നിവിൻ പോളിയെ നായകനാക്കി റോഷൻ ആൻഡ്രൂസ് സംവിധാനം ചെയ്യുന്ന സിനിമയുടെ ചിത്രീകരണം പൂര്ത്തിയായി.
'സല്യൂട്ടി'ന് ശേഷം റോഷൻ ആൻഡ്രൂസ് സംവിധാനം ചെയ്യുന്ന ചിത്രത്തില് നിവിൻ പോളിയാണ് നായകൻ. മൈസൂരിലാണ് ചിത്രീകരണം നടന്നത്. രണ്ട് മാസം നീണ്ടുനിന്ന ചിത്രീകരണം ഇപ്പോള് പൂര്ത്തിയായിരിക്കുകയാണ്. റോഷൻ ആൻഡ്രൂസ്- നിവിൻ പോളി ചിത്രത്തിന്റെ ചിത്രീകരണം പൂര്ത്തിയായ വിവരം സൈജു കുറുപ്പാണ് അറിയിച്ചിരിക്കുന്നത്.
റോഷൻ ആൻഡ്രൂസ്- നിവിൻ പോളി സിനിമയുടെ ചിത്രീകരണം മൈസൂരില് പൂര്ത്തിയായി. സിനിമ മൈസൂര്, ബാംഗ്ലൂര്, ചിത്രദുര്ഗ, സുന്ദര്, ഹോസ്പേട്ട് എന്നിവടങ്ങളില് ചിത്രീകരിച്ചു. രണ്ട് മാസത്തോളം നീണ്ട ഷൂട്ടിംഗ് യാത്ര ഇന്ന് രാവിലെ അവസാനിച്ചു. ദൈവം അനുഗ്രഹിക്കട്ടെയെന്നുമാണ് സൈജു കുറുപ്പ് ഫേസ്ബുക്കില് എഴുതിയിരിക്കുന്നത്.
വിനായക അജിത്ത് ആണ് ചിത്രത്തിന്റെ നിര്മാണം. അജിത്ത് വിനായക ഫിലിംസിന്റെ ബാനറിലാണ് നിര്മാണം. ഛായാഗ്രാഹണം ആര് ദിവാകര്. സിജു വില്സണ്, അജു വര്ഗീസ്, സാനിയ ഇയ്യപ്പൻ എന്നിവരും ചിത്രത്തില് പ്രധാന കഥാപാത്രങ്ങളെ അവതരിപ്പിക്കുന്നു.
നിവിൻ പോളി നായകനായി 'മഹാവീര്യര്' എന്ന ചിത്രമാണ് ഇനി പ്രദര്ശനത്തിന് എത്താനുള്ളത്. ജൂലൈ 21ന് റിലീസ് ചെയ്യുന്ന ചിത്രത്തില് ആസിഫ് അലിയും പ്രധാന കഥാപാത്രത്തില് എത്തുന്നു. എബ്രിഡ് ഷൈനാണ് ചിത്രം സംവിധാനം ചെയ്തിരിക്കുന്നത്. എബ്രിഡ് ഷൈനിന്റേതാണ് തിരക്കഥയും
കോടതിയിലെ നിയമ വ്യവഹാരങ്ങളുടെ പശ്ചാത്തലത്തില് കഥ പറയുന്ന ചിത്രത്തില് ടൈം ട്രാവലും ഫാന്റസിയുമൊക്കെ കടന്നുവരുന്നുണ്ട്. നര്മ്മ, വൈകാരിക മുഹൂര്ത്തങ്ങള്ക്കും പ്രാധാന്യം നല്കുന്ന ചിത്രമാണിത്. ഏറെ കൗതുകം നിറഞ്ഞ കാഴ്ചകളോടെ ഉള്ളതാണ് ട്രെയിലര്. പ്രമുഖ എഴുത്തുകാരന് എം മുകുന്ദന്റെ കഥയെ ആസ്പദമാക്കിയാണ് എബ്രിഡ് ഷൈന് തിരക്കഥയൊരുക്കിയിരിക്കുന്നത്.
പോളി ജൂനിയർ പിക്ചേഴ്സ്, ഇന്ത്യൻ മൂവി മേക്കർസ് എന്നീ ബാനറുകളിൽ നിവിൻ പോളി, പി എസ് ഷംനാസ് എന്നിവർ ചേർന്നാണ് നിര്മ്മാണം. ലാൽ, ലാലു അലക്സ്, സിദ്ദിഖ്, ഷാൻവി ശ്രീവാസ്തവ, വിജയ് മേനോൻ, മേജർ രവി, മല്ലിക സുകുമാരൻ, സുധീർ കരമന, കൃഷ്ണപ്രസാദ്, പദ്മരാജ് രതീഷ്, സുധീർ പറവൂർ, കലാഭവൻ പ്രജോദ്, പ്രമോദ് വെളിയനാട്, ഷൈലജ പി അമ്പു തുടങ്ങിയവർ മുഖ്യ വേഷങ്ങളിലെത്തുന്നു. വലിയ ക്യാൻവാസിൽ ചിത്രീകരിച്ചിരിക്കുന്ന ഈ ചലച്ചിത്രം പുതിയ കാഴ്ചകൾ സമ്മാനിക്കുന്ന കാമ്പുള്ള ഒന്നായിരിക്കും എന്ന് പ്രവർത്തകർ അവകാശപ്പെടുന്നു. വര്ഷങ്ങൾക്കു ശേഷമാണ് നിവിന് പോളിയും ആസിഫ് അലിയും ഒരുമിച്ച് അഭിനയിക്കുന്നത്. '1983', 'ആക്ഷന് ഹീറോ ബിജു' എന്നീ സൂപ്പർഹിറ്റ് ചിത്രങ്ങള്ക്ക് ശേഷം മൂന്നാം തവണ നിവിന് പോളിയും എബ്രിഡ് ഷൈനും ഒന്നിക്കുന്ന ചിത്രവുമാണ് 'മഹാവീര്യര്'. രാജസ്ഥാനിലും കേരളത്തിലുമായാണ് ചിത്രീകരണം പൂര്ത്തിയാക്കിയത്.
സംസ്ഥാന അവാർഡ് ജേതാവ് ചന്ദ്രു സെൽവരാജ് ആണ് ഛായാഗ്രഹണം. ഇഷാൻ ചാബ്ര സംഗീതവും പശ്ചാത്തല സംഗീതവും ഒരുക്കിയിരിക്കുന്നു. ചിത്ര സംയോജനം മനോജ്, ശബ്ദ മിശ്രണം വിഷ്ണു ഗോവിന്ദ്, ശ്രീ ശങ്കർ, കലാ സംവിധാനം അനീസ് നാടോടി, വസ്ത്രാലങ്കാരം ചന്ദ്രകാന്ത്, മെൽവി ജെ, ചമയം ലിബിൻ മോഹനൻ, മുഖ്യ സഹ സംവിധാനം ബേബി പണിക്കർ, പിആർഒ എ എസ് ദിനേശ്.
Read More : മമ്മൂട്ടിയുടെ 'ഏജന്റ്', പുതിയ പോസ്റ്റര് ശ്രദ്ധ നേടുന്നു
