കരൾ രോഗങ്ങൾ ; ശരീരം കാണിക്കുന്ന ഈ ലക്ഷണങ്ങൾ അവഗണിക്കരുത്
മോശം ഭക്ഷണക്രമം, അമിതമായ മദ്യപാനം, ഹെപ്പറ്റൈറ്റിസ് ബി, സി പോലുള്ള വൈറല് അണുബാധകള് തുടങ്ങിയ ഘടകങ്ങള് കരള് രോഗങ്ങളുടെ വര്ധനവിനു കാരണമാകുന്നു.
![dont ignore these symptoms liver diseases dont ignore these symptoms liver diseases](https://static-ai.asianetnews.com/images/01gh1nwf02bbvfgdrh8acjsdhq/symptoms-of-liver-damage_363x203xt.jpg)
ശരീരത്തിലെ ഒരു നിർണായക അവയവമാണ് കരൾ. ശരീരത്തിൽ നിന്ന് മാലിന്യങ്ങൾ നീക്കം ചെയ്യുന്നതിനും ദഹനത്തിനും അവശ്യ പോഷകങ്ങൾ സംഭരിക്കുന്നതിനും സഹായിക്കുന്നു. കരൾ തകരാറിലായതിന്റെ ആദ്യ ലക്ഷണങ്ങൾ തിരിച്ചറിയുന്നത് രോഗം ഗുരുതരമാകുന്നതിന് തടയും.
മോശം ഭക്ഷണക്രമം, അമിതമായ മദ്യപാനം, ഹെപ്പറ്റൈറ്റിസ് ബി, സി പോലുള്ള വൈറൽ അണുബാധകൾ തുടങ്ങിയ ഘടകങ്ങൾ കരൾ രോഗങ്ങളുടെ വർധനവിനു കാരണമാകുന്നു.
' മഞ്ഞപ്പിത്തം, ഉയർന്ന ബിലിറൂബിൻ അളവ് കാരണം ചർമ്മവും കണ്ണും മഞ്ഞനിറമാകും. തുടർച്ചയായ വയറുവേദനയും വീക്കവും കരൾ പ്രശ്നങ്ങളെ സൂചിപ്പിക്കുന്നു...' - മുംബൈയിലെ പരേലിലുള്ള ഗ്ലോബൽ ഹോസ്പിറ്റലിലെ ലിവർ, പാൻക്രിയാസ്, കുടൽ ട്രാൻസ്പ്ലാൻറ് പ്രോഗ്രാമിന്റെയും ഹെപ്പറ്റോ-പാൻക്രിയാറ്റോ-ബിലിയറി സർജറിയുടെയും ഡയറക്ടർ ഡോ. ഗൗരവ് ചൗബൽ പറയുന്നു.
മഞ്ഞപ്പിത്തം, പാദങ്ങളിൽ നീർവീക്കം, വിശപ്പില്ലായ്മ, അപ്രതീക്ഷിതമായ ഭാരക്കുറവ്, ചൊറിച്ചിൽ, പേശികളുടെ ബലഹീനത, മുടികൊഴിച്ചിൽ, പേശീബലക്കുറവ്, വയറിന്റെ നീർക്കെട്ട്, മലത്തിലോ ഛർദ്ദിയിലോ രക്തസ്രാവം, കറുത്ത നിറത്തിലുള്ള മലം എന്നിവയെല്ലാം കരൾ രോഗത്തിന്റെ ലക്ഷണങ്ങളാണ്.
കരൾ തകരാറിന്റെ സങ്കീർണതകളിലൊന്ന് കരൾ അർബുദത്തിന്റെ വികാസമാണ്. ഇത് പ്രാരംഭ ഘട്ടത്തിൽ കണ്ടുപിടിക്കാൻ പ്രയാസമാണെന്ന് ഡോ. ഗൗരവ് ചൗബൽ പറഞ്ഞു.
മൂത്രത്തിന്റെയും മലത്തിന്റെയും നിറത്തിലുള്ള മാറ്റങ്ങൾ കരൾ രോഗത്തിന്റെ മറ്റൊരു ലക്ഷണമാണ്. ഇരുണ്ട മൂത്രം പിത്തരസം വിസർജ്ജനവുമായി ബന്ധപ്പെട്ട ഒരു പ്രശ്നത്തെ സൂചിപ്പിക്കാം. അതേസമയം ഇളം നിറത്തിലുള്ള മലം കുടലിൽ എത്തുന്ന ബിലിറൂബിന്റെ അഭാവത്തെ സൂചിപ്പിക്കാം. പെട്ടെന്ന് ഭാരം കുറയൽ, ക്ഷീണം, ബലഹീനത എന്നിവ കരൾ തകരാറിന്റെ മറ്റ് ലക്ഷണങ്ങളാണ്.
ഓക്കാനം, വിശപ്പില്ലായ്മ തുടങ്ങിയ ദഹനനാളത്തിന്റെ ലക്ഷണങ്ങൾ കരൾ തകരാറിനൊപ്പം ഉണ്ടാകാം. കൂടാതെ, പിത്തരസം ലവണങ്ങൾ ചർമ്മത്തിൽ അടിഞ്ഞുകൂടുന്നതിന്റെ ഫലമായി നിരന്തരമായ ചൊറിച്ചിൽ ഉണ്ടാകാം. കരൾ തകരാർ ഉണ്ടെങ്കിൽ അത് മാനസികാരോഗ്യത്തെയും ബാധിക്കാം. ഇത് ആശയക്കുഴപ്പത്തിലോ ശ്രദ്ധ കേന്ദ്രീകരിക്കാനുള്ള ബുദ്ധിമുട്ടിലേക്കോ നയിച്ചേക്കാം.
മേൽപറഞ്ഞ ലക്ഷണങ്ങൾ ഉള്ളവർ ഡോക്ടറെ സമീപിച്ച് ആവശ്യമായ നിർദ്ദേശങ്ങൾ തേടേണ്ടതാണ്.
കയ്പ്പാണെങ്കിലും ഗുണങ്ങളിൽ കേമൻ ; അറിയാം പാവയ്ക്കയുടെ ആരോഗ്യഗുണങ്ങൾ