നാഗചൈതന്യയുടെ നായികയായി സായ് പല്ലവി, താരങ്ങള്‍ക്ക് വൻ പ്രതിഫലം
സായ് പല്ലവി നായികയായെത്തുന്ന പുതിയ ചിത്രത്തില്‍ വൻ പ്രതിഫലം.
നാഗചൈതന്യ നായകനായി വേഷമിടുന്ന പുതിയ ചിത്രത്തില്‍ സായ് പല്ലവിയാണ് നായിക. സംവിധായകൻ ചന്ദൂ മൊണ്ടേടിയുടെ പുതിയ ചിത്രത്തിലാണ് സായ് പല്ലവി നായികയാകുക. ചിത്രത്തില്‍ വമ്പൻ പ്രതിഫലമായിരിക്കും കഥാപാത്രത്തിനായി താരത്തിന് ലഭിക്കുക എന്നാണ് റിപ്പോര്‍ട്ട്. എത്രയാണ് പ്രതിഫലം എന്ന് വ്യക്തമല്ലെങ്കിലും താരത്തിന് ലഭിക്കുന്നത് വലിയ തുകയായിരിക്കും എന്ന റിപ്പോര്‍ട്ടുകള്‍ ചര്‍ച്ചയായിട്ടുണ്ട്.
കീര്‍ത്തി സുരേഷിനെ നായികയായി പരിഗണിച്ച ചിത്രത്തിലാണ് സായ് പല്ലവിക്ക് അവസരം ലഭിച്ചിരിക്കുന്നത്. പെര്‍ഫോമൻസിന് പ്രാധാന്യമുള്ള ഒരു മികച്ച കഥാപാത്രമായിരിക്കും സായ് പല്ലവിയുടേത് എന്നാണ് റിപ്പോര്‍ട്ട്. മത്സ്യത്തൊഴിലാളികളുടെ ജീവിതം പ്രമേയമാക്കി ഒരുങ്ങുന്ന ചിത്രത്തിലാണ് നാഗചൈതന്യയുടെ നായികയായി സായ് പല്ലവി വേഷമിടുന്നത്. നായകനായി എത്തുന്ന നാഗചൈതന്യക്ക് ഏഴ് കോടിയായിരിക്കും പ്രതിഫലം എന്നും ടോളിവുഡ് ഡോട് കോം റിപ്പോര്‍ട്ട് ചെയ്യുന്നു.
പ്രേമം എന്ന ഹിറ്റ് മലയാള ചിത്രത്തിലൂടെ പ്രേക്ഷകരുടെ പ്രിയങ്കരിയായി മാറിയ നായിക സായ് പല്ലവിയും തമിഴിലും ഒരു പ്രധാന വേഷത്തില്‍ എത്താൻ തയ്യാറെടുത്തിരിക്കുകയാണ്. ശിവകാര്‍ത്തികേയൻ നായകനായി വേഷമിടുന്ന പുതിയ ചിത്രത്തിലാണ് സായ് പല്ലവി നായികയാകുന്നത്. എസ്‍കെ 21 എന്ന വിശേഷണപ്പേരുള്ള ചിത്രത്തില്‍ ശിവകാര്‍ത്തികേയൻ വേറിട്ട ലുക്കിലാണ് എത്തുന്നത്. കമല്‍ഹാസന്റെ രാജ് കമല്‍ നിര്‍മിക്കുന്ന ചിത്രമായ എസ്‍കെ 21ന്റെ പ്രധാനപ്പെട്ട ഒരു ലൊക്കേഷൻ കശ്‍മീരാണ്.
നയൻതാരയ്‍ക്ക് പിന്നാലെ സായ് പല്ലവി ബോളിവുഡിലേക്കും എത്തുകയാണ് എന്ന് റിപ്പോര്‍ട്ടുകളും അടുത്തിടെ നടിയുടെ ആരാധകരെ ആവേശത്തിലാക്കിയിരുന്നു. സായ് പല്ലവി ആമിര്‍ ഖാന്റെ മകൻ ജുനൈദ് ഖാന്റെ നായികയായിട്ടാണ് ഹിന്ദിയില്‍ വേഷമിടുകുക. പ്രാധാന്യം സായ് പല്ലവിയുടെ നായിക കഥാപാത്രത്തിനായിരിക്കും എന്നും റിപ്പോര്‍ട്ടുണ്ട്. സംവിധാനം സുനില്‍ പാണ്ഡയാണ്.
Read More: 'നയൻതാരയുടെ പിണക്കം', പ്രതികരിച്ച് ഷാരൂഖ്, സ്‍ക്രീൻ ടൈം കുറഞ്ഞതില്‍ നിരാശ
ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക
