വമ്പൻമാര്‍ക്ക് വെല്ലുവിളിയായി ഹനുമാൻ, സര്‍പ്രൈസായി കളക്ഷൻ കണക്കുകള്‍, റിലീസിന് നേടിയത്
വൻ നേട്ടമുണ്ടാക്കി ഹനുമാൻ.
അത്ഭുതപ്പെടുത്തുന്ന സ്വീകാര്യതയാണ് ഹനുമാന് ലഭിച്ചിരിക്കുന്നത്. ഒരു പാൻ ഇന്ത്യൻ സൂപ്പര്‍ഹീറോ ചിത്രമായി എത്തിയ ഹനുമാൻ പ്രേക്ഷകരെ ആകര്‍ഷിക്കുന്നു. ബോക്സ് ഓഫീസിലും അത് പ്രതിഫലിക്കുന്നുണ്ട്. റിലീസിന് ഹനുമാൻ ആകെ 11 കോടിയില്‍ അധികം നേടി എന്നാണ് ബോക്സ് ഓഫീസ് റിപ്പോര്‍ട്ട്.
തേജ സജ്ജ നായകനായി എത്തിയ ചിത്രം ഹനുമാൻ ഒരു സര്‍പ്രൈസ് ഹിറ്റായി മാറുമെന്നാണ് ട്രേഡ് അനലിസ്റ്റുകള്‍ പ്രവചിക്കുന്നത്. ആഗോള ബോക്സ് ഓഫീസില്‍ 100 കോടി രൂപയില്‍ അധികം ഹനുമാൻ നേടിയാല്‍ അതിശയപ്പെടാനില്ല എന്നാണ് അഭിപ്രായങ്ങള്‍. തേജ സജ്ജയുടെ ഹനുമാൻ മറ്റ് സിനിമകളുടെ കുതിപ്പിന് വെല്ലുവിളിയാകും എന്നാണ് പ്രതീക്ഷകള്‍. ഹനുമാൻ മികച്ച ഒരു സൂപ്പര്‍ഹീറോ ചിത്രം എന്നതിലുപരിയായി മനോഹരമായി എക്സിക്യൂട്ട് ചെയ്‍ത് ഭാഷാഭേദമന്യേ പ്രേക്ഷകര്‍ക്ക് ഇഷ്‍ടപ്പെടുന്ന പാൻ ഇന്ത്യൻ ആയി അവതരിപ്പിച്ചിരിക്കുന്നു എന്നതാണ് വിജയത്തില്‍ നിര്‍ണായകമാകുന്നത്.
അമൃത നായര്‍ തേജയുടെ നായികയായെത്തുന്നു. 'കല്‍ക്കി', 'സോംബി റെഡ്ഡി' ചിത്രങ്ങളുടെ സംവിധായകൻ എന്ന നിലയില്‍ തെലുങ്കില്‍ ശ്രദ്ധയാകര്‍ഷിച്ചതാണ് ഹനുമാൻ ഒരുക്കുന്ന പ്രശാന്ത് വര്‍മ. ഛായാഗ്രാഹണം നിര്‍വഹിക്കുന്നത് ശിവേന്ദ്രയാണ്. കെ നിരഞ്‍ജൻ റെഢിയാണ് നിര്‍മാണം.
തെലുങ്കിലെ യുവ നായകൻമാരില്‍ ശ്രദ്ധേയാകര്‍ഷിച്ച താരമാണ് തേജ സജ്ജ. തേജ സജ്ജ നായകനായി വേഷമിട്ടതില്‍ ഒടുവില്‍ പ്രദര്‍ശനത്തിന് എത്തിയത് 'അത്ഭുത'മായിരുന്നു. 'സൂര്യ' എന്ന ഒരു കഥാപാത്രമായിട്ടായിരുന്നു ചിത്രത്തില്‍ തേജ സജ്ജ വേഷമിട്ടത്. ഡിസ്‍നി പ്ലസ് ഹോട്‍സ്റ്റാറില്‍ പ്രദര്‍ശനത്തിനെത്തിയ ചിത്രം മികച്ച പ്രതികരണമായിരുന്നില്ല നേടിയത്. മാലിക് റാം ആയിരുന്നു ചിത്രം സംവിധാനം ചെയ്‍തത്. ലക്ഷ്‍മി ഭൂപയിയയും പ്രശാന്ത് വര്‍മയുമാണ് തിരക്കഥ എഴുതിയത്. ശിവാനി രാജശേഖര്‍ ആയിരുന്നു തേജയുടെ ചിത്രത്തില്‍ നായികയായി എത്തിയത്, സത്യരാജ്, ശിവാജി രാജ, ദേവി പ്രസാദ് എന്നിവരും പ്രധാന വേഷങ്ങളിലെത്തി. ബാലതാരമായി അരങ്ങേറിയ തേജ തമിഴ് സിനിമയിലും വേഷമിട്ടിട്ടുണ്ട്.
ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക
