വി കെ പ്രകാശിന്റെ സംവിധാനത്തില്‍ അനുപം ഖേര്‍, ഹിന്ദി ചിത്രം പ്രഖ്യാപിച്ചു
വി കെ പ്രകാശിന്റെ പുതിയ ചിത്രത്തില്‍ അനുപം ഖേര്‍.
വി കെ പ്രകാശ് സംവിധാനം ചെയ്യുന്ന പുതിയ സിനിമ പ്രഖ്യാപിച്ചു. ഹിന്ദിയിലാണ് വി കെ പ്രകാശ് പുതിയ സിനിമ സംവിധാനം ചെയ്യുന്നത്. വി കെ പ്രകാശ് തന്നെയാണ് ഇക്കാര്യം സാമൂഹ്യ മാധ്യമങ്ങളിലൂടെ അറിയിച്ചത്. 'കാഗസ് 2' എന്ന ചിത്രമാണ് വി കെ പ്രകാശ് സംവിധാനം ചെയ്യുക.
സതിഷ് കൗശിക് സംവിധാനം ചെയ്‍ത ചിത്രമായ 'കാഗസി'ന്റെ രണ്ടാം ഭാഗമാണ് ഇത്. പങ്കജ് ത്രിപാതി നായകനായി അഭിനയിച്ച ചിത്രം 2021ലാണ് പ്രദര്‍ശനത്തിന് എത്തിയത്. അനു മൂത്തേടത്താണ് ചിത്രത്തിന്റ രണ്ടാം ഭാഗത്തിന്റെ ഛായാഗ്രാഹകൻ. അനുപം ഖേര്‍, ദര്‍ശൻ കുമാര്‍, സ്‍മൃതി കര്‍ല, സതിഷ് കൗശിക്, നീന ഗുപ്‍ത എന്നിവര്‍ പ്രധാന താരങ്ങളായി എത്തുന്നു.
നിഷാന്ത് കൗശികാണ് ചിത്രത്തിന്റെ നിര്‍മാണം. ദ സതിഷ് കൗശിക് എന്റര്‍ടെയ്ൻമെന്റിന്റെ ബാനറിലാണ് ചിത്രത്തിന്റെ നിര്‍മാണം. ജയന്ത് ദേശ്‍മുഖാണ് പ്രൊഡക്ഷൻ ഡിസൈനര്‍. അമിത് ആര്‍ സോണി ആണ് ചിത്രത്തിന്റെ എക്സിക്യുട്ടീവ് പ്രൊഡ്യൂസര്‍.
'ഒരുത്തീ' എന്ന ചിത്രമാണ് വി കെ പ്രകാശിന്റെ സംവിധാനത്തില്‍ ഏറ്റവും ഒടുവില്‍ പ്രദര്‍ശനത്തിന് എത്തിയത്. നവ്യാ നായരായിരുന്നു ചിത്രത്തില്‍ നായികയായത്. 'ഒരുത്തീ' എന്ന ചിത്രത്തിലെ അഭിനയത്തിിന് ജെ സി ഡാനിയല്‍ ഫൗണ്ടേഷൻ അവാര്‍ഡ് നവ്യാ നായര്‍ക്ക് ലഭിച്ചിരുന്നു. സൈജു കുറുപ്പ്, കെപിഎസി ലളിത, കലാഭവൻ ഹനീഫ്, മാളവിക മേനോൻ, മുകുന്ദൻ, ശ്രീദേവി വര്‍മ തുടങ്ങി ഒട്ടേറെ താരങ്ങള്‍ ചിത്രത്തില്‍ അഭിനയിച്ചു. കെ വി അബ്‍ദുള്‍ നാസറായിരുന്നു ചിത്രം നിര്‍മിച്ചത്. ജിംഷി ഖാലിദ് ആയിരുന്നു ചിത്രത്തിന്റെ ഛായാഗ്രാഹണം നിര്വഹിച്ചത്. ഗോപി സുന്ദര്‍ ആയിരുന്നു ചിത്രത്തിന്റെ സംഗീത സംവിധാനം നിര്വഹിച്ചത്.
Read More: നടൻ ധനുഷിന്റെ സംവിധാനത്തില്‍ പ്രധാന കഥാപാത്രമായി കാളിദാസ് ജയറാമും
