ചർമ്മ സൗന്ദര്യത്തെ പരിപോഷിപ്പിക്കാൻ ചില ഭക്ഷണങ്ങളും നിങ്ങളെ സഹായിക്കും. പോഷകഗുണമുള്ള ഭക്ഷണങ്ങൾ ചര്മ്മത്തെ ആരോഗ്യത്തോടെ സംരക്ഷിക്കും.
ശരീരത്തിന്റെ ആരോഗ്യം പോലെ തന്നെ പ്രധാനമാണ് ചര്മ്മത്തിന്റെ ആരോഗ്യവും. ചര്മ്മത്തിന്റെ ആരോഗ്യത്തിനും മൃദുത്വവും തിളക്കവുമുള്ള ചര്മ്മം നിലനിര്ത്താനും ഭക്ഷണക്രമത്തില് ഒരല്പ്പം ശ്രദ്ധ നല്കുന്നത് നല്ലതാണ്.
ചർമ്മ സൗന്ദര്യത്തെ പരിപോഷിപ്പിക്കാൻ ചില ഭക്ഷണങ്ങളും നിങ്ങളെ സഹായിക്കും. പോഷകഗുണമുള്ള ഭക്ഷണങ്ങൾ ചര്മ്മത്തെ ആരോഗ്യത്തോടെ സംരക്ഷിക്കും. ആരോഗ്യമുള്ള ചർമ്മത്തിനായി ഡയറ്റില് ഉള്പ്പെടുത്തേണ്ട ചില ഭക്ഷണങ്ങളെ പരിചയപ്പെടാം...
ഒന്ന്...
പച്ചിലക്കറികളാണ് ആദ്യമായി ഈ പട്ടികയില് ഉള്പ്പെടുന്നത്. പോഷകങ്ങള് ധാരാളം അടങ്ങിയ ഇവ ശരീരത്തിന്റെ ആരോഗ്യത്തിന് മാത്രമല്ല, ചര്മ്മത്തിന്റെ ആരോഗ്യത്തിനും ഏറെ നല്ലതാണ്. ഇവയിൽ അടങ്ങിയിരിക്കുന്ന ഫോളേറ്റ്, ബീറ്റാ കരോട്ടിൻ, വിറ്റാമിൻ കെ, സിങ്ക് തുടങ്ങിയ ഘടകങ്ങൾ പ്രായമാകുന്നതിന്റെ പ്രധാന ലക്ഷണമായ ചർമ്മത്തിലെ ചുളിവുകൾ ഇല്ലാതാക്കാൻ സഹായിക്കും. ഒപ്പം ചര്മ്മത്തിന് തിളക്കം ലഭിക്കാനും സഹായിക്കും. അതിനാല് ചീര, ബ്രോക്കോളി, മുരിങ്ങയില തുടങ്ങിയ ഇലക്കറികള് ധാരാളമായി ഡയറ്റില് ഉൾപ്പെടുത്താം.
രണ്ട്...
മഞ്ഞള് ആണ് രണ്ടാമതായി ഈ പട്ടികയില് ഉള്പ്പെടുന്നത്. മഞ്ഞളിൽ ആന്റി ഓക്സിഡന്റുകളും ആന്റി-ഇൻഫ്ലമേറ്ററി ഘടകങ്ങളും അടങ്ങിയിട്ടുണ്ട്. ഈ സ്വഭാവസവിശേഷതകൾ ചർമ്മത്തിന് തിളക്കവും നൽകും. മഞ്ഞൾ ചർമ്മത്തിന് സ്വാഭാവിക തിളക്കം നൽകിക്കൊണ്ട് പുനരുജ്ജീവിപ്പിക്കും. മഞ്ഞളിലെ കുർക്കുമിൻ എന്ന സംയുക്തമാണ് ചർമ്മസംരക്ഷണത്തിന് സഹായിക്കുന്നത്.
മൂന്ന്...
ഓറഞ്ചാണ് അടുത്തതായി ഈ പട്ടികയില് ഉള്പ്പെടുന്നത്. വിറ്റാമിന് സിയും മറ്റ് പോഷകങ്ങളും അടങ്ങിയ ഓറഞ്ച് ഡയറ്റില് ഉള്പ്പെടുത്തുന്നത് ചര്മ്മത്തിന്റെ ആരോഗ്യത്തിന് ഏറേ നല്ലതാണ്. ഇവ സൂര്യതാപം മൂലമുണ്ടാകുന്ന ചർമ്മപ്രശ്നങ്ങളെ തടയുകയും, സ്വാഭാവികമായ രീതിയിൽ ചർമ്മത്തിന് ജലാംശം നൽകുകയും, ചർമ്മത്തിലെ വരൾച്ച, കറുത്ത പാടുകൾ എന്നിവയെ അകറ്റുകയും ചെയ്യുന്നു.
