ഓരോ സീസണിലും തികച്ചും വ്യത്യസ്തങ്ങളായ കുറ്റാന്വേഷണ കഥകള്
മലയാളത്തില് തങ്ങളുടെ ആദ്യ വെബ് സിരീസുമായി പ്രമുഖ ഒടിടി പ്ലാറ്റ്ഫോം ആയ ഡിസ്നി പ്ലസ് ഹോട്ട്സ്റ്റാര്. കേരള ക്രൈം ഫയല്സ് എന്നു പേരിട്ടിരിക്കുന്ന സിരീസ് പേര് സൂചിപ്പിക്കുന്നതുപോലെ കുറ്റകൃത്യങ്ങളുടെ പശ്ചാത്തലത്തിലുള്ളതാണ്. മലയാളത്തിലെ ഏറ്റവും വലിയ വെബ് സിരീസ് എന്ന് അണിയറക്കാര് വിശേഷിപ്പിക്കുന്ന സിരീസിന്റെ ഓരോ സീസണിലും തികച്ചും വ്യത്യസ്തങ്ങളായ കുറ്റാന്വേഷണ കഥകളാവും പ്രേക്ഷകര്ക്ക് മുന്നിലേക്ക് എത്തുക. പൂര്ണ്ണമായും കേരളീയ പശ്ചാത്തലത്തിലാണ് ഓരോ കഥകളും അവതരിപ്പിക്കുക.
സിരീസിന്റെ ആദ്യ സീസണില് അജു വര്ഗീസും ലാലുമാണ് പ്രധാന കഥാപാത്രങ്ങളെ അവതരിപ്പിക്കുക. ഉദ്വേഗജനകമായ കുറ്റാന്വേഷണ കഥയ്ക്കൊപ്പം പ്രേക്ഷകരെ ആവേശത്തിലേക്കുയര്ത്തുന്ന വേറിട്ട അഭിനയ മുഹൂര്ത്തങ്ങളും നിറയുന്നതാണ് ആദ്യ സീസണെന്ന് അണിയറക്കാരുടെ വാക്ക്. സംവിധായകന് രാഹുല് റിജി നായര് (ഫസ്റ്റ് പ്രിന്റ് സ്റ്റുഡിയോസ്) പ്രൊഡക്ഷന് ചുമതല നിര്വ്വഹിക്കുന്ന ഈ വെബ് സീരീസ് സംവിധാനം ചെയ്യുന്നത് യുവ സംവിധായകരില് ശ്രദ്ധേയനായ അഹമ്മദ് കബീറാണ്. ജൂണ്, മധുരം എന്നീ സിനിമകളിലൂടെ ശ്രദ്ധ നേടിയ സംവിധായകനാണ് അഹമ്മദ് കബീര്.
തിരക്കഥ ആഷിഖ് അയ്മര്, ഛായാഗ്രഹണം ജിതിന് സ്റ്റാനിസ്ലസ്, സംഗീതം ഹിഷാം അബ്ദുള് വഹാബ്, പ്രൊഡക്ഷന് ഡിസൈന് പ്രതാപ് രവീന്ദ്രന്, എഡിറ്റിംഗ് മഹേഷ് ഭുവനേന്ദര്. ഒരു സംവിധായകനെന്ന നിലയില് പറയുകയാണെങ്കില് വെബ് സീരീസുകളുടെ സമയം കൂടുതല് സ്വാതന്ത്ര്യം നല്കുന്നതാണ്. കഥാപാത്രങ്ങളുടെ വ്യത്യസ്ത മാനസികതലങ്ങള് നിശ്ചിത സമയത്തില് ചുരുക്കാതെ, കൂടുതല് വിശദമായി അവതരിപ്പിച്ച് കഥ ആഴത്തില് പറയാന് സഹായിക്കുന്നു അത്, അഹമ്മദ് കബീര് പറയുന്നു. ഡിസ്നി പ്ലസ് ഹോട്ട്സ്റ്റാറിന്റെ മലയാളത്തിലെ ആദ്യത്തെ ഒറിജിനല് വെബ് സീരീസ് എന്ന നിലയില് പ്രൊഡക്ഷന് വാല്യുവിലും ക്വാളിറ്റിയിലും യാതൊരു വിട്ടുവീഴ്ചയും ചെയ്യാതെയാണ് കേരള ക്രൈം ഫയല്സ് ഒരുക്കിയിരിക്കുന്നത്. കഥ നടക്കുന്നത് കേരളത്തിന്റെ പശ്ചാത്തലത്തിലാണെങ്കിലും കേരള ക്രൈം ഫയല്സിന്റെ മേക്കിംഗും സ്റ്റോറി ടെല്ലിംഗും ഇന്ത്യയിലെ പ്രശസ്തമായ വെബ് സീരീസുകളോട് കിടപിടിക്കുന്ന രീതിയിലുള്ളതാണ്, പ്രൊഡ്യൂസര് രാഹുല് റിജി നായര് പറഞ്ഞു.
