മോൺസ്റ്ററിലെ പ്രധാന ആകർഷണങ്ങളിൽ ഒന്നായിരുന്നു ഈ ‘ഗൂം ഗൂം’പാട്ട്.
മലയാളികൾ ഏറെ ആകാംക്ഷയോടെ കാത്തിരുന്ന മോഹൻലാൽ ചിത്രമാണ് 'മോൺസ്റ്റർ'. പുലിമുരുകൻ എന്ന സൂപ്പർ ഹിറ്റ് ചിത്രത്തിന് ശേഷം വൈശാഖും മോഹൻലാലും ഒന്നിച്ച ചിത്രം പ്രേക്ഷകരുടെ പ്രതീക്ഷകൾ കാത്തുവെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. റിലീസിന് മുൻപെ തന്നെ തരംഗം തീർത്ത ചിത്രത്തിലെ ഗാനമായിരുന്നു ‘ഗൂം ഗൂം’. ട്രെന്റിങ്ങിൽ ഇടംപിടിച്ച ഗാനത്തിന് ചുവടുവച്ച് നിരവധി പേരാണ് രംഗത്തെത്തിയത്. ഇപ്പോഴിതാ ഗാനരംഗത്തിന്റെ ലൊക്കേഷൻ വീഡിയോയാണ് പുറത്തു വന്നിരിക്കുന്നത്.
പ്രസന്ന മാസ്റ്റർ ആയിരുന്നു ഗാനത്തിന്റെ കൊറിയോഗ്രഫി. അദ്ദേഹം തന്നെയാണ് തന്റെ സോഷ്യൽ മീഡിയ വഴി വീഡിയോ പുറത്തുവിട്ടിരിക്കുന്നത്. ഇങ്ങനെയാണ് ഞങ്ങളുടെ പാട്ടിന് പാക്കപ്പ് പറഞ്ഞതെന്നാണ് വീഡിയോ പങ്കുവച്ച് പ്രസന്ന മാസ്റ്റർ കുറിച്ചത്. വൈശാഖും സുദേവും ഹണി റോസും ഉൾപ്പടെയുള്ളവർ മോഹൻലാലിനൊപ്പം ചുവടുവയ്ക്കുന്നത് വീഡിയോയിൽ കാണാവുന്നതാണ്.
ദീപക് ദേവ് സംഗീതം നൽകിയ ഗാനത്തിന്റെ മലയാളം വരികൾ ഹരി നാരായണൻ എഴുതിയപ്പോൾ തനിഷ്ക് നബർ ആണ് ഹിന്ദി ഭാഗം രചിച്ചത്. പ്രകാശ് ബാബു, അലി കുലി മിർസ, സിയ ഉൾ ഹാദ് എന്നിവർ ചേർന്നാണ് ഗാനം ആലപിച്ചിരിക്കുന്നത്. മോൺസ്റ്ററിലെ പ്രധാന ആകർഷണങ്ങളിൽ ഒന്നായിരുന്നു ഈ ‘ഗൂം ഗൂം’പാട്ട്. റിലീസ് ചെയ്ത ദിനം മുതല് ശ്രദ്ധപിടിച്ചുപറ്റിയ ഗാനം തിയറ്ററിലും ആവേശമായി മാറിയിരുന്നു.
മലയാളത്തിലെ ആദ്യ 100 കോടി ക്ലബ്ബ് ചിത്രമായിരുന്നു പുലിമുരുകൻ. ഈ ചിത്രത്തിന്റെ തിരക്കഥാകൃത്ത് ഉദയ്കൃഷ്ണ തന്നെയാണ് മോൺസ്റ്ററിന്റെയും രചന. ആശിർവാദ് സിനിമാസ് നിർമ്മിച്ച ചിത്രം, കേരളത്തിൽ മാത്രം 216 സ്ക്രീനുകളിലാണ് കഴിഞ്ഞ ദിവസം റിലീസ് ചെയ്തത്. ലക്കി സിംഗ് എന്ന കഥാപാത്രമായി മോഹൻലാൽ നിറഞ്ഞാടിയ ചിത്രത്തിൽ സിദ്ദിഖ്, ലക്ഷ്മി മഞ്ചു, ഹണി റോസ്, സുദേവ് നായര്, ഗണേഷ് കുമാര്, ലെന തുടങ്ങിയവരും പ്രധാന കഥാപാത്രങ്ങളെ അവതരിപ്പിച്ചിരുന്നു.
സര്പ്രൈസുകളാൽ ഞെട്ടിച്ച് 'മോൺസ്റ്റര്', ക്ലൈമാക്സ് ഫൈറ്റ് ഗംഭീരമെന്ന് പ്രതികരണങ്ങള്
