വലിയ ട്രക്കിൽ വൃദ്ധരായ സ്ത്രീകളുമായെത്തി അവരെ ഇറക്കിവിട്ട് പോകാൻ ശ്രമിക്കുന്നതിനിടെ നാട്ടുകാർ തടയുകയും സംഭവം കണ്ടുനിന്നവർ ക്യാമറയിൽ പകർത്തുകയുമായിരുന്നു.
ഇൻഡോർ: ഇന്ത്യയിലെ ഏറ്റവും വൃത്തിയുള്ള നഗരമെന്ന് നഗരകാര്യമന്ത്രാലയം തുടർച്ചയായ നാല് വർഷവും തിരഞ്ഞെടുത്ത ഇൻഡോറിൽ നിന്ന് പുറത്തുവരുന്നത് ഞെട്ടിക്കുന്ന കാഴ്ചകൾ. ഇൻഡോർ മുൻസിപ്പൽ ജീവനക്കാർ അനാഥരായ വൃദ്ധരെ നഗരത്തിന് പുറത്ത് ഉപേക്ഷിക്കാൻ ശ്രമിക്കുന്നതിന്റെ വീഡിയോയാണ് പുറത്തുവന്നിരിക്കുന്നത്. വലിയ ട്രക്കിൽ വൃദ്ധരായ സ്ത്രീകളുമായെത്തി അവരെ ഇറക്കിവിട്ട് പോകാൻ ശ്രമിക്കുന്നതിനിടെ നാട്ടുകാർ തടയുകയും സംഭവം കണ്ടുനിന്നവർ ക്യാമറയിൽ പകർത്തുകയുമായിരുന്നു.
ക്ഷിപ്ര മേഖലയിലാണ് ഇവരെ ഉപേക്ഷിക്കാൻ ശ്രമിച്ചത്. ഇത് പ്രദേശവാസികൾ തടഞ്ഞതോടെ വൃദ്ധരെ തിരിച്ചുകൊണ്ടുപോകാൻ ജീവനക്കാർ നിർബന്ധിതരാകുകയായിരുന്നു. സർക്കാരിന്റെ ഭാഗത്തുനിന്നുണ്ടായ ഇത്തരമൊരു പ്രവർത്തിയിൽ നാട്ടുകാർ പ്രതിഷേധവുമായെത്തി.
അതേസമയം വീടില്ലാത്ത വൃദ്ധരെ നൈറ്റ് ഷെൽട്ടറിലേക്ക് മാറ്റുകയായിരുന്നുവെന്നാണ് മുൻസിപ്പൽ കോർപ്പറേഷൻ അഡീഷണൽ കമ്മീഷണർ അഭയ് രാജാങ്കേൺകർ വിശദീകരിച്ചത്. അവരെ നഗരത്തിന് പുറത്ത് ഉപേക്ഷിക്കാൻ ശ്രമിച്ചുവെന്ന നാട്ടുകാരുടെ ആരോപണം അദ്ദേഹം തള്ളി. സംഭവത്തിൽ ബിജെപി സർക്കാരിനെ വിമർശിച്ച് പ്രതിപക്ഷമായ കോൺഗ്രസ് രംഗത്തെത്തി.
