തെരഞ്ഞെടുപ്പ് അട്ടിമറി ആരോപിച്ച് പ്രധാനമന്ത്രിക്കും അമിത് ഷായ്ക്കും മുഖ്യ തെരഞ്ഞെടുപ്പ് കമ്മീഷണർക്കുമെതിരെ രാഹുൽ ഗാന്ധി രംഗത്തെത്തി. ഇതിന് മറുപടിയായി കേരളത്തിലെ വോട്ടർപട്ടികയിൽ ക്രമക്കേട് നടന്നെന്ന് രാഹുൽ സമ്മതിക്കുമോ എന്ന് ബിജെപി ചോദിച്ചു.
ദില്ലി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനും നരേന്ദ്ര മോദിക്കും അമിത് ഷാക്കുമെതിരെ രംഗത്തെത്തിയ പ്രതിപക്ഷ നേതാവ് രാഹുൽ ഗാന്ധിക്കെതിരെ ബിജെപി. കേരളത്തിലെ വോട്ടർപട്ടികയിൽ ക്രമക്കേട് നടന്നെന്ന് രാഹുൽ ഗാന്ധിക്ക് പറയാനാകുമോയെന്നും തിരുവനന്തപുരത്ത് എസ്ഐആർ നടന്നതുകൊണ്ടാണ് വിജയിച്ചതെന്ന് ശശി തരൂർ പറയുന്ന ദൃശ്യങ്ങളുണ്ടെന്നും ബിജെപി വ്യക്തമാക്കി.
രാഹുലിന് ഇന്ത്യൻ രാഷ്ട്രീയത്തെ പറ്റി ധാരണയില്ല. കോൺഗ്രസ് ഘട്ടം ഘട്ടമായി തളർന്നപ്പോൾ ബിജെപി പതിറ്റാണ്ടുകളെടുത്ത് ഘട്ടം ഘട്ടമായാണ് വളർന്നതെന്നും സുധാൻശു ത്രിവേദി പറഞ്ഞു. ഭരണ വിരുദ്ധവികാരം ഇല്ലാതാകുന്നുവെന്ന വാദം ബാലിശമാണെന്നും അദ്ദേഹം വ്യക്തമാക്കി.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കണമെന്ന് പ്രതിപക്ഷ നേതാവ് രാഹുൽ ഗാന്ധി ആവശ്യപ്പെട്ട് രംഗത്തെത്തിയിരുന്നു. തെരഞ്ഞെടുപ്പുകൾ അട്ടിമറിച്ച പ്രധാനമന്ത്രി നരേന്ദ്ര മോദിക്കും ആഭ്യന്തര മന്ത്രി അമിത് ഷായ്ക്കുമെതിരെ സമഗ്ര അന്വേഷണം നടക്കണമെന്നും ഈ ഗൂഢാലോചനയുടെ തലപ്പത്ത് മോദിയും അമിത് ഷായുമാണ് ഉള്ളതെന്നും രാഹുൽ ആരോപിച്ചു. ദില്ലിയിൽ വാർത്താ സമ്മേളനത്തിലാണ് രാഹുലിന്റെ ആരോപണം. വോട്ടർപട്ടികയിൽ നിന്ന് പേരുകൾ നീക്കിയതിനെ രണ്ട് കമ്മീഷണർമാർ എതിർത്തുവെന്നതാണ് ഇന്ത്യൻ എക്സ്പ്രസ് വാർത്ത. താൻ ഉന്നയിച്ച വോട്ട് ചോരിയും വിരൽ ചൂണ്ടിയത് അക്കാര്യം തന്നെ.
വോട്ട് ചോരി മാത്രമല്ല കാനൂൻ ചോരിയും നടന്നിരിക്കുന്നു. ഭരണഘടനാ സ്ഥാപനങ്ങളെ ഇവർ തകർത്ത കാര്യത്തിൽ യാതൊരു സംശയവുമില്ല. ഭാവി ജനങ്ങൾ നിങ്ങളെ ശിക്ഷിക്കും. താൻ പറയുന്നത് ഭാവനയല്ല, വ്യക്തമായ വസ്തുതയാണെന്നും രാഹുൽ ഗാന്ധി പറഞ്ഞു. ബിജെപി സര്ക്കാര് 30 മുതല് 50 വര്ഷം വരെ ഭരിക്കുമെന്ന അമിത് ഷായുടെ വീഡിയോ പ്രദര്ശിപ്പിച്ചാണ് രാഹുല് ഗാന്ധി ആരോപണങ്ങൾ ഉന്നയിച്ചത്.
