തരുണ് മൂര്ത്തി സംവിധാനം ചെയ്ത ചിത്രം ഏപ്രില് 25 നാണ് തിയറ്ററുകളില് എത്തിയത്
മലയാള സിനിമയില് സമീപകാലത്ത് ഏറ്റവും ജനപ്രീതി നേടിയ ചിത്രമാണ് മോഹന്ലാല് നായകനായ തുടരും. ഏപ്രില് 25 ന് തിയറ്ററുകളില് എത്തുന്നതിന് മുന്പ് വലിയ പ്രീ റിലീസ് പബ്ലിസിറ്റി അണിയറക്കാര് കൊടുത്തില്ല. എന്നാല് സംവിധായകന് അടക്കമുള്ളവര് നല്കിയ ചുരുക്കം അഭിമുഖങ്ങളില് ചിത്രം എന്താണെന്ന് കൃത്യമായി പറഞ്ഞിരുന്നു. ചിത്രം ഒരു ഫാമിലി ഡ്രാമ ആണെന്നും എന്നാല് ഫീല് ഗുഡ് അല്ലെന്നുമാണ് സംവിധായകന് തരുണ് മൂര്ത്തി റിലീസിന് മുന്പ് പറഞ്ഞത്. ഹൈപ്പ് കൂട്ടാതിരിക്കാനായി ചിത്രത്തിന്റെ ആക്ഷന്, ത്രില്ലര് അംശങ്ങള് അണിയറക്കാര് ബോധപൂര്വ്വം മറച്ചുവെക്കുകയായിരുന്നു. എന്നാല് ആദ്യ ഷോകള്ക്കിപ്പുറം വമ്പന് മൗത്ത് പബ്ലിസിറ്റി നേടിയതോടെ ഇന്നുവരെ ബോക്സ് ഓഫീസില് ചിത്രത്തിന് തിരിഞ്ഞുനോക്കേണ്ടി വന്നിട്ടില്ല. ഇപ്പോഴിതാ ആഗോള ബോക്സ് ഓഫീസില് മറ്റൊരു നാഴികക്കല്ലും പിന്നിട്ടിരിക്കുകയാണ് ചിത്രം.
ട്രാക്കര്മാര് നല്കുന്ന ഏറ്റവും പുതിയ വിവരം അനുസരിച്ച് ചിത്രം ആഗോള ബോക്സ് ഓഫീസില് നിന്ന് 150 കോടി കടന്നിട്ടുണ്ട്. പുലിമുരുകനെ മറികടന്ന് മലയാളത്തില് 150 കോടിയില് അധികം നേടുന്ന ആറാമത്തെ ചിത്രമായിരിക്കുകയാണ് തുടരും. ആവേശവും ആടുജീവിതവുമാണ് കളക്ഷനില് ഇനി തുടരുമിന് മുന്നില് ഉള്ളത്. ആവേശം 156 കോടിയും ആടുജീവിതം 158.50 കോടിയുമാണ് ആകെ നേടിയത്. ഇന്നത്തെ കളക്ഷന് കൊണ്ട് തുടരും ഈ രണ്ട് ചിത്രങ്ങളെയും മറികടന്നാലും അത്ഭുതപ്പെടാനില്ല. റിലീസ് ചെയ്തതിന് ശേഷമുള്ള രണ്ടാം ഞായറാഴ്ചയായ ഇന്ന് വന് ഒക്കുപ്പന്സിയോടെയാണ് ചിത്രം എല്ലായിടവും പ്രദര്ശിപ്പിക്കുന്നത്.
ഷണ്മുഖം എന്ന ടാക്സി ഡ്രൈവറായാണ് ചിത്രത്തില് മോഹന്ലാല് എത്തുന്നത്. ബിനു പപ്പു, ഫർഹാൻ ഫാസിൽ, മണിയൻപിള്ള രാജു എന്നിവര്ക്കൊപ്പം നിരവധി പുതുമുഖങ്ങളും ചിത്രത്തില് അഭിനയിക്കുന്നു. ഷാജി കുമാര് ആണ് ഛായാഗ്രഹണം. എഡിറ്റിംഗ് നിഷാദ് യൂസുഫ്, ഷെഫീഖ് വി ബി, സംഗീതം ജേക്സ് ബിജോയ്, എക്സിക്യൂട്ടീവ് പ്രൊഡ്യൂസര് അവന്തിക രഞ്ജിത്ത്, ശബ്ദ സംവിധാനം വിഷ്ണു ഗോവിന്ദ്, കലാസംവിധാനം ഗോകുല് ദാസ്. കെ ആര് സുനിലിന്റെ കഥയ്ക്ക് തരുണ് മൂര്ത്തിയും കെ ആര് സുനിലും ചേര്ന്നാണ് തിരക്കഥ ഒരുക്കിയിരിക്കുന്നത്. മോഹന്ലാല്- ശോഭന കൂട്ടുകെട്ട് 15 വര്ഷങ്ങള്ക്ക് ശേഷം ബിഗ് സ്ക്രീനില് ഒന്നിക്കുന്ന ചിത്രവുമാണ് ഇത്. കുടുംബപ്രേക്ഷകരെ ഏറെ ആകര്ഷിക്കുന്ന ഘടകമാണ് അത്.
