിഷേധിച്ചിരുന്നു. രോഹിത് ഏകദിന ടീമിന്റെ അവിഭാജ്യ ഘടകമാണെന്നും വിരമിക്കല് വാര്ത്തകള് അടിസ്ഥാനരഹിതമാണെന്നും അദ്ദേഹം വ്യക്തമാക്കിയിരുന്നു.
ലോര്ഡ്സിലെ പരിശീലനം
അഭ്യൂഹങ്ങള്ക്ക് വിരാമമിട്ടതിന് പിന്നാലെ, ശനിയാഴ്ച നടന്ന ഇന്ത്യയുടെ ഓപ്ഷണല് പരിശീലന സെഷനില് രോഹിത് സജീവമായി പങ്കെടുത്തു. ഫോം കണ്ടെത്താനുള്ള തീവ്രശ്രമത്തിലാണ് ഇന്ത്യന് നായകന്. പരിശീലനത്തിന് മുന്നോടിയായി ഗൗതം ഗംഭീര്, ബാറ്റിംഗ് കോച്ച് സിതാന്ഷു കൊട്ടക് എന്നിവരുമായി രോഹിത് ദീര്ഘനേരം ചര്ച്ച നടത്തി. ലോര്ഡ്സ് ബാല്ക്കണിയില് വെച്ച് ഗംഭീറുമായി രോഹിത് വളരെ സന്തോഷത്തോടെ സംസാരിക്കുന്നതും തമാശകള് പങ്കുവെക്കുന്നതും കാണാമായിരുന്നു.
പിന്തുണയുമായി മോണി മോര്ക്കല്
തുടര്ച്ചയായി ഫോം കണ്ടെത്താന് വിഷമിക്കുന്ന രോഹിത്തിന് പൂര്ണ പിന്തുണയുമായി ഇന്ത്യന് ബോളിംഗ് കോച്ച് മോണി മോര്ക്കല് രംഗത്തെത്തി. 'പുതിയ പന്തില് റണ്സ് കണ്ടെത്താന് രോഹിത്തിന് പ്രയാസമുണ്ട്, പന്ത് നല്ലതുപോലെ സ്വിംഗ് ചെയ്യുന്നുമുണ്ട്. എന്നാല് രോഹിത് ഇതിനുമുമ്പും ഇത്തരം പ്രതിസന്ധികളെ അതിജീവിച്ചിട്ടുണ്ട്. അദ്ദേഹത്തിന് ആവശ്യത്തിന് അനുഭവസമ്പത്തുണ്ട്, തീര്ച്ചയായും അദ്ദേഹം ഈ മോശം ഫോമില് നിന്ന് തിരിച്ചുവരും.' മോര്ക്കല് മാധ്യമങ്ങളോട് പറഞ്ഞു.
2027 ലോകകപ്പും ഭാവി പദ്ധതികളും
രോഹിത്തിന്റെ വിരമിക്കല് ബിസിസിഐ തള്ളിക്കളഞ്ഞെങ്കിലും, 2027-ലെ ഏകദിന ലോകകപ്പിനുള്ള ടീമില് അദ്ദേഹം ഉണ്ടാകുമോ എന്ന കാര്യത്തില് ഔദ്യോഗിക സ്ഥിരീകരണം നല്കാന് ബോര്ഡ് തയ്യാറായില്ല. യശസ്വി ജയ്സ്വാള് പോലുള്ള യുവതാരങ്ങള് അവസരത്തിനായി കാത്തിരിക്കുമ്പോള്, ദക്ഷിണാഫ്രിക്കയില് നടക്കാനിരിക്കുന്ന ലോകകപ്പിനായുള്ള തയ്യാറെടുപ്പുകളില് രോഹിത്തിന്റെ സ്ഥാനം സംബന്ധിച്ച അന്തിമ തീരുമാനം സെലക്ടര്മാര് കൈക്കൊള്ളും.
തണുപ്പന് മട്ടില് നിന്ന് സൗഹൃദത്തിലേക്ക്
2024-25 ലെ ഓസ്ട്രേലിയന് പര്യടനത്തിനിടെ രോഹിതും ഗംഭീറും തമ്മില് അസ്വാരസ്യങ്ങളുണ്ടെന്ന തരത്തില് വാര്ത്തകള് പ്രചരിച്ചിരുന്നു. സിഡ്നി ടെസ്റ്റിന് മുന്നോടിയായുള്ള പരിശീലനത്തിന് രോഹിത് വൈകിയെത്തിയത് വലിയ ചര്ച്ചയായിരുന്നു. കൂടാതെ, മത്സരത്തിന് മുമ്പുള്ള പത്രസമ്മേളനത്തില് രോഹിത്തിന് പകരം ഗംഭീറാണ് പങ്കെടുത്തത്. എന്നാല്, ഇന്നലെ ലോര്ഡ്സില് കണ്ടത് പൂര്ണമായും വ്യത്യസ്തമായ ചിത്രമാണ്. പരിശീലനത്തിന് തൊട്ടുമുമ്പ് ഗംഭീറും രോഹിത്തും വളരെ സൗഹൃദത്തോടെ ഇടപെടുന്നത് ടീമിലെ അസ്വാരസ്യങ്ങളെക്കുറിച്ചുള്ള അഭ്യൂഹങ്ങളെ തള്ളിക്കളയുന്നതായിരുന്നു.
