ദില്ലി: ഫൈന്‍ഡ് എക്‌സ് 2 സീരീസ് ഈ മാസം അവസാനം ഇന്ത്യയില്‍ അവതരിപ്പിക്കാന്‍ പദ്ധതി തയ്യാറാക്കുന്നതിനിടയില്‍ മറ്റു മൂന്നു ബജറ്റ് ഫോണുകള്‍ പുറത്തിറക്കാന്‍ ഓപ്പോയുടെ ശ്രമം. രണ്ട് സ്മാര്‍ട്ട്‌ഫോണുകളായ എ 12, എ 52 എന്നിവ ഇതിനകം ഇന്ത്യക്ക് പുറത്ത് വിപണിയിലെത്തിയിട്ടുണ്ട്. എന്നാല്‍ പുതിയ സ്മാര്‍ട്ട്‌ഫോണ്‍, എ 11 കെ പുതിയതാണ്. മൂന്ന് സ്മാര്‍ട്ട്‌ഫോണുകളും അടുത്ത ആഴ്ച്ച തന്നെ ഇന്ത്യയില്‍ വിപണിയിലെത്തുമെന്നാണ് വിവരം.

വരാനിരിക്കുന്ന ഓപ്പോ എ സീരീസ് സ്മാര്‍ട്ട്‌ഫോണുകള്‍ ഇന്ത്യയിലെ സാംസങ് ഗാലക്‌സി എം സീരീസുമായാണ് മത്സരിക്കുന്നത്. ഓപ്പോയുടെ എ11കെ 10,000 രൂപയില്‍ താഴെ വിലയ്ക്കായിരിക്കും വില്‍പ്പനയ്‌ക്കെത്തുക. എ12, എ52 എന്നിവ യഥാക്രമം 12,000 രൂപയും 17,500 രൂപയിലും വില്‍ക്കുമെന്നു കരുതുന്നു. എ 11 കെ യുടെ സവിശേഷതകള്‍ക്കു തുല്യമായിരിക്കും എ 12. പക്ഷേ റാം കപ്പാസിറ്റിയിലും ഡിസ്‌പ്ലേ വലുപ്പത്തിലും വ്യത്യാസമുണ്ടാകും.

എ11കെ 2 ജിബി റാമും 32 ജിബി സ്‌റ്റോറേജും വികസിപ്പിക്കാവുന്ന സ്‌റ്റോറേജിനുള്ള പിന്തുണയുമായി വരുന്നു. 6.33 ഇഞ്ച് എച്ച്ഡി + ഡിസ്‌പ്ലേ, ഒരു ഹീലിയോ പി 35 സോസി, 13 മെഗാപിക്‌സല്‍, പിന്നില്‍ 2 മെഗാപിക്‌സല്‍ സെന്‍സറുകള്‍, 4230 എംഎഎച്ച് ബാറ്ററി എന്നിവയുള്‍പ്പെടെ ബാക്കി സവിശേഷതകള്‍ അതേപടി നിലനിര്‍ത്തുന്നു. എ12 നെ സംബന്ധിച്ചിടത്തോളം, 6.22 ഇഞ്ച് എച്ച്ഡി + നോച്ച്ഡ് ഡിസ്‌പ്ലേ, 3 ജിബി അല്ലെങ്കില്‍ 4 ജിബി റാം, 32 ജിബി അല്ലെങ്കില്‍ 64 ജിബി സ്‌റ്റോറേജ്, 4230 എംഎഎച്ച് ബാറ്ററി എന്നിവയുമായി ചേര്‍ത്ത മീഡിയടെക് ഹീലിയോ പി 35 സോക്ക് ഉണ്ട്.

13 മെഗാപിക്‌സല്‍ സെന്‍സറും 2 മെഗാപിക്‌സല്‍ സെന്‍സറും ഉള്ള ഡ്യുവല്‍ ക്യാമറ സജ്ജീകരണവും ഇതിലുണ്ട്. സെല്‍ഫികള്‍ക്കായി, മുന്‍വശത്ത് 5 മെഗാപിക്‌സല്‍ ക്യാമറയുണ്ട്. എ12 ല്‍ വൈഫൈ, ബ്ലൂടൂത്ത്, ജി.പി.എസ്, 3.5 എംഎം ഹെഡ്‌ഫോണ്‍ ജാക്ക് എന്നിവ മറ്റ് സ്റ്റാന്‍ഡേര്‍ഡ് കണക്റ്റിവിറ്റി ഓപ്ഷനുകളിലുണ്ട്. 165 ഗ്രാം ഭാരവും 8.3 മിമി കട്ടിയുമുള്ള സ്മാര്‍ട്ട്‌ഫോണിന് ആന്‍ഡ്രോയിഡ് 9 അടിസ്ഥാനമാക്കിയുള്ളതാണ്.

എ52 രണ്ട് മോഡലുകള്‍ക്കും മുകളിലാണ്. 6.5 ഇഞ്ച് എഫ്എച്ച്ഡി + പഞ്ച്‌ഹോള്‍ ഡിസ്‌പ്ലേയാണ് ഈ സ്മാര്‍ട്ട്‌ഫോണിനുള്ളത്. ക്വാല്‍കോം സ്‌നാപ്ഡ്രാഗണ്‍ 665 സോസി ചേര്‍ത്ത 8 ജിബി റാമും 128 ജിബി ഇന്റേണല്‍ സ്‌റ്റോറേജും 5000 എംഎഎച്ച് ബാറ്ററിയുമായാണ് ഇത് വിപണിയിലെത്തുന്നത്.

12 മെഗാപിക്‌സല്‍ മെയിന്‍ സെന്‍സര്‍, 8 മെഗാപിക്‌സല്‍ അള്‍ട്രാവൈഡ് സെന്‍സര്‍, 2 മെഗാപിക്‌സല്‍ ഡെപ്ത് സെന്‍സര്‍, 2 മെഗാപിക്‌സല്‍ മാക്രോ സെന്‍സര്‍ എന്നിവ അടങ്ങിയ ക്വാഡ് റിയര്‍ ക്യാമറ സജ്ജീകരണമാണ് ഈ സ്മാര്‍ട്ട്‌ഫോണിനുള്ളത്. സ്മാര്‍ട്ട്‌ഫോണിന്റെ മുന്‍വശത്ത് 8 മെഗാപിക്‌സല്‍ ക്യാമറയുണ്ട്. ബാറ്ററി 18വാട്‌സ് ഫാസ്റ്റ് ചാര്‍ജിംഗിനെ പിന്തുണയ്ക്കുന്നു. ഇത് ആന്‍ഡ്രോയിഡ് 10-ലാണ് പ്രവര്‍ത്തിക്കുന്നത്.