'എവിടെ നിന്ന് വന്നു ഈ കൊറോണ; വൈറലായി 'കൊവിഡ് ഭജൻ'- വീഡിയോ
കൊറോണയെ പ്രതിരോധിക്കാൻ സ്വീകരിക്കേണ്ട വ്യക്തി ശുചിത്വ രീതികളെക്കുറിച്ചും അദ്ദേഹം ഭജനിലൂടെ തന്നെ വിവരിക്കുന്നുണ്ട്.
കൊവിഡ് 19 ബാധിച്ചവരുടെ എണ്ണം വർദ്ധിച്ചുവരുന്ന സാഹചര്യത്തിൽ കരുതലും ജാഗ്രതയും ശക്തമാക്കിയിരിക്കുകയാണ് കേന്ദ്ര- സംസ്ഥാന സർക്കാരുകൾ. വൈറസ് വ്യാപനം തടയുന്നതിന് ശക്തമായ പ്രതിരോധ പ്രവർത്തനങ്ങളാണ് ഓരോ രാജ്യങ്ങളും കൈ കൊണ്ടിരിക്കുന്നത്. എന്തും ഏതും കൊറോണയുമായി ബന്ധപ്പെട്ട് കിടക്കുന്ന ഈ സാഹചര്യത്തിൽ ഇപ്പോൾ സമൂഹമാധ്യമങ്ങളിൽ വൈറലാകുന്നത് ഒരു ഭജൻ ആണ്.
പ്രമുഖ ഭജൻ ഗായകനായ നരേന്ദ്ര ചഞ്ചൽ ദില്ലിയിലെ പഹർഗഞ്ചിൽ നടന്ന ഹോളി ആഘോഷങ്ങൾക്കിടെ ആലപിച്ച ഒരു ഭജൻ ആണിത്. 'ദേവി ഈ കൊറോണ ഇപ്പോള് എവിടെ നിന്ന് വന്നു' എന്നാണ് ഭജനിലെ ഒരു വരി. 'ഡെങ്കി ഉണ്ടായി.. പന്നിപ്പനി ഉണ്ടായി.. ചിക്കുൻഗുനിയയും പരിഭ്രാന്തി ഉണ്ടാക്കി... എല്ലാം വാർത്തകൾ സൃഷ്ടിച്ചു.. പക്ഷെ ഈ കൊറോണ ഇപ്പോൾ എവിടെ നിന്ന് വരുന്നു...' എന്നിങ്ങനെ നീളുന്നു ഭജൻ.
ഇതിന് പുറമെ കൊറോണയെ പ്രതിരോധിക്കാൻ സ്വീകരിക്കേണ്ട വ്യക്തി ശുചിത്വ രീതികളെക്കുറിച്ചും അദ്ദേഹം ഭജനിലൂടെ തന്നെ വിവരിക്കുന്നുണ്ട്. ഏതായാലും കൊറോണ ഭജൻ സമൂഹമാധ്യമങ്ങൾ ഏറ്റെടുത്ത് കഴിഞ്ഞു.