മോഹൻലാലിന് അല്ലാതെ ആര്ക്ക് സാധിക്കും ഇത്തരമൊരു നേട്ടം കൊയ്യാൻ?.
മലയാളത്തിലെ ഏറ്റവും കൗഡ് പുള്ളറായ താരമാണ് മോഹൻലാല്. റീ റിലിസിലും വൻ നേട്ടമാണ് കളക്ഷനില് മോഹൻലാല് കൊയ്യുന്നത്. റീ റിലീസായ ഛോട്ടോ മുംബൈ ഏകദേശം രണ്ട് കോടിയോളം നേടിക്കഴിഞ്ഞിരിക്കുന്നു. 75 ദിവസങ്ങളില് നിന്നായി മോഹൻലാലിന്റെ മൂന്ന് ചിത്രങ്ങള് ആകെ 500 കോടി രൂപയിലധികം നേടിയിരിക്കുകയാണ്.
മോഹൻലാലിന്റെ എമ്പുരാൻ ആകെ 266.3 കോടി രൂപയാണ് നേടിയത്. മോഹൻലാല് നായകനായ തുടരുമാകട്ടെ 233 കോടി രൂപയും ആകെ ഗ്രോസ് നേടി എന്നാണ് റിപ്പോര്ട്ട്. റീ റിലീസിലെ ഛോട്ടാ മുംബൈയുടെ കളക്ഷനും ചേര്ത്താണ് മോഹൻലാല് പടങ്ങള് ആകെ 500 കോടി നേടിയിരിക്കുന്നത്. ഉത്സവപ്രതീതിയിലാണ് മോഹൻലാലിന്റെ ഛോട്ടാ മുംബൈ തിയറ്ററുകളിലേക്ക് വീണ്ടുമെത്തിയിരിക്കുന്നത്.
മോഹൻലാല് നായകനായി വന്ന ഹിറ്റായ ഫാമിലി ത്രില്ലർ ചിത്രം ‘തുടരും’ ജിയോഹോട്സ്റ്റാറിൽ സ്ട്രീമിംഗ് തുടരുകയുമാണ്. കെ ആർ സുനിൽ രചിച്ച ഈ ത്രില്ലർ ചിത്രം സംവിധാനം ചെയ്തിരിക്കുന്നത് തരുൺ മൂർത്തി ആണ്. രജപുത്ര വിഷ്വൽ മീഡിയയുടെ ബാനറിൽ എം രഞ്ജിത്ത് ആണ് ഈ ഫാമിലി ത്രില്ലർ ചിത്രം നിർമ്മിച്ചിരിക്കുന്നത്. കേരള ബോക്സ് ഓഫീസില് 100 കോടി നേടിയ ആദ്യ മലയാള ചിത്രമായ തുടരും കേരളത്തില് മാത്രം ആകെ 118 കോടിയിലധികം നേടിയപ്പോള് ആഗോളതലത്തിലെ തിയറ്റര് ഷെയര് 98 കോടി രൂപയാണ്.
മോഹൻലാൽ, ശോഭന, പ്രകാശ് വർമ്മ, ബിനു പപ്പു, ഫർഹാൻ ഫാസിൽ, തോമസ് മാത്യു, മണിയൻപിള്ള രാജു, ഇർഷാദ്, സംഗീത് പ്രതാപ്, നന്ദു, അബിൻ ബിനോ, ആർഷ ചാന്ദിനി, ഷോബി തിലകൻ, ഭാരതിരാജ, ശ്രീജിത്ത് രവി എന്നിവരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. ബെൻസ് എന്നറിയപ്പെടുന്ന ടാക്സി ഡ്രൈവർ ഷൺമുഖം, കുടുംബത്തിന്റെയും നാട്ടുകാരുടെയും പ്രിയപ്പെട്ടവനാണ്. തന്റെ ഏറ്റവും പ്രിയപ്പെട്ട അംബാസഡർ കാറുമായി ഒരു അസാധാരണ സംഭവത്തിൽ അദ്ദേഹം കുരുങ്ങുന്നു. ആ കുരുക്കിൽ നിന്ന് അദ്ദേഹം എങ്ങനെ രക്ഷപ്പെടും എന്നതാണ് കഥയുടെ പ്രമേയം. ആവേശം നിറച്ച നിമിഷങ്ങളിലൂടെ, 'തുടരും' പ്രേക്ഷകരെ തുടക്കം മുതൽ അവസാനം വരെ മുൾമുനയിൽ ഇരുത്തുന്ന ഒരു ഗംഭീര ദൃശ്യാനുഭവമായി മാറുന്നു. ഷാജി കുമാർ ഛായാഗ്രഹണം നിർവ്വഹിച്ചിരിക്കുന്ന ഈ ചിത്രത്തിന്റെ എഡിറ്റിങ് നിഷാദ് യൂസഫും ഷഫീഖ് വി ബിയുമാണ്. ഈ ത്രില്ലർ ഡ്രാമയുടെ സംഗീതം ജേക്സ് ബിജോയ് ആണ്. മലയാളം, തമിഴ്, തെലുങ്ക്, കന്നഡ, ഹിന്ദി എന്നീ അഞ്ച് ഭാഷകളിലാണ് ‘തുടരും’ സ്ട്രീം ചെയ്യുന്നത്.
