Asianet News MalayalamAsianet News Malayalam

മാസിഡോണിയൻ ഇതിഹാസം ഗോരാൻ പാൻഡേവ് ബൂട്ടഴിച്ചു; ഗാർഡ് ഓഫ് ഓണർ നൽകി താരങ്ങൾ

നോർത്ത് മാസിഡോണിയയുടെ എക്കാലത്തെയും മികച്ച ​ഗോൾ വേട്ടക്കാരനായ പാൻഡേവ് 122 കളിയിൽ 38 ഗോളുമായാണ് രാജ്യാന്തര കരിയറിന് തിരശ്ശീലയിട്ടത്.

Euro North Macedonia legend Goran Pandev retires from International football
Author
Amsterdam, First Published Jun 22, 2021, 2:46 PM IST

ആംസ്റ്റർഡാം: നോർത്ത് മാസിഡോണിയൻ നായകനും അവരുടെ ഇതിഹാസ താരവുമായ ഗോരാൻ പാൻഡേവ് അന്താരാഷ്ട്ര ഫുട്ബോളിൽ നിന്ന് വിരമിച്ചു. യൂറോകപ്പിൽ നെതർലൻഡ്സിനെതിരെയുള്ള മത്സരത്തോടെയാണ് പാൻഡേവ് ഇരുപത് വർഷം നീണ്ട കരിയറിന് അവസാനമിട്ടത്. നെതർലൻഡ്സിനെതിരായ മത്സരത്തിൽ 67-ാം മിനിറ്റിൽ കളിക്കളത്തിൽ പിൻവലിക്കപ്പെട്ട നായകന് സഹതാരങ്ങളും ഡച്ച് താരങ്ങളും ​ഗാർഡ് ഓഫ് ഓണർ നൽകിയാണ് ആദരമർപ്പിച്ചത്.

നോർത്ത് മാസിഡോണിയയുടെ എക്കാലത്തെയും മികച്ച ​ഗോൾ വേട്ടക്കാരനായ പാൻഡേവ് 122 കളിയിൽ 38 ഗോളുമായാണ് രാജ്യാന്തര കരിയറിന് തിരശ്ശീലയിട്ടത്. 30 വർഷം മുമ്പ് യൂ​ഗോസ്ലോവിയയിൽ നിന്ന് സ്വതന്ത്രമായി 2019വരെ മാസിഡോണിയ എന്നറിയപ്പെട്ടിരുന്ന നോർത്ത് മാസിഡോണിയ ആദ്യമായാണ് ഒരു പ്രധാന ടൂർണമെന്റിന് യോ​ഗ്യത നേടുന്നത്.

Euro North Macedonia legend Goran Pandev retires from International footballയൂറോ കപ്പിൽ ഓസ്ട്രിയക്കെതിരായ മത്സരത്തിൽ ടീമിനായി ആദ്യ ഗോൾ നേടിയതും പാൻഡേവായിരുന്നു. അട്ടിമറി പ്രതീക്ഷ ഉയർത്തിയ മാസിഡോണിയ അവസാന 12 മിനിറ്റിൽ വഴങ്ങിയ രണ്ട് ​ഗോളിനാണ് ഓസ്ട്രിയക്കെതിരെ തോറ്റത്. 2015ൽ വിരമിച്ച പാൻഡേവിനെ കോച്ച് ഇഗോർ നിർബന്ധിച്ച് തീരുമാനത്തിൽ നിന്ന് പിന്തിരിപ്പിച്ചാണ് ദേശീയ ടീമിൽ തിരിച്ചെത്തിച്ചത്.

2010ൽ ജോസ് മൗറീഞ്ഞോക്കൊപ്പം ഇന്റർമിലാനുവേണ്ടി ചാമ്പ്യൻസ് ലീ​ഗ് കിരീടം നേടിയതാണ് ക്ലബ്ബ് കരിയറിൽ 37കാരനായ പാൻഡേവിന്റെ ഏറ്റവും മികച്ച നേട്ടം. മാർച്ചിൽ നടന്ന ലോകകപ്പ് യോ​ഗ്യതാ പോരാട്ടത്തിൽ മാസിഡ‍ോണിയ ജർമനിയെ 2-1ന്  വീഴ്ത്തി ചരിത്രം കുറിച്ചപ്പോൾ അതിലൊരു ​ഗോൾ പാൻഡേവിന്റെ ബൂട്ടിൽ നിന്നായിരുന്നു.

ജൻമനാടായ സ്ട്രുമിക്കയിൽ തുടങ്ങിയ പാൻഡേവ് അക്കാദമിയുടെ ടീം 2017ൽ മാസിഡോണിയയിലെ ഒന്നാം ഡിവിഷൻ ലീ​ഗിലേക്ക് യോ​ഗ്യത നേടിയിരുന്നു. യുവതലമുറയുമായി പരിശീലക വേഷത്തിൽ മാസിഡോണിയയുടെ ഇതിഹാസ താരത്തെ ഇനിയും കാണാനാകുമെന്ന പ്രതീക്ഷയിലാണ് ഫുട്ബോൾ ലോകം.

Follow Us:
Download App:
  • android
  • ios