ഗീതു മോഹൻദാസ് സംവിധാനം ചെയ്യുന്ന യഷിന്റെ 'ടോക്സിക്' എന്ന ചിത്രത്തിലെ 'ടിക്കറ്റ്' എന്ന പുതിയ ലുക്ക് തരംഗമായി. ക്ലീൻ ഷേവ് ലുക്കിലുള്ള ഈ കഥാപാത്രം, യഷ് ഇരട്ടവേഷത്തിലാണോ എന്ന ചർച്ചകൾക്ക് വഴിവെച്ചു.
ടോക്സിക്: എ ഫെയറി ടെയിൽ ഫോർ ഗ്രോൺ അപ്സ്' (Toxic: A Fairy Tale For Grown Ups) വീണ്ടും സോഷ്യൽ മീഡിയയിൽ തരംഗം സൃഷ്ടിക്കുന്നു. റോക്കിംഗ് സ്റ്റാർ യഷിന്റെ തീർത്തും വേറിട്ടൊരു ലുക്ക് പുറത്തുവിട്ടുകൊണ്ടാണ് ആരാധകരെ അമ്പരപ്പിച്ചിരിക്കുന്നത്. ചിത്രത്തിലെ യഷിന്റെ രണ്ടാമത്തെ കഥാപാത്രമായ 'ടിക്കറ്റ്' (Ticket) എന്ന ലുക്കാണ് ഇപ്പോൾ പുറത്തുവിട്ടിരിക്കുന്നത്. 'ടിക്കറ്റ് ടു ഹെൽ' എന്ന ടാഗ്ലൈനോടെ എത്തിയ ഈ ക്ലീൻ ഷേവൻ ലുക്ക്, ചിത്രത്തിൽ യഷ് ഇരട്ട വേഷത്തിലാണോ എത്തുന്നതെന്ന ചർച്ചകൾക്ക് വഴിതുറന്നിരിക്കുകയാണ്.
നേരത്തെ പുറത്തുവിട്ട 'രായ' (Raya) എന്ന ക്യാരക്ടർ പോസ്റ്റിന് ആരാധകർക്കിടയിൽ വൻ സ്വീകാര്യതയാണ് ലഭിച്ചത്. ഫാൻ ആർട്ടുകളിലും റീലുകളിലും ആ ലുക്ക് തരംഗമായിരുന്നു. ഇപ്പോൾ ക്ലീൻ ഷേവൻ ലുക്കിലുള്ള രണ്ടാമത്തെ ഭാവവും ചരിത്രം ആവർത്തിക്കാൻ ഒരുങ്ങുകയാണ്. ടീസറിലെ യഷിന്റെ ഈ രൂപമാറ്റം ലോകമെമ്പാടുമുള്ള സിനിമാപ്രേമികൾക്കിടയിൽ വലിയ ആവേശമാണ് ഉണ്ടാക്കിയിരിക്കുന്നത്.
ചിത്രത്തിന്റെ ടീസറിന് ലഭിച്ച പ്രതികരണം സ്ഫോടനാത്മകമാണ്. ഇന്ത്യയുൾപ്പെടെ ഒൻപത് രാജ്യങ്ങളിൽ ടീസർ യൂട്യൂബിൽ ട്രെൻഡിംഗായി. 1 മിനിറ്റ് 56 സെക്കൻഡ് ദൈർഘ്യമുള്ള ടീസർ ഓരോ ഫ്രെയിം ബൈ ഫ്രെയിമായി വിശകലനം ചെയ്യുകയാണ് ആരാധകർ. ടൈംലൈനുകൾ, വ്യത്യസ്ത കാലഘട്ടങ്ങൾ, രണ്ട് കഥാപാത്രങ്ങൾ തമ്മിലുള്ള ബന്ധം എന്നിവയെക്കുറിച്ച് സോഷ്യൽ മീഡിയയിൽ സജീവമായ ചർച്ചകൾ നടക്കുന്നു. വെറും രണ്ട് മിനിറ്റിനുള്ളിൽ തന്നെ വലിയൊരു സിനിമാറ്റിക് ചർച്ചയ്ക്ക് വഴിതുറക്കാൻ 'ടോക്സിക്കിന്' സാധിച്ചു.
Related Articles
തമിഴ് മേഖലകൾ, ശ്രീലങ്ക, സിംഗപ്പൂർ, മലേഷ്യ തുടങ്ങിയ രാജ്യങ്ങളിലും വലിയ ആകാംഷയും ആവേശവുമാണ് ടീസർ ഉണ്ടാക്കിയിരിക്കുന്നത്. ഹിന്ദി ബെൽറ്റിലും ഒമാൻ, സൗദി അറേബ്യ, കുവൈറ്റ്, ബംഗ്ലാദേശ്, ബഹ്റൈൻ എന്നിവിടങ്ങളിലും ചിത്രം ചർച്ചാവിഷയമാണ്. കേരളം ഉൾപ്പെടെയുള്ള ഇന്ത്യൻ സംസ്ഥാനങ്ങളിലും ടീസർ ട്രെൻഡിംഗിൽ ഒന്നാമതായി തുടരുന്നു.
തന്റെ ഐകോണിക് താടി ഉപേക്ഷിച്ചുകൊണ്ടുള്ള യഷിന്റെ 'ടിക്കറ്റ്' എന്ന അവതാരം ആരാധകരെ അക്ഷരാർത്ഥത്തിൽ അമ്പരപ്പിച്ചു. ചാർമിങ് ആയതും എന്നാൽ ഭയപ്പെടുത്തുന്നതുമായ ഈ പുതിയ ലുക്ക് കഥാപാത്രങ്ങളുടെ നിഗൂഢത വർദ്ധിപ്പിക്കുന്നു. ടീസർ പുറത്തിറങ്ങി 24 മണിക്കൂറിനുള്ളിൽ 197 ദശലക്ഷം വ്യൂസാണ് സ്വന്തമാക്കിയത്. പ്രത്യേകിച്ചും ടീസറിന്റെ അവസാന 20 സെക്കൻഡുകൾ പ്രേക്ഷകരെ ഞെട്ടിച്ചിരിക്കുകയാണ്.
യഷും ഗീതു മോഹൻദാസും ചേർന്നാണ് ചിത്രത്തിന് രചന നിർവ്വഹിച്ചിരിക്കുന്നത്. ഗീതു മോഹൻദാസ് സംവിധാനം ചെയ്യുന്ന 'ടോക്സിക്' ഒരേസമയം കന്നഡയിലും ഇംഗ്ലീഷിലുമാണ് ചിത്രീകരിച്ചിരിക്കുന്നത്. മലയാളം, തമിഴ്, തെലുങ്ക്, ഹിന്ദി തുടങ്ങിയ ഭാഷകളിൽ ഡബ്ബ് ചെയ്ത് ചിത്രം ആഗോളതലത്തിൽ റിലീസ് ചെയ്യും. കെവിഎൻ പ്രൊഡക്ഷൻസിന്റെയും മോൺസ്റ്റർ മൈൻഡ് ക്രിയേഷൻസിന്റെയും ബാനറിൽ വെങ്കട്ട് കെ. നാരായണനും യഷും ചേർന്നാണ് ചിത്രം നിർമ്മിക്കുന്നത്. 2026 മാർച്ച് 19-ന് ചിത്രം തിയേറ്ററുകളിൽ എത്തും.
