വൈകുന്നേരം സ്കൂളില് നിന്നും വീട്ടിലേക്ക് പോകുമ്പോള് വഴിയില് വച്ചായിരുന്നു ഇയാള് കുട്ടിയെ ശല്യപ്പെടുത്തിയത്.
ആലപ്പുഴ: അഞ്ചാം ക്ലാസില് പഠിക്കുന്ന കുട്ടിയെ ശല്യപ്പെടുത്തിയ സംഭവത്തില് ബീഹാര് സ്വദേശി പിടിയില്. ബീഹാര് കോങ്ങ് വാഹ് സ്വദേശി കുന്തന്കുമാറി(27)നെ വള്ളികുന്നം പൊലീസാണ് അറസ്റ്റ് ചെയ്തത്. കഴിഞ്ഞ ദിവസം വൈകുന്നേരം സ്കൂളില് നിന്നും വീട്ടിലേക്ക് പോകുമ്പോള് വഴിയില് വച്ചായിരുന്നു ഇയാള് കുട്ടിയെ ശല്യപ്പെടുത്തിയത്. കുട്ടിയുടെ കരച്ചില് കേട്ടു വന്ന നാട്ടുകാരാണ് യുവാവിനെ പിടികൂടി വള്ളികുന്നം പൊലീസിനെ ഏല്പ്പിക്കുകയായിരുന്നു. ഒരു മാസം മുന്പാണ് ഇയാള് ബിഹാറില് പ്രദേശത്തെത്തിയത്. ഇലിപ്പക്കുളത്തുള്ള കണ്സ്ട്രക്ഷന് കമ്പനിയില് കെട്ടിട നിര്മാണ തൊഴിലാളിയാണ് കുന്തന്കുമാറെന്ന് പൊലീസ് അറിയിച്ചു.
വള്ളികുന്നം സര്ക്കിള് ഇന്സ്പക്ടര് എംഎം ഇഗ്ന്യേഷ്യസ്, എസ്ഐമാരായ അജിത്ത് കെവി, ആര് രാജീവ്, സിപിഒ അനില്, ഷൈബു തുടങ്ങിയവരുടെ സംഘമാണ് പ്രതിയെ അറസ്റ്റ് ചെയ്തത്. കുന്തന്കുമാറിനെ കായംകുളം ഫസ്റ്റ് ക്ലാസ് മജിസ്ട്രേറ്റ് കോടതിയില് ഹാജരാക്കി റിമാന്ഡ് ചെയ്തു.
കൊലപാതക, പോക്സോ കേസുകളിലെ പ്രതിയെ സാഹസികമായി പിടികൂടി പൊലീസ്
തൃശൂര്: ആളൂരില് നിരവധി ക്രിമിനല് കേസുകളിലെ പ്രതിയെ പൊലീസ് പിടികൂടി. കൊലപാതക ശ്രമത്തിലും, പോക്സോ കേസുകളിലും പ്രതിയായ ആളൂര് പൊരുന്നംകുന്ന് സ്വദേശി തറയില് വീട്ടില് കരുമാടി അരുണിനെയാണ് (32 ) റൂറല് എസ്പി ഐശ്വര്യ ഡോങ്ങ്ഗ്രേയുടെ നിര്ദേശത്താല് ഇരിങ്ങാലക്കുട ഡിവൈഎസ്പി ഷൈജു ടി കെയും ആളൂര് ഇന്സ്പെക്ടര് കെ സി രതീഷും ക്രൈം സ്ക്വാഡും ചേര്ന്ന് സാഹസികമായി പിടികൂടിയത്.
മൊബൈല് ഫോണ് ഉപയോഗിക്കാതെ ഇടയ്ക്കിടെ ഒളിത്താവളങ്ങള് മാറ്റി പല സ്ഥലത്തായി താമസിച്ചു വരികയായിരുന്നു അരുണ്. ബുധനാഴ്ച പുലര്ച്ചെ പുതിയ ഒളിത്താവളം അന്വേഷിച്ചെത്തിയ പൊലീസ് സംഘം സ്ഥലത്ത് നായ്ക്കളുടെ ശല്യമുള്ളതിനാല് ഏറെനേരം പതുങ്ങിയിരുന്ന് തന്ത്രപരമായി താമസസ്ഥലത്തിനുള്ളിലേക്ക് കടക്കുകയായിരുന്നു. എന്നാല് ഉടുമുണ്ട് ഊരി കൈയില് പിടിച്ച് അപ്രതീക്ഷിതമായി എഴുന്നേറ്റ് ഓടിയ ഇയാളെ രക്ഷപ്പെടും മുമ്പ് പൊലീസ് സംഘം സാഹസികമായാണ് പിടികൂടിയത്. ചാലക്കുടി ജുഡീഷ്യല് ഫസ്റ്റ് ക്ലാസ് കോടതിയും അതിവേഗ പോക്സോ കോടതിയും ഇയാള്ക്കെതിരെ വാറണ്ട് പുറപ്പെടുവിച്ചിട്ടുണ്ട്. ആളൂരിലെ കൂട്ട ബലാത്സംഗ കേസില് മൂന്നുകേസുകളില് ഇയാള് പ്രതിയാണ്. കൂടാതെ കൊലപാതകശ്രമം, വാഹനം കത്തിക്കല് അടക്കം ഏഴു കേസുകള് ആളൂര് സ്റ്റേഷനില് ഇയാള്ക്കുണ്ട്. ചാലക്കുടി, കൊടകര, ആളൂര്, പുത്തന്വേലിക്കര സ്റ്റേഷനുകളിലടക്കം പന്ത്രണ്ടോളം ക്രിമിനല് കേസുകളിലെ പ്രതിയാണ് അരുണ് എന്ന് പൊലീസ് അറിയിച്ചു.
