ലോക്ക് ഡൗൺ: ബന്ധുക്കളെത്തിയില്ല; വിവാഹത്തിന് വധുവിന് ബന്ധുക്കളായി പൊലീസ് ഉദ്യോഗസ്ഥർ
വധുവിന്റെ മാതാപിതാക്കൾ ജീവിച്ചിരിപ്പില്ല. യാത്രാനിയന്ത്രണങ്ങൾ നിലവിലുള്ളത് കൊണ്ട് ബന്ധുക്കൾക്ക് വിവാഹത്തിനെത്താൻ സാധിച്ചില്ല.
നാഗ്പൂർ: ലോക്ക് ഡൗൺ പ്രഖ്യാപിച്ച സാഹചര്യത്തിൽ ബന്ധുക്കൾക്ക് വിവാഹത്തിന് എത്തിച്ചേരാൻ കഴിയാത്തതിനെ തുടർന്ന് വധുവിന് ബന്ധുക്കളായത് പൊലീസ് ഉദ്യോഗസ്ഥർ. നാഗ്പൂരിലാണ് സംഭവം. മാതാപിതാക്കളില്ലാത്ത യുവതിക്ക് ബന്ധുക്കൾ മാത്രമാണുള്ളത്. നാഗ്പൂർ പൊലീസ് ഡിപ്പാർട്ട്മെന്റ് തങ്ങളുടെ ഔദ്യോഗിക ട്വിറ്റര് പേജിലാണ് ഈ സംഭവം പങ്കുവച്ചിരിക്കുന്നത്.
'വധുവിന്റെ മാതാപിതാക്കൾ ജീവിച്ചിരിപ്പില്ല. യാത്രാനിയന്ത്രണങ്ങൾ നിലവിലുള്ളത് കൊണ്ട് ബന്ധുക്കൾക്ക് വിവാഹത്തിനെത്താൻ സാധിച്ചില്ല. അവരുടെ അസാന്നിദ്ധ്യം നാഗ്പൂർ പൊലീസ് പരിഹരിച്ചു കൊടുത്തു. സ്റ്റേഷനിലെ പൊലീസ് ഉദ്യോഗസ്ഥരുൾപ്പെടെയുള്ള ജീവനക്കാർ വിവാഹത്തിൽ പങ്കെടുത്തു.' പൊലീസ് ട്വിറ്ററിൽ കുറിച്ചു. നിരവധി ആളുകളാണ് പൊലീസിന്റെ നല്ല മനസ്സിനെ പ്രകീർത്തിച്ച് ട്വിറ്ററിൽ കമന്റ് ചെയ്തിരിക്കുന്നത്. കൊറോണ വൈറസ് വ്യാപനത്തിനെതിരെയുള്ള പ്രതിരോധ പ്രവർത്തനങ്ങളിൽ മുൻനിരയിൽ പ്രവർത്തിക്കുന്ന പൊലീസിനെ അഭിനന്ദിക്കുകയും ചെയ്യുന്നുണ്ട് നിരവധിയാളുകൾ.
