എട്ടാം ക്ലാസില് പഠിക്കുന്ന സമയം മുതല് പെണ്കുട്ടിയെ പിതാവ് ലൈംഗിക പീഡനത്തിന് വിധേയയാക്കിയെന്നാണ് കേസ്.
മലപ്പുറം: പതിനേഴുകാരിയായ മകളെ പല തവണ ലൈംഗിക പീഡനത്തിന് വിധേയയാക്കിയ പിതാവിന് 44.5 വര്ഷം കഠിന തടവിനും അഞ്ചു ലക്ഷം രൂപ പിഴയും. മഞ്ചേരി അതിവേഗ സ്പെഷ്യല് കോടതിയുടേതാണ് വിധി. എട്ടാം ക്ലാസില് പഠിക്കുന്ന സമയം മുതല് പെണ്കുട്ടിയെ പിതാവ് ലൈംഗിക പീഡനത്തിന് വിധേയയാക്കിയെന്നാണ് അരീക്കോട് പൊലീസ് രജിസ്റ്റര് ചെയ്ത കേസ്. കെട്ടിട നിര്മ്മാണ തൊഴിലാളിയായ പ്രതി തന്റെ കീഴുപറമ്പ് കുനിയിലുള്ള വീട്ടിലെ കിടപ്പുമുറിയില് വച്ചായിരുന്നു മകളെ പീഡിപ്പിച്ചിരുന്നത്. സ്കൂളില് നടന്ന കൗണ്സിലിംഗിലാണ് വര്ഷങ്ങളായുള്ള പീഡനം കുട്ടി വെളിപ്പെടുത്തിയത്.
പിഴ തുക അതിജീവിതക്ക് നല്കണമെന്നും കോടതി വിധിച്ചു. കുട്ടിക്ക് സര്ക്കാരിന്റെ വിക്ടിം കോംപന്സേഷന് ഫണ്ടില് നിന്ന് നഷ്ടപരിഹാരം ലഭ്യമാക്കാന് വേണ്ട നടപടികള് സ്വീകരിക്കുന്നതിന് കോടതി, ജില്ലാ ലീഗല് സര്വ്വീസസ് അതോറിറ്റിക്ക് നിര്ദ്ദേശവും നല്കി. പൊലീസിന്റെ പ്രത്യേക ആവശ്യപ്രകാരം പ്രതിക്ക് കോടതി ജാമ്യം അനുവദിച്ചിരുന്നില്ല. റിമാന്റില് കിടന്ന കാലയളവ് ശിക്ഷയില് ഇളവു ചെയ്യാനും കോടതി വിധിച്ചു. പ്രതിയെ ശിക്ഷയനുഭവിക്കുന്നതിനായി തവനൂര് സെന്ട്രല് ജയിലിലേക്കയച്ചു.
പെണ്കുട്ടിക്ക് പീഡനം: അധ്യാപകന് നാലുവര്ഷം കഠിനതടവ്
മലപ്പുറം: പെരിന്തല്മണ്ണയില് പ്രായപൂര്ത്തിയാകാത്ത പെണ്കുട്ടിയെ ലൈംഗിക അതിക്രമത്തിന് ഇരയാക്കിയ കേസില് സ്കൂള് അധ്യാപകനെ നാലുവര്ഷം കഠിനതടവിനും 50,000 രൂപ പിഴയടക്കുന്നതിനും ശിക്ഷിച്ചു. നെല്ലിക്കുത്ത് ഗവ. ഹയര്സെക്കന്ഡറി സ്കൂള് അധ്യാപകനായ പൂന്താനം കൊണ്ടിപ്പറമ്പ് പൈനാപ്പിള്ളി ജേക്കബ് തോമസി(55)നെയാണ് പെരിന്തല്മണ്ണ അതിവേഗ പ്രത്യേക കോടതി ജഡ്ജി എസ് സൂരജ് ശിക്ഷിച്ചത്. പ്രതി കൊണ്ടിപ്പറമ്പില് നടത്തിയിരുന്ന ട്യൂഷന് സെന്ററില് ക്ലാസിന് വന്നിരുന്ന കുട്ടിയെയാണ് അതിക്രമത്തിനിരയാക്കിയത്. 2019ല് മേലാറ്റൂര് പൊലീസാണ് കേസെടുത്തത്. പോക്സോ വകുപ്പ് പ്രകാരം മൂന്നു വര്ഷം കഠിനതടവും ജുവൈനല് ജസ്റ്റിസ് ആക്ട് പ്രകാരം ഒരു വര്ഷം കഠിനതടവുമാണ് ശിക്ഷ. പിഴയടച്ചില്ലെങ്കില് മൂന്നുമാസം കൂടി തടവ് അനുഭവിക്കണം. ശിക്ഷ ഒന്നിച്ച് അനുഭവിച്ചാല് മതി. പിഴയടക്കുന്ന പക്ഷം അതിജീവിതയ്ക്ക് നല്കും. മേലാറ്റൂര് ഇന്സ്പെക്ടര്മാരായിരുന്ന പിഎം. ഷമീര്, കെറഫീഖ് എന്നിവരാണ് കേസില് കുറ്റപത്രം സമര്പ്പിച്ചത്. പ്രോസിക്യൂഷന് വേണ്ടി സ്പെഷ്യല് പബ്ലിക് പ്രോസിക്യൂട്ടര്പി സപ്ന പരമേശ്വരത്ത് ഹാജരായി.
ആമസോണ് പ്രൈം അംഗത്വം: ആമസോണ് ഉപയോക്താക്കളെ കബളിപ്പിക്കുന്നുവെന്ന് ആരോപണം, കേസ്
ഏഷ്യാനെറ്റ് ന്യൂസ് ലെെവ് കാണാം...
