ജോഫിന് ടി ചാക്കോ സംവിധാനം ചെയ്ത ചിത്രം
മലയാളത്തില് സമീപകാലത്തെ ശ്രദ്ധേയ ചിത്രങ്ങളിലൊന്നാണ് രേഖാചിത്രം. ആസിഫ് അലി, അനശ്വര രാജന് എന്നിവര് പ്രധാന കഥാപാത്രങ്ങളെ അവതരിപ്പിച്ച ചിത്രം സംവിധാനം ചെയ്തത് ജോഫിന് ടി ചാക്കോ ആണ്. മലയാളത്തില് അപൂര്വ്വമായ ഓള്ട്ടര്നേറ്റ് ഹിസ്റ്ററി ജോണറില് എത്തിയിരിക്കുന്ന ചിത്രം വലിയ അഭിപ്രായമാണ് പ്രേക്ഷകരില് നിന്ന് നേടിക്കൊണ്ടിരിക്കുന്നത്. ഇപ്പോഴിതാ ചിത്രത്തെ അഭിനന്ദിച്ച് രംഗത്തെത്തിയിരിക്കുകയാണ് വിനീത് ശ്രീനിവാസന്.
"പുതിയ കാലത്തെ മലയാള സിനിമ പ്രേക്ഷകരാല് ആഘോഷിക്കപ്പെടുന്നത് അതിന്റെ എഴുത്തും പ്രകടനങ്ങളും ക്രാഫ്റ്റും ഒക്കെ കൊണ്ടാണ്. പക്ഷേ കഥയില്ത്തന്നെ ഏറെ പുതുമകളുള്ള അപൂര്വ്വ ചിത്രങ്ങളിലൊന്നാണ് രേഖാചിത്രം. തിയറ്ററുകളില് മിസ് ചെയ്യരുതാത്ത ചിത്രം", വിനീത് ശ്രീനിവാസന് ഇന്സ്റ്റഗ്രാമില് കുറിച്ചു.
ആസിഫ് അലി വീണ്ടും പൊലീസ് വേഷത്തിലെത്തുന്ന ചിത്രത്തില് അനശ്വര രാജനാണ് മറ്റൊരു പ്രധാന കഥാപാത്രത്തെ അവതരിപ്പിക്കുന്നത്. 1985 ല് പുറത്തിറങ്ങിയ മമ്മൂട്ടി ചിത്രം കാതോട് കാതോരത്തിന്റെ ചിത്രീകരണഘട്ടത്തിന് രേഖാചിത്രത്തിന്റെ കഥാഗതിയില് ഏറെ പ്രാധാന്യമുണ്ട്. മലയാള സിനിമയില് ഇതുവരെ കണ്ടിട്ടില്ലാത്ത തരത്തിലുള്ള പ്ലോട്ട് ആണ് രേഖാചിത്രത്തിന്റേത്. ജോണ് മന്ത്രിക്കലും രാമു സുനിലും ചേര്ന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. മനോജ് കെ ജയന്, സറിന് ഷിഹാബ്, സിദ്ദിഖ്, ഭാമ അരുണ്, മേഘ തോമസ്, ജഗദീഷ്, നിഷാന്ത് സാഗര്, ഇന്ദ്രന്സ്, ഹരിശ്രീ അശോകന്, പ്രിയങ്ക, നന്ദു, ഉണ്ണി ലാലു, ഷഹീന് സിദ്ദിഖ്, ടി ജി രവി, ശ്രീജിത്ത് രവി തുടങ്ങി വലിയ താരനിര അണിനിരന്ന ചിത്രം കൂടിയാണ് ഇത്. മമ്മൂട്ടി നായകനായ ദി പ്രീസ്റ്റിന് ശേഷം ജോഫിന് ടി ചാക്കോ സംവിധാനം ചെയ്ത ചിത്രം കൂടിയാണ് ഇത്.
