അണ്ടര് 19 ലോകകപ്പില് അമേരിക്കയ്ക്കെതിരായ ആദ്യ മത്സരത്തില് ഇന്ത്യന് ഓപ്പണര് വൈഭവ് സൂര്യവന്ഷിക്ക് നിരാശാജനകമായ തുടക്കം. 108 റണ്സ് വിജയലക്ഷ്യം പിന്തുടര്ന്ന ഇന്ത്യക്കായി ഇറങ്ങിയ താരം നാല് പന്തില് രണ്ട് റണ്സെടുത്ത് പുറത്തായി.
ബുലവായോ: അണ്ടര് 19 ലോകകപ്പില് ഇന്ത്യന് കൗമാരതാരം വൈഭവ് സൂര്യവന്ഷിക്ക് നിരാശപ്പെടുത്തുന്ന തുടക്കം. ഗ്രൂപ്പ് എയില് അമേരിക്കയ്ക്കെതിരായ മത്സരത്തില് ഇന്ത്യന് ഓപ്പണര് രണ്ട് റണ്സെടുത്ത് മടങ്ങി. 108 റണ്സ് വിജയലക്ഷ്യം പിന്തുടരുമ്പോഴാണ് വൈഭവിന് തിളങ്ങാന് കഴിയാതെ പോയത്. നാല് പന്തുകള് മാത്രം നേരിട്ട വൈഭവിനെ റിത്വിക് അപ്പിടി ബൗള്ഡാക്കുകയായിരുന്നു. ഒടുവില് വിവരം ലഭിക്കുമ്പോള് ഇന്ത്യ നാല് ഓവറില് ഒരു വിക്കറ്റ് മാത്രം നഷ്ടത്തില് 21 റണ്സെടുത്തിട്ടുണ്ട്. ക്യാപ്റ്റന് ആയുഷ് മാത്രെ (15), വേദാന്ത് ത്രിവേദി (2) എന്നിവരാണ് ക്രീസില്.
ഇന്ത്യക്കെതിരെ ടോസ് നഷ്ടമായി ആദ്യം ബാറ്റ് ചെയ്ത അമേരിക്ക 35.2 ഓവറില് 107 റണ്സിന് ഓള് ഔട്ടായി. 52 പന്തില് 36 റണ്സെടുത്ത നിതീഷ് സുധിനി ആണ് അമേരിക്കയുടെ ടോപ് സ്കോറര്. ഓപ്പണര് സാഹില് ഗാര്ഗ്(16), അര്ജ്ജുന് മഹേഷ്(16), അദ്നിത് ജാംബ്(18) എന്നിവര് മാത്രമാണ് അമേരിക്കന് ടീമില് രണ്ടക്കം കടന്നത്. ഇന്ത്യക്കായി ഹെനില് പട്ടേല് 16 റണ്സ് വഴങ്ങി അഞ്ച് വിക്കറ്റെടുത്തു.
ടോസ് നഷ്ടമായി ക്രീസിലിറങ്ങിയ അമേരിക്കക്ക് രണ്ടാം ഓവറില് തന്നെ തിരിച്ചടിയേറ്റു. ഏഴ് പന്തില് ഒരു റണ്ണെടുത്ത അമ്രീന്ദര് ഗില്ലിനെ വിഹാന് മല്ഹോത്രയുടെ കൈകളിലെത്തിച്ച് ഹെനില് പട്ടേലാണ് വിക്കറ്റ് വേട്ടക്ക് തുടക്കമിട്ടത്. സാഹില് ഗാര്ഗും അര്ജ്ജുന് മഹേഷും ചേര്ന്ന് പിടിച്ചു നില്ക്കാന് ശ്രമിച്ചെങ്കിലും സാഹില് ഗാര്ഗിനെ(16) മടക്കി ദീപേഷ് ദേവേന്ദ്രന് തിരിച്ചടിച്ചു. പിന്നാലെ ഉത്കര്ഷ് ശ്രീവാസ്തവയെ(0)യും അര്ജ്ജുന് മഹേഷിനെയും(16) മടക്കി ഹെനില് പട്ടേല് അമേരിക്കയെ 39-5ലേക്ക് തള്ളിയിട്ടു. നിതീഷ് സുധിനിയുടെ ഒറ്റയാള് പോരാട്ടം അമേരിക്കയെ 50 കടത്തിയെങ്കിലും കൂടെ പിടിച്ചു നില്ക്കാന് ആരുമുണ്ടായില്ല.
ഗ്രൂപ്പില് ന്യൂസിലന്ഡ്, ബംഗ്ലാദേശ് എന്നിവരാണ് ഇന്ത്യയുടെ മറ്റു എതിരാളികള്. മലയാളി താരങ്ങളായ ആരോണ് ജോര്ജ്, മുഹമ്മദ് ഇനാന് എന്നിവര് ഇന്ത്യന് സ്ക്വാഡിനൊപ്പം ഉണ്ടെങ്കിലും പ്ലേയിംഗ് ഇലവനനില് ഉള്പ്പെടുത്തിയിരുന്നില്ല.
ഇന്ത്യ പ്ലേയിംഗ് ഇലവന്: ആയുഷ് മാത്രെ (ക്യാപ്റ്റന്),വൈഭവ് സൂര്യവംഷി, വേദാന്ത് ത്രിവേദി,വിഹാന് മല്ഹോത്ര,അഭിഗ്യാന് കുണ്ടു,ഹര്വന്ഷ് പംഗാലിയ,ആര് എസ് അംബ്രീഷ്, കനിഷ്ക് ചൗഹാന്, ഹെനില് പട്ടേല്, ദീപേഷ് ദേവേന്ദ്രന്, ഖിലന് പട്ടേല്.
