വലിയ പ്രചരണങ്ങളില്ലാതെ തിയറ്ററുകളിലെത്തിയ എക്കോ എന്ന ചിത്രം മൗത്ത് പബ്ലിസിറ്റിയിലൂടെ വന് വിജയം നേടുന്നു.
മലയാളത്തില് സമീപകാലത്ത് ഏറ്റവുമധികം മൗത്ത് പബ്ലിസിറ്റി നേടുന്ന ചിത്രങ്ങളില് ഒന്നാണ് എക്കോ. താരസാന്നിധ്യത്തിനേക്കാള് മലയാളി സിനിമാപ്രേമികള് നിലവില് പ്രാധാന്യം കൊടുക്കുന്നത് ഉള്ളടക്കത്തിനും അവതരണത്തിനുമാണെന്നതിന്റെ ഏറ്റവും വലിയ ഉദാഹരണമാണ് ചിത്രം. വലിയ പ്രീ റിലീസ് പബ്ലിസിറ്റി ഇല്ലാതെ എത്തിയ ചിത്രത്തിന് പക്ഷേ ഒരു ഹൈപ്പ് അപ്പോഴേ ഉണ്ടായിരുന്നു. വന് അഭിപ്രായവും ബോക്സ് ഓഫീസ് വിജയവും നേടിയ കിഷ്കിന്ധാ കാണ്ഡം എന്ന ചിത്രത്തിന്റെ ടീം വീണ്ടും ഒന്നിക്കുന്ന ചിത്രം എന്നതായിരുന്നു അത്. ഇപ്പോഴിതാ എക്കോയുടെ ഏറ്റവും പുതിയ കളക്ഷന് കണക്കുകള് പുറത്തെത്തിയിരിക്കുകയാണ്.
21, വെള്ളിയാഴ്ച ആയിരുന്നു ചിത്രത്തിന്റെ റിലീസ്. പ്രമുഖ ട്രാക്കര്മാരായ സാക്നില്കിന്റെ കണക്ക് പ്രകാരം ആറ് ദിവസം കൊണ്ട് ഇന്ത്യയില് നിന്ന് ചിത്രം നേടിയ നെറ്റ് കളക്ഷന് 10.4 കോടിയാണ്. റിലീസിന് ശേഷമുള്ള ഞായറാഴ്ചയാണ് ഏറ്റവും വലിയ കളക്ഷന് ചിത്രം നേടിയത്. 3.05 കോടി ആയിരുന്നു ഇത്. അതേസമയം ഇന്ത്യയിലെ ഗ്രോസ് 10.7 കോടിയാണ്. സാക്നില്കിന്റെ കണക്ക് പ്രകാരം ചിത്രം വിദേശത്തുനിന്ന് നേടിയിരിക്കുന്നത് 5.8 കോടിയാണ്. അങ്ങനെ ആഗോള ബോക്സ് ഓഫീസില് നിന്ന് ആകെ 16.5 കോടി. വര്ക്കിംഗ് ഡേയ്സിലും മികച്ച ഒക്കുപ്പന്സി ലഭിക്കുന്ന ചിത്രം രണ്ടാം വാരാന്ത്യത്തിലും വലിയ നേട്ടമുണ്ടാക്കുമെന്നത് ഉറപ്പാണ്.
ബാഹുല് രമേശിന്റെ രചന തന്നെയാണ് ചിത്രത്തിന്റെ ഹൈലൈറ്റ്. മിസ്റ്ററി ത്രില്ലര് വിഭാഗത്തില് പെടുന്ന ചിത്രം മലയാളത്തില് ഇതുവരെ കണ്ടിട്ടില്ലാത്ത അനുഭവം പകരുന്ന ഒന്നാണ്. കിഷ്കിന്ധാ കാണ്ഡത്തിനും ജിയോ ഹോട്ട്സ്റ്റാറിന്റെ വെബ് സിരീസ് ആയ കേരള ക്രൈം ഫയല്സ് രണ്ടാം സീസണിനും (സെര്ച്ച് ഫോര് സിപിഒ അമ്പിളി രാജു) ശേഷം ബാഹുല് രമേശിന്റെ അനിമല് ട്രൈലജിയിലെ മൂന്നാമത്തെ ഭാഗമായുമാണ് എക്കോ ഒരുക്കിയിരിക്കുന്നത്. യുവനായക നിരയിലേക്ക് ഉയര്ന്നുകൊണ്ടിരിക്കുന്ന സന്ദീപ് പ്രദീപിനും വലിയ നേട്ടമാണ് ഈ ചിത്രം. വിനീത്, നരെയ്ന്, ബിനു പപ്പു, സൗരഭ് സച്ച്ദേവ, ബിയാന മോമിന് തുടങ്ങി ശ്രദ്ധേയ കാസ്റ്റിംഗ് ആണ് ചിത്രത്തിലേത്. ബാഹുല് രമേശ് തന്നെയാണ് ചിത്രത്തിന്റെ ഛായാഗ്രഹണവും നിര്വ്വഹിച്ചിരിക്കുന്നത്. കിഷ്കിന്ധാ കാണ്ഡത്തിന് സംഗീതം പകര്ന്ന മുജീബ് മജീദ് തന്നെയാണ് എക്കോയുടെയും സംഗീത സംവിധായകന്.
Related Articles
