കൊവിഡ് പോസിറ്റീവ് സ്ഥിരീകരിച്ച യുവതി ഇരട്ടക്കുട്ടികൾക്ക് ജന്മം നൽകി; കുഞ്ഞുങ്ങൾ കൊവിഡ് നെഗറ്റീവ്
ആദ്യമായിട്ടാണ് എംസിഎച്ച് ആശുപത്രിയിൽ കൊവിഡ് പോസിറ്റീവായ സ്ത്രീയെ ശസ്ത്രക്രിയക്ക് വിധേയയാക്കുന്നത്. കുഞ്ഞുങ്ങളുടെ ആരോഗ്യനിലയിൽ പ്രശ്നങ്ങളൊന്നുമില്ലെന്ന് മെഡിക്കൽ സൂപ്രണ്ട് ഡോ അരുൺ ശർമ്മ പറഞ്ഞു.
ശ്രീനഗർ: കൊവിഡ് പോസിറ്റീവായ യുവതി ഇരട്ട പെൺകുട്ടികൾക്ക് ജന്മം നൽകി. ജമ്മു ഗാന്ധിനഗറിലെ എംസിഎച്ച് ഹോസ്പിറ്റലിൽ സിസേറിയനിലൂടെയാണ് കുഞ്ഞുങ്ങൾ ജനിച്ചത്. കുഞ്ഞുങ്ങൾ ആരോഗ്യവതികളാണെന്ന് ഡോക്ടർമാർ പറഞ്ഞു. എംസിഎച്ച് ആശുപത്രിയിലെ സാങ്കേതിക വിദഗ്ധരുടെ സഹായത്തോടെ ജമ്മുവിലെ ശ്രീ മഹാരാജ ഗുലാബ് സിംഗ് ആശുപത്രിയിലെയും സർക്കാർ മെഡിക്കൽ കോളേജ് ആശുപത്രിയിലെയും ഡോക്ടർമാരുടെ വിദ്ഗ്ധ സംഘമാണ് ശസ്ത്രക്രിയ വിജയകരമായി പൂർത്തിയാക്കിയത്. ഡോക്ടർ ഹുമ, ഡോ. മേഘ, ഡോ. മോണിക്ക സുഷി, ഡോ കാർത്തിക് എന്നിവരാണ് ഡോക്ടർമാരുടെ സംഘത്തിലുൾപ്പെട്ടവർ.
ആദ്യമായിട്ടാണ് എംസിഎച്ച് ആശുപത്രിയിൽ കൊവിഡ് പോസിറ്റീവായ സ്ത്രീയെ ശസ്ത്രക്രിയക്ക് വിധേയയാക്കുന്നത്. കുഞ്ഞുങ്ങളുടെ ആരോഗ്യനിലയിൽ പ്രശ്നങ്ങളൊന്നുമില്ലെന്ന് മെഡിക്കൽ സൂപ്രണ്ട് ഡോ അരുൺ ശർമ്മ പറഞ്ഞു. 'ശസ്ത്രക്രിയക്ക് ശേഷം അമ്മയും കുഞ്ഞുങ്ങളും സുഖമായിരിക്കുന്നു. കുഞ്ഞുങ്ങൾ കൊവിഡ് നെഗറ്റീവാണ്. അമ്മ കൊവിഡ് പോസിറ്റീവായി തുടരുന്നതിനാൽ കുഞ്ഞുങ്ങളെ മാറ്റി സൂക്ഷിച്ചിരിക്കുകയാണ്.' ഡോ അരുൺ വെളിപ്പെടുത്തി.
കഴിഞ്ഞ ഒരു വർഷത്തിനിടയിൽ എഴുന്നൂറിലധികം കൊവിഡ് രോഗികൾക്കാണ് എംസിഎച്ച് ഹോസ്പിറ്റൽ ചികിത്സ നൽകിയത്. 2020 മുതൽ ഇവിടെ കൊവിഡ് ആശുപത്രിയാക്കി മാറ്റിയിരിക്കുകയാണ്.