നാല്...
ചര്മ്മാരോഗ്യം വർധിപ്പിക്കാൻ സഹായിക്കുന്നതിൽ തക്കാളിയുടെ പങ്ക് വളരെ വലുതാണ്. പ്രായമാകുന്നതിന്റെ ഭാഗമായി ചർമ്മത്തിൽ ഉണ്ടാകുന്ന ചുളിവുകൾ, മറ്റ് കറുത്ത പാടുകൾ തുടങ്ങിയവ നീക്കം ചെയ്യാൻ തക്കാളിക്ക് കഴിയും. സൂര്യരശ്മികൾ ഏറ്റ് ചർമ്മത്തിൽ ഉണ്ടാകുന്ന കരുവാളിപ്പ് നീക്കം ചെയ്യാനും തക്കാളി സഹായിക്കും. അതിനാല് തക്കാളിയും ഭക്ഷണത്തില് ധാരാളമായി ഉള്പ്പെടുത്താം.
അഞ്ച്...
ആരോഗ്യവും സൗന്ദര്യവുമുള്ള ചർമ്മം നേടുന്നതിന് ബെറി ഇനത്തിൽ ഉൾപ്പെടുന്ന എല്ലാ പഴങ്ങളും ഒരുപോലെ മികച്ചതാണ്. അതിനാല് ആന്റി ഓക്സിഡന്റുകൾ, നാരുകൾ, പോഷകങ്ങൾ എന്നിവയാൽ സമ്പന്നമായ സ്ട്രോബെറി, ബ്ലൂബെറി എന്നിവ ഡയറ്റില് ഉള്പ്പെടുത്താം.
ആറ്...
ധാരാളം ആരോഗ്യ ഗുണങ്ങളുളള ഒന്നാണ് അവക്കാഡോ പഴം അഥവാ വെണ്ണപ്പഴം. അവക്കാഡോയിൽ വിറ്റാമിനുകളും ആന്റി ഓക്സിഡന്റുകളും ധാരാളം അടങ്ങിയിട്ടുണ്ട്. വിറ്റാമിൻ ബി1, ബി2, ബി3, ബി6, സി, ഇ, കെ എന്നിവയാൽ സമ്പന്നമായ അവക്കാഡോ തിളക്കമുള്ള ചർമ്മത്തെ നിങ്ങൾക്ക് സമ്മാനിക്കും. ചർമ്മത്തിലെ ജലാംശം നിലനിർത്താനും അവക്കാഡോയ്ക്ക് കഴിയും. അതുകൊണ്ടു തന്നെ ചർമ്മം കൂടുതൽ ചെറുപ്പമായി തോന്നുകയും ചെയ്യും.
ഏഴ്...
നട്സ് കഴിക്കുന്നതും ചര്മ്മത്തിന്റെ ആരോഗ്യത്തിന് ഏറെ നല്ലതാണ്. പ്രത്യേകിച്ച് ബദാം, വാള്നട്സ് തുടങ്ങിയവയും ചര്മ്മത്തിന്റെ ആരോഗ്യത്തിന് നല്ലതാണ് . ഇതില് അടങ്ങിയിരിക്കുന്ന വിറ്റാമിൻ ബി, ഇ, മറ്റ് പോഷകങ്ങള് എന്നിവ ചര്മ്മത്തിന്റെ ആരോഗ്യത്തിന് ഏറേ നല്ലതാണ്. ഇവ ഡയറ്റില് ഉള്പ്പെടുത്തുന്നത് ചർമ്മത്തിന്റെ പ്രായാധിക്യ ലക്ഷണങ്ങളെ വൈകിപ്പിക്കുകയും ചർമ്മത്തെ തിളക്കമാർന്നതായി നിലനിർത്തുകയും ചെയ്യും.
എട്ട്...
തൈര് ആണ് അടുത്തതായി ഈ പട്ടികയില് ഉള്പ്പെടുന്നത്. പ്രോട്ടീൻ, ഫാറ്റ്, പ്രോബയോട്ടിക്സ് എന്നിവയാൽ സമ്പന്നമാണ് തൈര്. അതിനാല് തൈര് കുടിക്കുന്നത് ചർമ്മം തിളക്കമുള്ളതാക്കാന് സഹായിക്കും.
Also Read: പ്രതിരോധശേഷി കൂട്ടാന് ഡയറ്റില് ഉള്പ്പെടുത്താം ഈ എട്ട് 'സൂപ്പര് ഫുഡുകള്'
