'മല്ലിപ്പൂ', എ ആര് റഹ്മാന്റെ സംഗീതത്തില് 'വെന്ത് തനിന്തതു കാടി'ലെ ഗാനം
ഗൗതം വാസുദേവ് മേനോന്റെ സംവിധാനത്തില് ചിമ്പു നായകനാകുന്ന ചിത്രത്തിലെ ഗാനം.
തമിഴകം ആകാംക്ഷയോടെ കാത്തിരിക്കുന്ന പുത്തൻ ചിത്രമാണ് 'വെന്ത് തനിന്തതു കാട്'. ഗൗതം വാസുദേവ് മേനോന്റെ സംവിധാനത്തില് ചിമ്പു നായകനാകുമ്പോള് പ്രതീക്ഷകള് വര്ദ്ധിക്കുക സ്വാഭാവികം. ട്രെയിലറിന് വലിയ വരവേല്പ് ലഭിച്ചിരുന്നു. ഇപ്പോഴിതാ ചിമ്പു ചിത്രത്തിലെ ഒരു ഗാനത്തിന്റെ ലിറിക്കല് വീഡിയോ പുറത്തുവിട്ടിരിക്കുകയാണ്.
'മല്ലിപ്പൂ' എന്ന മനോഹരമായ ഒരു ഗാനത്തിന്റ ലിറിക്കല് വീഡിയോ ആണ് പുറത്തുവിട്ടിരിക്കുന്നത്. എ ആര് റഹ്മാൻ ആണ് സംഗീത സംവിധായകൻ. 'മറക്കുമാ നെഞ്ചം' എന്ന ഗാനത്തിന്റെ ലിറിക്കല് വീഡിയോ ചിത്രത്തിലേതായി നേരത്തെ പുറത്തുവിട്ടത് ആരാധകര് ഏറ്റെടുത്തിരുന്നു. 'വെന്ത് തനിന്തത് കാടി'ന് രണ്ടാം ഭാഗം ഉണ്ടാകുമെന്ന് വിവിധ വാര്ത്താവൃത്തങ്ങളെ അടിസ്ഥാനമാക്കി സിനിമാ എക്സ്പ്രസ് റിപ്പോര്ട്ട് ചെയ്തിട്ടുണ്ട്.
ഡീഗ്ലാമറൈസ്ഡ് ഗെറ്റപ്പിലാണ് ചിമ്പു ചിത്രത്തില് അഭിനയിച്ചിരിക്കുന്നത്. വേല്സ് ഫിലിം ഇന്റര്നാഷണലിന്റെ ബാനറില് ഡോ: ഇഷാരി കെ ഗണേഷ് നിര്മ്മിക്കുന്ന ചിത്രത്തില് മലയാളി താരം നീരജ് മാധവും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. റൊമാന്റിക് ഡ്രാമകള്ക്കായാണ് ചിമ്പുവും ഗൗതം വാസുദേവ മേനോനും മുന്പ് ഒരുമിച്ചതെങ്കില് റൂറല് ഡ്രാമ-ത്രില്ലര് ആണ് പുതിയ ചിത്രം. ഭാരതിയാറുടെ 'അഗ്നികുഞ്ജൊണ്ഡ്രു കണ്ടേന്' എന്നാരംഭിക്കുന്ന കവിതയിലെ വരികളില് നിന്നാണ് ഗൗതം വാസുദേവ മേനോന് സിനിമയ്ക്ക് പേര് കണ്ടെത്തിയിരിക്കുന്നത്. 'ഉറിയടി' എന്ന തമിഴ് ചിത്രത്തിലെ ഗാനത്തിലും ഈ കവിത ഉപയോഗിച്ചിരുന്നു. സെപ്റ്റംബര് 15ന് ആണ് ചിത്രം റിലീസ് ചെയ്യുക. ഉദയനിധി സ്റ്റാലിന്റെ റെഡ് ജിയാന്റ് മൂവീസ് ആണ് ചിത്രം വിതരണം ചെയ്യുക.
ചിമ്പുവിന്റേതായി ഏറ്റവും ഒടുവില് റിലീസായ ചിത്രം 'മഹാ' ആണ്. ഹന്സിക മൊട്വാനി പ്രധാന കഥാപാത്രമായ ചിത്രത്തില് ചിമ്പു എക്സ്റ്റന്റ് കാമിയോ ആയിട്ടായിരുന്നു എത്തിയത്. യു ആര് ജമീലാണ് ചിത്രം സംവിധാനം ചെയ്തത്. ജെ ലക്ഷ്മണ് ആണ് ചിത്രത്തിന്റെ ഛായാഗ്രാഹണം നിര്വഹിച്ചത്.
Read More : ബോളിവുഡിനെ കരകയറ്റാൻ 'ബ്രഹ്മാസ്ത്ര', ഒരു ലക്ഷത്തിലധികം ടിക്കറ്റുകള് വിറ്റു