ശ്രീനഗറിൽ വീണ്ടും ഭീകരരുടെ ആക്രമണം; 29 വയസുള്ള പൊലീസുകാരനെ കൊലപ്പെടുത്തി
29 വയസുള്ള തൗഫീഖാണ് കൊല്ലപ്പെട്ടത്. ശ്രീനഗറിലെ ബട്ടമാലു മേഖലയിലാണ് സംഭവം ഉണ്ടായത്. പ്രദേശത്ത് ഭീകരര്‍ക്കായി തെരച്ചില്‍ ശക്തമാക്കി.
ശ്രീനഗർ: ജമ്മു കശ്മീരിലെ (Jammu and Kashmir) ശ്രീനഗറിൽ (Srinagar) പൊലീസുകാരനെ ഭീകരർ (terrorist) വെടിവച്ചു കൊന്നു. 29 വയസുള്ള തൗഫീഖാണ് കൊല്ലപ്പെട്ടത്. ശ്രീനഗറിലെ ബട്ടമാലു മേഖലയിലാണ് സംഭവം ഉണ്ടായത്. പ്രദേശത്ത് ഭീകരര്‍ക്കായി തെരച്ചില്‍ ശക്തമാക്കിയെന്ന് ഉദ്യോഗസ്ഥർ പറഞ്ഞു. ആക്രമണത്തെ ജമ്മു & കാശ്മീർ നാഷണൽ കോൺഫറൻസ് പാർട്ടി അപലപിച്ചു.
ഇന്നലെയും ശ്രീനഗറില്‍ സുരക്ഷ സേനക്ക് നേരെ വീണ്ടും ഭീകരാക്രമണം ഉണ്ടായിരുന്നു. ബെമീനയിലെ എസ്‍കെഐഎംഎസ് ആശുപത്രിക്ക് സമീപമുണ്ടായിരുന്ന സുരക്ഷ സേനക്ക് നേരെ ഭീകരർ വെടിയുതിര്‍ക്കുകയായിരുന്നു. വലിയ ആക്രമണം ഉണ്ടായില്ലെന്നും സുരക്ഷ സേനക്ക് നേരെ വെടിയുതിര്‍ത്ത ശേഷം ഭീകരര്‍ ആള്‍ക്കൂട്ടത്തിലൂടെ രക്ഷപ്പെട്ടതായും ശ്രീനഗർ പൊലീസ് അറിയിച്ചു.
കഴിഞ്ഞ മൂന്ന് ആഴ്ചക്കിടെ പൂഞ്ചില്‍ സൈനീകര്‍ക്ക് നേരെ നടന്ന ആക്രമണത്തില്‍ മലയാളി അടക്കം 11 സൈനീകരാണ് വീരമൃത്യു വരിച്ചത്. ഇതോടൊപ്പം സാധാരണക്കാരെ ലക്ഷ്യമിട്ട് നഗരപ്രദേശങ്ങളിലും ഭീകരര്‍ ആക്രമണം നടത്തുന്നുണ്ട്. ഒക്ടോബർ മാസം മാത്രം 11 സാധാരണക്കാരാണ് കൊല്ലപ്പെട്ടത്.
