രജിഷ വിജയന്റെ സ്പോര്ട്സ് ഡ്രാമ; 'ഖോ ഖോ' ഇനി ആമസോണിലും
2017ല് 'ഒറ്റമുറി വെളിച്ചം' എന്ന ചിത്രത്തിലൂടെ മികച്ച ചിത്രത്തിനുള്ള സംസ്ഥാന പുരസ്കാരം നേടിയ സംവിധായകനാണ് രാഹുല് റിജി നായര്.
രജിഷ വിജയനെ പ്രധാന കഥാപാത്രമാക്കി രാഹുല് റിജി നായര് സംവിധാനം ചെയ്ത സ്പോര്ട്സ് ഡ്രാമ ചിത്രം 'ഖോ ഖോ'യുടെ ആമസോണ് പ്രൈമില് പ്രദര്ശനം ആരംഭിച്ചു. സംവിധായകന് രാഹുല് റിജി നായരാണ് ഇക്കാര്യം ഫേസ്ബുക്കിലൂടെ അറിയിച്ചത്.
ആമസോണിന് പുറമെ സൈന പ്ലേ, സിംപളി സൗത്ത്, ഫില്മി എന്നീ ഒടിടി പ്ലാറ്റ്ഫോമുകളിലും ചിത്രം ലഭ്യമാണ്. അതിനാല് ചിത്രത്തിന്റെ വ്യാജ പ്രിന്റ് ഡൗണ്ലോഡ് ചെയ്ത് കാണുകയോ, പ്രചരിക്കുകയോ ചെയ്യരുതെന്ന് സംവിധായകന് പോസ്റ്റില് വ്യക്തമാക്കിയിട്ടുണ്ട്.
കൊവിഡ് രണ്ടാംതരംഗത്തിന്റെ പശ്ചാത്തലത്തില് തിയറ്റര് പ്രദര്ശനം നിര്ത്തിവെക്കേണ്ടിവന്ന ചിത്രമാണിത്.
സ്കൂള് അധ്യാപികയും ഖൊ ഖൊ പരിശീലകയുമാണ് ചിത്രത്തില് രജിഷയുടെ കഥാപാത്രം. 'ഫൈനല്സി'നു ശേഷം രജിഷ അഭിനയിക്കുന്ന സ്പോര്ട്സ് ഡ്രാമയുമാണ് ഇത്.
2017ല് 'ഒറ്റമുറി വെളിച്ചം' എന്ന ചിത്രത്തിലൂടെ മികച്ച ചിത്രത്തിനുള്ള സംസ്ഥാന പുരസ്കാരം നേടിയ സംവിധായകനാണ് രാഹുല് റിജി നായര്. സംവിധായകന് തന്നെ രചനയും നിര്വ്വഹിക്കുന്ന ചിത്രത്തിന്റെ നിര്മ്മാണം ഫസ്റ്റ് പ്രിന്റ് സ്റ്റുഡിയോസ് ആണ്. രജിഷയ്ക്കൊപ്പം മമിത ബൈജു, വെങ്കിടേഷ് വി പി, രഞ്ജിത്ത് ശേഖര് നായര് തുടങ്ങിയവരും പ്രധാന വേഷങ്ങളില് എത്തുന്നു.
കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്സിൻ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യർത്ഥിക്കുന്നു. ഒന്നിച്ച് നിന്നാൽ നമുക്കീ മഹാമാരിയെ തോൽപ്പിക്കാനാവും. #BreakTheChain #ANCares #IndiaFightsCorona