Heart Disease : ഈ വെെറ്റമിന്റെ കുറവ് ഹൃദ്രോഗ സാധ്യത വർദ്ധിപ്പിക്കും

വെെറ്റമിൻ കെ (vitamin K) ഹൃദ്രോഗ സാധ്യത കുറയ്ക്കാൻ സഹായിക്കുന്നതായി പഠനങ്ങൾ പറയുന്നു. രക്തം കട്ടപിടിക്കുന്നതിനും മുറിവുകൾ ഉണങ്ങുന്നതിനും എല്ലുകളുടെ ആരോഗ്യത്തിനും ആവശ്യമായ ഒരു പ്രധാന പോഷകമാണ് വെെറ്റമിൻ കെ. 

heart attack

അടുത്ത കാലത്തായി ഹൃദയസംബന്ധമായ അസുഖങ്ങൾ വളരെ സാധാരണമാണ്. ആഗോളതലത്തിൽ മരണത്തിന്റെ പ്രധാന കാരണം ഹൃദയ സംബന്ധമായ അസുഖങ്ങളാണെന്ന് ലോകാരോഗ്യ സംഘടന (ഡബ്ല്യുഎച്ച്ഒ) വ്യക്തമാക്കുന്നു.ഗ്ലോബൽ ഹെൽത്ത് ബോഡി കണക്കുകൾ സൂചിപ്പിക്കുന്നത് 2019 ൽ 17.9 ദശലക്ഷം ആളുകൾ CVD ബാധിച്ച് മരിച്ചതായി ചൂണ്ടിക്കാട്ടുന്നു. ഇത് ആഗോള മരണങ്ങളിൽ 32% പ്രതിനിധീകരിക്കുന്നു. ഈ മരണങ്ങളിൽ 85 ശതമാനവും ഹൃദയാഘാതവും പക്ഷാഘാതവും മൂലമാണ്.

ഹൃദയാഘാതം, ഹൃദയസ്തംഭനം തുടങ്ങിയ ഹൃദയസംബന്ധമായ പ്രശ്നങ്ങൾക്ക് കീഴടങ്ങുന്ന യുവാക്കളുടെ എണ്ണത്തിൽ വർദ്ധനയുണ്ടായതിനാൽ ഹൃദയാരോഗ്യം മെച്ചപ്പെടുത്തുന്നതിന് ശരിയായ ശ്രദ്ധയും ജാഗ്രതയും പാലിക്കേണ്ടത് വളരെ പ്രധാനമാണ്. വിറ്റാമിൻ കെ ഹൃദ്രോഗ സാധ്യത കുറയ്ക്കാൻ സഹായിക്കുന്നതായി പഠനങ്ങൾ പറയുന്നു. 

രക്തം കട്ടപിടിക്കുന്നതിനും മുറിവുകൾ ഉണങ്ങുന്നതിനും എല്ലുകളുടെ ആരോഗ്യത്തിനും ആവശ്യമായ ഒരു പ്രധാന പോഷകമാണ് വെെറ്റമിൻ കെ. വെെറ്റമിൻ കെ അസ്ഥികളുടെ വികസനം, ഹൃദയാരോഗ്യം എന്നിവയിൽ ഉൾപ്പെട്ടിരിക്കുന്ന കൊഴുപ്പ് ലയിക്കുന്ന സംയുക്തങ്ങളുടെ ഒരു കൂട്ടത്തെ സൂചിപ്പിക്കുന്നതായി നാഷണൽ ലൈബ്രറി ഓഫ് മെഡിസിനിൽ പ്രസിദ്ധീകരിച്ച പഠനത്തിൽ പറയുന്നു.

