തീരം തൊടാന് ഉംപുണ്; അഞ്ച് ലക്ഷം പേരെ ഒഴിപ്പിച്ചു
ഉംപുൺ ചുഴലിക്കാറ്റ് ഉച്ചയോടെ പശ്ചിമബംഗാള് തീരം തൊടും. ഒഡിഷയിലെ പാരദ്വീപിന് 180 കിലോമീറ്റര് അകലെയെത്തിയിരിക്കുകയാണ് ചുഴലിക്കാറ്റ്. മണിക്കൂറിൽ 100 കിലോമീറ്ററിൽ അധികം വേഗത്തിലാണ് കാറ്റ് വീശുന്നത്. ഉച്ചയോടെ പശ്ചിമ ബംഗാളിലെ ദിഘയ്ക്കും ബംഗ്ലാദേശിലെ ഹട്ടിയ ദ്വീപിനും ഇടയിൽ സുന്ദർബൻ മേഖലയിലൂടെയാവും അതിതീവ്ര ചുഴലിക്കാറ്റ് കരയിലേക്ക് കടക്കുകയെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം അറിയിച്ചു. ബംഗാള് ഉള്ക്കടലില് രൂപപ്പെട്ടതില് വച്ച് ഏറ്റവും ശക്തിയേറിയ ചുഴലിക്കാറ്റാണ് ഉംപുണ് എന്നും കേന്ദ്രകാലാവസ്ഥാ നിരീക്ഷണകേന്ദ്രം അറിയിച്ചു.
പശ്ചിമ ബംഗാളിലും വടക്കൻ ഒഡിഷ തീരത്തും റെഡ് അലര്ട്ട് നൽകിയിരിക്കുകയാണ്. ഇരുസംസ്ഥാനങ്ങളിലും കനത്ത മഴയും കാറ്റുമുണ്ട്. വരും മണിക്കൂറുകളിൽ ഇത് ശക്തിപ്പെടുമെന്നാണ് മുന്നറിയിപ്പ്.
കടൽക്ഷോഭവും രൂക്ഷമാകും. പശ്ചിമ ബംഗാളിൽ നാലുലക്ഷത്തോളം പേരെയും ഒഡിഷയില് 1,19,075 പേരെ മാറ്റിപ്പാർപ്പിച്ചു.
1,704 അഭയ കേന്ദ്രങ്ങളിലേക്കാണ് ഒഡിഷയിലുള്ളവരെ മാറ്റിപ്പാർപ്പിച്ചത്. അടുത്ത ആറു മണിക്കൂർ നിർണായകമെന്ന് ഒഡിഷ ചീഫ് സെക്രട്ടറി പറഞ്ഞു.
അടിയന്തര സാഹചര്യം നേരിടാൻ ഇരു സംസ്ഥാനങ്ങളിലുമായി മൂവായിരത്തോളം ദുരന്ത നിവാരണ സേനയെ വിന്യസിച്ചിട്ടുണ്ട്.
നാവിക സേനയുടെ വിദഗ്ദ്ധ സംഘം കൊൽക്കത്തയിൽ എത്തി. ആയിരത്തോളം ദുരിതാശ്വാസ ക്യാമ്പുകൾ തുറന്നു.
ഉംപുണ് ചുഴലിക്കാറ്റിനെ തുടര്ന്ന് ഒഡീഷ , പശ്ചിമബംഗാള് സംസ്ഥാനത്തേക്കുള്ള ശ്രമിക് ട്രെയിനുകൾ റദാക്കി.
കൊൽക്കത്ത തുറമുഖത്ത് ചരക്ക് നീക്കം നിർത്തിവച്ചു. വടക്കുകിഴക്കൻ സംസ്ഥാനങ്ങൾക്കും ജാഗ്രത നിർദ്ദേശം നൽകി.
അസം, ത്രിപുര, മേഘാലയ സംസ്ഥാനങ്ങളിൽ കനത്ത മഴക്ക് സാധ്യതയുണ്ടെന്നും കാലാവസ്ഥാ നിരീക്ഷണകേന്ദ്രം അറിയിച്ചു.
പ്രവചനങ്ങള് തെറ്റിച്ച് മണിക്കൂറില് 200 ലധികം വേഗത്തിലായിരുന്നു ഇടയ്ക്ക് കാറ്റ് വീശിയിരുന്നത്. എന്നാല് ഇന്ന് പകലോടെ വേഗതയില് അല്പം കുറവ് വന്നിട്ടുണ്ട്.
ഉംപുണിന്റെ സഞ്ചാരദിശയില് കേരളം വരുന്നില്ലെങ്കിലും സംസ്ഥാനത്ത് ശക്തമായ മഴയുണ്ടാകും എന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.
അതേസമയം, ഉംപുണിന്റെ ഫലമായി തമിഴ്നാട്ടില് ഉഷ്ണതരംഗം ഉണ്ടാവാന് സാധ്യതയുണ്ടെന്ന് മുന്നറിയിപ്പ്.
ചെന്നൈ ഉള്പ്പടെ തമിഴ്നാടിന്റെ വടക്കന് പ്രദേശങ്ങളിലും തെക്കന് ആന്ധ്രയിലും ഉഷ്ണതരംഗം ഉണ്ടാവും എന്നാണ് മുന്നറിയിപ്പ്. സാധാരണയിലും ചൂട് കൂടുന്നതോടെ ചെന്നൈയില് താപനില 43 ഡിഗ്രി വരെയെത്തും എന്നാണ് നിഗമനം.
ഒഡിഷ, പശ്ചിമ ബംഗാള് സംസ്ഥാനങ്ങള്ക്ക് പുറമെ അന്ഡമാന് നിക്കോബാര് ദ്വീപുകളിലും കനത്ത മഴ പ്രവചിച്ചിട്ടുണ്ട്. ഒഡിഷ, പശ്ചിമ ബംഗാള് സംസ്ഥാനങ്ങള്ക്ക് അതീവ ജാഗ്രതാ നിര്ദേശം നല്കി.
അപകടമേഖലയിലെ 12 ജില്ലകളില് നിന്ന് 11 ലക്ഷം പേരെ ഒഴിപ്പിക്കാനുള്ള തയ്യാറെടുപ്പുകള് നടത്തുകയാണെന്ന് ഒഡിഷ നേരത്തെ അറിയിച്ചിരുന്നു.
ചുഴലിക്കാറ്റിനെ നേരിടാന് ദേശീയ ദുരന്തനിവാരണ സേനയുടെ 10 സംഘങ്ങളെ ഒഡിഷയിലും ഏഴ് ടീമുകളെ പശ്ചിമ ബംഗാളിലും വിന്യസിച്ചിട്ടുണ്ട്. '