വിജയ് നായകനായ മാസ്റ്ററിന്റെ വന് വിജയത്തിനു ശേഷം ലോകേഷ് കനകരാജ് സംവിധാനം ചെയ്യുന്ന ചിത്രം
സമീപകാലത്ത് ഇത്രയും വലിയ താരനിര ഒരുമിച്ച് അണിനിരന്ന ഒരു ചിത്രം ഇന്ത്യന് സിനിമയില് തന്നെ വേറെയില്ല, വിക്രം (Vikram) പോലെ. ബിഗ് ബോസ് മലയാളം വേദിയില് കഴിഞ്ഞ വാരാന്ത്യത്തില് അതിഥിയായി എത്തിയപ്പോള് കമല് ഹാസന് പ്രധാനമായി പറഞ്ഞതും ഈ പ്രത്യേകതയെക്കുറിച്ചായിരുന്നു. കമല് ഹാസനൊപ്പം ഫഹദ് ഫാസില്, വിജയ് സേതുപതി, നരെയ്ന്, കാളിദാസ് ജയറാം, ചെമ്പന് വിനോദ് എന്നിവരൊക്കെ പ്രധാന കഥാപാത്രങ്ങളെ അവതരിപ്പിക്കുന്ന ചിത്രത്തില് സൂര്യ (Suriya) ഒരു അതിഥിവേഷത്തില് എത്തും എന്നത് ഔദ്യോഗിക പ്രഖ്യാപനത്തിനു മുന്പേ ആരാധകര്ക്കിടയില് പ്രചരിച്ചിരുന്ന ഒന്നാണ്. ട്രെയ്ലര് ലോഞ്ച് വേദിയില് കമല് ഹാസന് സൂര്യയ്ക്ക് നന്ദി പറഞ്ഞതോടെ ആരാധകര് ഇത് ഉറപ്പിച്ചു. പിന്നീട് ലോകേഷ് കനകരാജും ഇക്കാര്യം ഔദ്യോഗികമായി അറിയിച്ചു.
സിനിമാപ്രേമികള്ക്കിടയില് ട്രെന്ഡ് സെറ്റര് ആയ ട്രെയ്ലറില് സൂര്യയുടെ മുഖം ഉണ്ടായിരുന്നില്ലെങ്കിലും ചില ഫ്രെയ്മുകളില് അദ്ദേഹത്തിന്റെ സാന്നിധ്യം ഉണ്ടെന്ന് സ്ക്രീന് ഷോട്ടുകള് സഹിതം ആരാധകര് കണ്ടെത്തിയിരുന്നു. എന്നാല് മറ്റു കഥാപാത്രങ്ങളുടെ ക്യാരക്ടര് പോസ്റ്ററുകള് പുറത്തുവിട്ടിരുന്നെങ്കിലും സൂര്യയുടേത് അത്തരത്തില് വിട്ടിരുന്നില്ല. ഇപ്പോഴിതാ ചിത്രം ഇറങ്ങാന് ഒരു ദിവസം മാത്രം ശേഷിക്കെ സൂര്യയുടെ ലുക്കും പുറത്തുവിട്ടിരിക്കുകയാണ് അണിയറക്കാര്. ചെമ്പന് മുടിയും കാതില് കടുക്കനുമാണ് പോസ്റ്ററിലെ കഥാപാത്രത്തിന്. എന്നാല് മറ്റു ക്യാരക്ടര് പോസ്റ്ററുകളില് നിന്ന് വിഭിന്നമായി ഈ കഥാപാത്രത്തിന്റെ പേര് അണിയറക്കാര് പുറത്തുവിട്ടിട്ടില്ല.