വെെറ്റമിൻ കെയുടെ കുറവ് ഗണ്യമായ രക്തസ്രാവം, മോശം അസ്ഥി വികസനം, ഓസ്റ്റിയോപൊറോസിസ്, ഹൃദയ സംബന്ധമായ അസുഖങ്ങൾക്കുള്ള സാധ്യത എന്നിവയ്ക്ക് കാരണമാകും. വിറ്റാമിൻ കെ അടങ്ങിയ ഭക്ഷണങ്ങൾ കഴിക്കുന്ന ആളുകൾക്ക് രക്തപ്രവാഹത്തിന് 34% സാധ്യത കുറവാണെന്ന് കണ്ടെത്തിയതായി ന്യൂ എഡിത്ത് കോവൻ യൂണിവേഴ്‌സിറ്റിയിലെ (ഇസിയു) ഗവേഷകർ നടത്തിയ പഠനത്തിൽ പറയുന്നു.

രക്തപ്രവാഹത്തിനും തുടർന്നുള്ള ഹൃദയ രോഗങ്ങൾക്കും എതിരായ സംരക്ഷണത്തിന് കൂടുതൽ വെെറ്റമിൻ കെ അടങ്ങിയ ഭക്ഷണങ്ങൾ കഴിക്കുന്നത് പ്രധാനമാണെന്ന് കണ്ടെത്തലുകൾ സൂചിപ്പിക്കുന്നുവെന്ന് ​ഗവേഷകൻ ഡോ. നിക്കോള ബോണ്ടോണോ പറഞ്ഞു. അനാരോഗ്യകരമായ ഭക്ഷണക്രമം, പുകയില ഉപയോഗം, മദ്യപാനം എന്നിവ ഹൃദ്രോഗത്തിനും പക്ഷാഘാതത്തിനും കാരണമാകുന്ന ചില അപകട ഘടകങ്ങളാണെന്ന് ലോകാരോഗ്യ സംഘടന ചൂണ്ടിക്കാട്ടുന്നു.

ഉയർന്ന രക്തസമ്മർദ്ദം, ഉയർന്ന രക്തത്തിലെ ഗ്ലൂക്കോസ്, വർദ്ധിച്ച രക്തത്തിലെ ലിപിഡുകൾ, പൊണ്ണത്തടി എന്നിവയും ഹൃദ്രോ​ഗ സാധ്യത കൂട്ടുന്നു. പുകയില ഉപയോഗം നിർത്തുക, ഭക്ഷണത്തിൽ ഉപ്പ് കുറയ്ക്കുക, കൂടുതൽ പഴങ്ങളും പച്ചക്കറികളും കഴിക്കുക എന്നിവ ഹൃദയ സംബന്ധമായ അസുഖങ്ങൾ കുറയ്ക്കുകയും ചെയ്യുന്നു.

വെെറ്റമിൻ കെ അടങ്ങിയ ഭക്ഷണങ്ങൾ കഴിക്കുന്ന ആളുകൾക്ക് ഹൃദയ ധമനികളിൽ ബ്ലോക്ക് ഉണ്ടാകാനും ഹൃദയ സംബന്ധമായ അസുഖങ്ങൾ വരാനുള്ള സാധ്യത കുറവാണെന്ന് കണ്ടെത്തിയതായി യൂണിവേഴ്സിറ്റി ഓഫ് വെസ്റ്റേൺ ഓസ്ട്രേലിയയിലെ ഗവേഷകൻ ഡോ. ജാമി ബെല്ലിഞ്ച് പറഞ്ഞു.

മിക്ക ഇലക്കറികളിലും വെെറ്റമിൻ കെ ധാരാളം ഉണ്ടെങ്കിലും കേൽ, കാബേജ്, ബ്രൊക്കോളി മുതലായവയിൽ എല്ലാത്തരം പോഷകങ്ങളും അടങ്ങിയിരിക്കുന്നു. വൈറ്റമിൻ എ, ബി, ഇ, കൂടാതെ മഗ്നീഷ്യം, ഫോളേറ്റ്, അയൺ എന്നിവയും ഇവയിൽ അടങ്ങിയിരിക്കുന്നു. പാലുൽപന്നങ്ങളിലും മുട്ടയിലും വൈറ്റമിൻ കെ ധാരാളമുണ്ട്.