മാർക്കറ്റിൽ വച്ച് ഉദ്യോഗസ്ഥനെ ചെരുപ്പൂരി അടിച്ച് ബിജെപി വനിതാ നേതാവ്; വീഡിയോ
കാര്ഷികോല്പാദന മാര്ക്കറ്റ് കമ്മിറ്റി അംഗമായ സുല്ത്താന് സിംഗിനെതിരെ കര്ഷകര് നല്കിയ പരാതിയുടെ അടിസ്ഥാനത്തില് പരിശോധനയ്ക്ക് എത്തിയതായിരുന്നു സോനാലി.
ചണ്ഡിഗഡ്: ബിജെപി നേതാവും ടിക് ടോക് താരവുമായ സോനാലി ഫോഗാട്ട് ഉദ്യോഗസ്ഥനെ ചെരുപ്പൂരി അടിക്കുന്ന വീഡിയോ സമൂഹമാധ്യമങ്ങളിൽ വൈറൽ. ഹരിയാനയിലെ അഡാംപൂര് മാർക്കറ്റിലെ ഉദ്യോഗസ്ഥനായ സുൽത്താൻ സിംഗിനെയാണ് സോനാലി മർദ്ദിച്ചത്. സോനാലി ഫോഗാട്ട് കാര്ഷിക വിപണി പരിശോധിക്കുന്നതിനിടെ ആയിരുന്നു സംഭവം.
കാര്ഷികോല്പാദന മാര്ക്കറ്റ് കമ്മിറ്റി അംഗമായ സുല്ത്താന് സിംഗിനെതിരെ കര്ഷകര് നല്കിയ പരാതിയുടെ അടിസ്ഥാനത്തില് പരിശോധനയ്ക്ക് എത്തിയതായിരുന്നു സോനാലി. ഇതിനിടെ ആക്ഷേപകരമായ അഭിപ്രായം പറഞ്ഞെന്ന് ആരോപിച്ചാണ് സോനാലി ഇയാളെ മർദ്ദിച്ചതെന്ന് എൻഡിടിവി റിപ്പോർട്ട് ചെയ്യുന്നു.
ബഞ്ചിലിരിക്കുന്ന ഉദ്യോഗസ്ഥനെ സോനാലി ആവർത്തിച്ച് മർദ്ദിക്കുന്നത് വീഡിയോയിൽ കാണാം. പരാതികള് ശ്രദ്ധയില്പെട്ടിട്ടുണ്ടെന്നും പരിഹരിക്കുമെന്നും പറഞ്ഞ് ഉദ്യോഗസ്ഥന് സോനാലിയോട് അപേക്ഷിക്കുന്നതും വീഡിയോയില് കാണാം. നിരവധി പേര് നോക്കിനില്ക്കെയാണ് സോനാലി ഇയാളെ ചെരിപ്പൂരി തല്ലിയത്. പിന്നാലെ സോനാലി പൊലീസിനെ വിളിച്ചുവരുത്തുകയും സിംഗിനെതിരെ പരാതി നൽകുകയും ചെയ്തു.
അതേസമയം, സോനാലിക്കെതിരെ നടപടിയെടുക്കണമെന്ന് ആവശ്യപ്പെട്ട് കോൺഗ്രസ് നേതാവ് രണ്ദീപ് സിംഗ് സുര്ജേവാല രംഗത്തെത്തി. "ഖട്ടാര് സര്ക്കാരിന്റെ ശല്യപ്പെടുത്തുന്ന പ്രവൃത്തികളാണിത്. ഹിസാറിലെ ബിജെപി നേതാവ് അഡാംപൂര് മാര്ക്കറ്റ് കമ്മിറ്റി സെക്രട്ടറിയെ മൃഗത്തെപ്പോലെ മര്ദ്ദിക്കുകയാണ്. സര്ക്കാര് ഉദ്യോഗസ്ഥനാവുന്നത് കുറ്റകരമാണോ? ഖട്ടാര് ഇതിനെതിരേ നടപടിയെടുക്കുമോ? മാധ്യമങ്ങള് നിശബ്ദത പാലിക്കുമോ?" എന്ന് രണ്ദീപ് സിംഗ് സുര്ജേവാല ട്വീറ്റ് ചെയ്തു.