അതേസമയം ജൂണ് 3ന് ആണ് ചിത്രത്തിന്റെ റിലീസ്. പ്രീ റിലീസ് ടിക്കറ്റ് ബുക്കിംഗിന് മികച്ച പ്രതികരണമാണ് എല്ലാ മാര്ക്കറ്റുകളിലും നിന്ന് ലഭിക്കുന്നത്. ചിത്രത്തിന്റെ ഒടിടി റൈറ്റ്സ് സ്വന്തമാക്കിയിരിക്കുന്നത് ഡിസ്നി പ്ലസ് ഹോട്ട്സ്റ്റാര് ആണ്. ചിത്രം ഇതിനകം നേടിയിട്ടുള്ള വന് പ്രീ- റിലീസ് ഹൈപ്പ് ഒരു അവസരമായി കണ്ട് മികച്ച പ്രതിഫലമാണ് ഡിസ്നി നല്കിയിരിക്കുന്നത്. ഒടിടി റൈറ്റ്സിലൂടെത്തന്നെ ചിത്രം 100 കോടി ക്ലബ്ബില് ഇടംപിടിച്ചിരിക്കുന്നു എന്നാണ് വിവരം. ചിത്രത്തിന്റെ അഞ്ച് ഭാഷകളിലെയും ഒടിടി, സാറ്റലൈറ്റ് അവകാശം ഡിസ്നിക്കാണ്.
ALSO READ : നടി ഷംന കാസിം വിവാഹിതയാവുന്നു; വരന് ഷാനിദ് ആസിഫ് അലി
വിജയ് നായകനായ മാസ്റ്ററിന്റെ വന് വിജയത്തിനു ശേഷം ലോകേഷ് കനകരാജ് സംവിധാനം ചെയ്യുന്ന ചിത്രം എന്നതും വിക്രത്തെക്കുറിച്ചുള്ള പ്രേക്ഷകാകാംക്ഷ വര്ധിപ്പിച്ച ഘടകമാണ്. രാജ്കമല് ഫിലിംസ് ഇന്റര്നാഷണലിന്റെ ബാനറില് കമല്ഹാസനും ആര് മഹേന്ദ്രനും ചേര്ന്നാണ് വിക്രത്തിന്റെ നിര്മ്മാണം. എക്സിക്യൂട്ടീവ് പ്രൊഡ്യൂസർ എസ്സ് ഡിസ്നി. കേരളത്തിൽ ഷിബു തമീൻസിന്റെ നേതൃത്വത്തിൽ റിയാ ഷിബുവിന്റെ എച്ച് ആർ പിക്ചേഴ്സ് ആണ് ചിത്രം വിതരണത്തിന് എത്തിക്കുന്നത്. ലോകേഷിനൊപ്പം രത്നകുമാറും ചേര്ന്നാണ് ചിത്രത്തിന്റെ സംഭാഷണങ്ങള് രചിച്ചിരിക്കുന്നത്. ഗിരീഷ് ഗംഗാധരൻ ആണ് ഛായാഗ്രാഹകൻ. സംഗീതം അനിരുദ്ധ് രവിചന്ദര്, എഡിറ്റിംഗ് ഫിലോമിന് രാജ്, സംഘട്ടന സംവിധാനം അന്പറിവ്, കലാസംവിധാനം എന് സതീഷ് കുമാര്, വസ്ത്രാലങ്കാരം പല്ലവി സിംഗ്, വി സായ്, കവിത ജെ, മേക്കപ്പ് ശശി കുമാര്, നൃത്തസംവിധാനം സാന്ഡി, ശബ്ദ സങ്കലനം കണ്ണന് ഗണ്പത്, പബ്ലിസിറ്റി ഡിസൈനര് ഗോപി പ്രസന്ന, സൗണ്ട് ഡിസൈനിംഗ് സിങ്ക് സിനിമ, വിഎഫ്എക്സ് യൂണിഫൈ മീഡിയ, പ്രൊഡക്ഷന് കണ്ട്രോളര് എം സെന്തില്, അസോസിയേറ്റ് ഡയറക്ടേഴ്സ് മഗേഷ് ബാലസുബ്രഹ്മണ്യം, സന്തോഷ് കൃഷ്ണന്, സത്യ, വെങ്കി, വിഷ്ണു ഇടവന്, മദ്രാസ് ലോഗി വിഘ്നേഷ്, മേക്കിംഗ് വീഡിയോ എഡിറ്റ് പി ശരത്ത് കുമാര്, പിആര്ഒ പ്രതീഷ് ശേഖർ.
