'ആര്‍ക്കും എന്നെ അറസ്റ്റ് ചെയ്യാന്‍ സാധിക്കില്ല'; വെല്ലുവിളിച്ച് രാം ദേവ്
ആധുനികചികിത്സ വിഡ്ഢിത്തരമാണെന്ന രാംദേവിന്റെ പ്രസ്താവനയിലാണ് സോഷ്യൽ മീഡിയയിൽ വിമർശനം ശക്തമായത്. രാംദേവിന്റെ പ്രസ്താവനയ്ക്കെതിരേ ഇന്ത്യൻ മെഡിക്കൽ അസോസിയേഷനും രംഗത്തുവന്നിരുന്നു.
ദില്ലി: സമൂഹമാധ്യമങ്ങളിൽ "അറസ്റ്റ് രാംദേവ്' എന്ന ഹാഷ്ടാഗ് ട്രെൻഡിംഗായതോടെ വെല്ലുവിളിയുമായി യോഗ ഗുരു ബാബ രാംദേവ്. അറസ്റ്റ് ചെയ്യാൻ വെല്ലുവിളിച്ചുകൊണ്ടുള്ള രാംദേവിന്റെ വീഡിയോ വൈറലാകുകയാണ്. രാംദേവിന്റെ വെല്ലുവിളിക്കെതിരേ സമൂഹമാധ്യമങ്ങളിൽ രൂക്ഷ വിമർശനമാണ് ഉയരുന്നത്.
ആധുനികചികിത്സ വിഡ്ഢിത്തരമാണെന്ന രാംദേവിന്റെ പ്രസ്താവനയിലാണ് സോഷ്യൽ മീഡിയയിൽ വിമർശനം ശക്തമായത്. രാംദേവിന്റെ പ്രസ്താവനയ്ക്കെതിരേ ഇന്ത്യൻ മെഡിക്കൽ അസോസിയേഷനും രംഗത്തുവന്നിരുന്നു. രാംദേവ് 15 ദിവസത്തിനകം മാപ്പ് പറഞ്ഞില്ലെങ്കിൽ നഷ്ടപരിഹാരമായി 1000 കോടി ആവശ്യപ്പെട്ട് ഉത്തരാഖണ്ഡ് ഐംഎഎ ഘടകം നോട്ടീസ് അയക്കുകയും ചെയ്തു. ഇതിനിടെയാണ് സമൂഹമാധ്യമങ്ങളിൽ "അറസ്റ്റ് രാംദേവ്' എന്ന ഹാഷ്ടാഗ് ട്രെൻഡിംഗിലെത്തിയത്.
അതേ സമയം തന്നെയാണ് വിവാദ വീഡിയോ എത്തുന്നത്. വീഡിയോയിൽ ബാബ രാം ദേവി‍ന്റെതായി പുറത്തുവരുന്ന വാക്കുകൾ ഇങ്ങനെയാണ്, ഒരാൾക്കും സാധിക്കില്ല, തെളിച്ച് പറ‍ഞ്ഞാൽ അവരുടെ പിതാക്കന്മാർക്കും സാധിക്കില്ല, പക്ഷെ, അറസ്റ്റ് രാംദേവ് എന്നൊക്കെ പറഞ്ഞ് അവർ ശബ്ദം ഉണ്ടാക്കിക്കൊണ്ടിരിക്കും. അവർ ട്രെന്റിന് പിന്നാലെയാണ്, അവരെ അങ്ങനെ വിടുക.
കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്‌ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്‌സിൻ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യർത്ഥിക്കുന്നു. ഒന്നിച്ച് നിന്നാൽ നമുക്ക് ഈ മഹാമാരിയെ തോൽപ്പിക്കാനാവും. #BreakTheChain #ANCares #IndiaFightsCorona
