മമ്മൂട്ടി ആരാധകര്‍ ഏറെക്കാലമായി കാത്തിരിക്കുന്ന തമിഴ് ചിത്രം 'പേരന്‍പി'ന്റെ ട്രെയ്‌ലര്‍ പുറത്തെത്താന്‍ ഏതാനും മണിക്കൂറുകള്‍. ഇന്ന് വൈകിട്ട് നടക്കുന്ന വികടന്‍ സിനി അവാന്‍ഡ്‌സ് വേദിയിലാണ് തമിഴ്‌നാട്ടിലും വലിയ കാത്തിരിപ്പുള്ള ചിത്രത്തിന്റെ ട്രെയ്‌ലര്‍ ലോഞ്ച്. ചെന്നൈ ട്രേഡ് സെന്ററില്‍ നടക്കുന്ന പരിപാടിയില്‍ മമ്മൂട്ടിയാണ് ട്രെയ്‌ലര്‍ പുറത്തിറക്കുക. എട്ടിനും ഒന്‍പതിനുമിടയില്‍ ട്രെയ്‌ലര്‍ വീഡിയോ പുറത്തെത്തും.

സ്പാസ്റ്റിക് പരാലിസിസ് ബാധിച്ച പെണ്‍കുട്ടിയുടെ അച്ഛനാണ് ചിത്രത്തില്‍ മമ്മൂട്ടിയുടെ കഥാപാത്രം. അമുദന്‍ എന്ന കഥാപാത്രം ഒരു ഓണ്‍ലൈന്‍ ടാക്‌സി ഡ്രൈവറാണ്. മമ്മൂട്ടി കഥാപാത്രത്തിന്റെ മകളായി സാധനയാണ് എത്തുന്നത്. കട്രത് തമിഴും തങ്കമീന്‍കളും തരമണിയുമൊക്കെ ഒരുക്കിയ റാമാണ് ചിത്രത്തിന്റെ സംവിധാനം.

റോട്ടര്‍ഡാം ഫിലിം ഫെസ്റ്റിവലില്‍ വേള്‍ഡ് പ്രീമിയര്‍ നടന്ന സിനിമയുടെ ഇന്ത്യന്‍ പ്രീമിയര്‍ ഗോവ ചലച്ചിത്രമേളയിലായിരുന്നു. രണ്ട് വേദികളിലും വലിയ സ്വീകാര്യത ലഭിച്ച ചിത്രം അടുത്ത മാസം തീയേറ്ററുകളിലെത്തും.