ഇത്തവണത്തെ പൊങ്കല് റിലീസുകളില് ജീവ നായകനായ ട്രിപ്പിള് ടി ജനപ്രീതിയില് അപ്രതീക്ഷിത മുന്നേറ്റം നടത്തുന്നു
തമിഴ് സിനിമയെ സംബന്ധിച്ച് ഏറ്റവും പ്രധാനപ്പെട്ട റിലീസ് സീസണുകളില് ഒന്നാണ് പൊങ്കല്. അതിനാല്ത്തന്നെ തങ്ങളുടെ ചിത്രം പൊങ്കലിന് എത്തിക്കുക എന്നത് നിര്മ്മാതാക്കളും താരങ്ങളുമൊക്കെ വലിയ അഭിമാനത്തോടെയാണ് കാണുന്നത്. എന്നാല് മുന്കൂര് പ്ലാനിംഗ് എല്ലാം തകിടംമറിഞ്ഞ പൊങ്കല് സീസണ് ആയിരുന്നു ഇത്തവണ. സിനിമകളുടെ ജയപരാജയങ്ങളുടെ അപ്രവചനീയത ഒരിക്കല്ക്കൂടി വ്യക്തമായ റിലീസിംഗ് സീസണ് കൂടിയായി മാറി തമിഴ് സിനിമയെ സംബന്ധിച്ച് ഇത്തവണത്തെ പൊങ്കല്. പൊങ്കലിന്റെ പ്രധാന സാന്നിധ്യം ആവേണ്ടിയിരുന്ന വിജയ് ചിത്രം ജനനായകന് സെന്സര് പ്രതിസന്ധിയെത്തുടര്ന്ന് മുടങ്ങിയത് കോളിവുഡിനെ അക്ഷരാര്ഥത്തില് ഞെട്ടിച്ചു. ജനുവരി 9 ന് റിലീസ് പ്ലാന് ചെയ്തിരുന്ന ചിത്രം ഇതുവരെയും പ്രതിസന്ധി തരണം ചെയ്തിട്ടുമില്ല. വന്ന ചിത്രങ്ങളില് ജനപ്രീതി നേടിയതാവട്ടെ ആരും കാര്യമായി ശ്രദ്ധിക്കാതിരുന്ന ഒരു ചിത്രവും.
പൊങ്കല് ക്ലാഷ്
ശിവകാര്ത്തികേയനെ നായകനാക്കി സുധ കൊങ്കര സംവിധാനം ചെയ്ത പരാശക്തി, കാര്ത്തിയെ നായകനാക്കി നളന് കുമാരസാമി സംവിധാനം ചെയ്ത വാ വാത്തിയാര്, ജീവയെ നായകനാക്കി മലയാളി സംവിധായകന് നിതീഷ് സഹദേവ് സംവിധാനം ചെയ്ത തലൈവര് തമ്പി തലൈമയില് (ടിടിടി/ ട്രിപ്പിള് ടി) എന്നിവയാണ് ഇക്കുറി പൊങ്കല് റിലീസ് ആയി എത്തിയ തമിഴ് ചിത്രങ്ങള്. ഇതില് പരാശക്തി ജനുവരി 10 നും വാ വാത്തിയാര് 14 നും ട്രിപ്പിള് ടി 15 നുമാണ് എത്തിയത്. ഇതില് പരാശക്തിയും വാ വാത്തിയാരും സമ്മിശ്ര പ്രതികരണങ്ങള് നേടിയപ്പോള് ജീവ ചിത്രം ജനപ്രീതിയില് ബഹുദൂരം മുന്നിലാണ്.
Related Articles
മികച്ച ഓപണിംഗ് ലഭിച്ചിട്ടും പിന്നീടുള്ള ദിനങ്ങളില് ബോക്സ് ഓഫീസില് വലിയ ഡ്രോപ്പ് ആണ് പരാശക്തിക്ക് ഉണ്ടായത്. എന്നാല് കൂട്ടത്തില് ഏറ്റവുമധികം സ്ക്രീന് കൗണ്ട് ചിത്രത്തിനാണ്. അത് പൊങ്കല് സീസണില് ചിത്രത്തിന് ഗുണകരമാവുന്നുമുണ്ട്. അതേസമയം കുറഞ്ഞ സ്ക്രീന് കൗണ്ട് വച്ചുകൊണ്ട് ടിക്കറ്റ് ബുക്കിംഗ് പ്ലാറ്റ്ഫോമുകളില് കൂടുതല് വില്പ്പന നടത്തുന്നത് ടിടിടി ആണ്. ഈ വാര്ത്ത തയ്യാറാക്കുമ്പോള് ബുക്ക് മൈ ഷോയില് പരാശക്തി മണിക്കൂറില് വില്ക്കുന്നത് 3400 ടിക്കറ്റുകളാണ്. വാ വാത്തിയാര് വില്ക്കുന്നത് 1100 ടിക്കറ്റുകളും. അതേസമയം ഓണ്ലൈന് ടിക്കറ്റ് സെയില്സില് ഈ രണ്ട് ചിത്രങ്ങളെ ബഹുദൂരം പിന്നിലാക്കിക്കൊണ്ടാണ് ട്രിപ്പിള് ടിയുടെ കുതിപ്പ്. ബുക്ക് മൈ ഷോയില് ചിത്രം മണിക്കൂറില് വില്ക്കുന്നത് 6500 ടിക്കറ്റുകള് ആണ്.
എന്നാല് കളക്ഷനില് ഇപ്പോഴും ബഹുദൂരം മുന്നില് പരാശക്തിയാണ്. പ്രമുഖ ട്രാക്കര്മാരായ സാക്നില്കിന്റെ കണക്ക് പ്രകാരം ആഗോള ബോക്സ് ഓഫീസില് നിന്ന് ചിത്രം ഇതിനകം നേടിയിരിക്കുന്നത് 70 കോടിയാണ്. വാ വാത്തിയാര് 7.1 കോടിയും ട്രിപ്പിള് ടി 4.95 കോടിയും സ്വന്തമാക്കിയിട്ടുണ്ട്. വാ വാത്തിയാറിനെ ട്രിപ്പിള് ടി വരും ദിനങ്ങളില് മറികടക്കുമെന്ന് ഉറപ്പാണ്. ഇനി പരാശക്തിയെപ്പോലും വരും ദിനങ്ങളില് ചിത്രം ബോക്സ് ഓഫീസില് വെല്ലുവിളിച്ചാലും അത്ഭുതപ്പെടാനില്ല. ഫാലിമിയിലൂടെ ശ്രദ്ധ നേടിയ നിതീഷ് സഹദേവിന്റെ രണ്ടാം ചിത്രമാണ് അദ്ദേഹത്തിന്റെ തമിഴ് അരങ്ങേറ്റവുമായത്. നിതീഷിനും കരിയറില് വലിയ നേട്ടമാവും ഈ വിജയം.
