പരാതിയിലുറച്ച് യുവതി; സൈബര് തെളിവുകളും ഹാജരാക്കി; നടന് വിനായകനെ അറസ്റ്റ് ചെയ്തേക്കും
ഒരു പരിപാടിക്ക് ക്ഷണിക്കാൻ വേണ്ടി വിളിച്ചുപ്പോൾ അസഭ്യം പറഞ്ഞെന്നും അശ്ലീലച്ചുവയോടെ സംസാരിച്ചെന്നുമായിരുന്നു യുവതി പരാതിപ്പെട്ടത്. കൽപ്പറ്റ പൊലീസാണ് കേസ് റജിസ്റ്റർ ചെയ്തത്.
കല്പ്പറ്റ: ഫോണിലൂടെ അശ്ലീലചുവയോടെ സംസാരിച്ചെന്ന യുവതിയുടെ പരാതിയിൽ നടൻ വിനായകനെ അറസ്റ്റ് ചെയ്യാൻ അന്വേഷണ സംഘം ഒരുങ്ങുന്നു. യുവതിയുടെ മൊഴി പോലീസ് കഴിഞ്ഞ ദിവസം രേഖപ്പെടുത്തിയിരുന്നു. കേട്ടാൽ അറയ്ക്കുന്ന രീതിയിൽ നടൻ തന്നോട് സംസാരിച്ചെന്നു യുവതിയുടെ മൊഴി. വിനായകന് സംസാരിച്ച ഫോണ് റെക്കോർഡ് പൊലീസിന് മുന്നിൽ യുവതി ഹാജരാക്കിയിരുന്നു.
കഴിഞ്ഞ ഏപ്രില്മാസം വയനാട്ടില് ദളിത് പെൺകുട്ടികള്ക്കായി സംഘടിപ്പിച്ച ക്യാമ്പിലേക്ക് ക്ഷണിക്കുന്നതിനായി വിനായകനെ ഫോണില് വിളിച്ചപ്പോള് ലൈഗിക ചുവയോടെ സംസാരിച്ചെന്നാണ് യുവതിയുടെ പരാതി. തുടർന്ന് കേസ് രജിസ്റ്റർ ചെയ്ത കല്പ്പറ്റ പോലീസ് സ്ത്രീയോട് മോശമായി സംസാരിച്ചുവെന്നതടക്കം നാല് വകുപ്പുകളാണ് നടനെതിരെ ചുമത്തിയത്. ഐപിസി 509, 294 ബി, കെപിഎ 120 എന്നീ വകുപ്പുകളാണ് ചുമത്തിയിരിക്കുന്നത്.
കഴിഞ്ഞ ദിവസം യുവതിയുടെ വീട്ടിലെത്തി പോലീസ് മൊഴിയും രേഖപ്പെടുത്തി. കേട്ടാലറയ്ക്കുന്ന ഭാഷയില് വിനായകന് തന്നോട് സംസാരിച്ചെന്നാണ് യുവതി മൊഴി നല്കിയത്. ഇതിന്റെ ഫോൺ രേഖകളും തെളിവായി അന്വേഷണസംഘത്തിന് യുവതി നല്കി. ഈ തെളിവടക്കം പരിഗണിച്ച് നടനെ ഉടന് അറസ്റ്റ് ചെയ്യാനാണ് അന്വേഷണസംഘത്തിന്റെ നീക്കം. ഫോൺ സംഭാഷണത്തിന്റെ കൂടുതല് തെളിവുകള് സൈബർസെല് വഴിയും ശേഖരിക്കുന്നുണ്ട്. വിനായകനില്നിന്നുണ്ടായ മോശം പപെരുമാറ്റത്തെകുറിച്ച് യുവതി ഫേസ്ബുക്കില് വെളിപ്പെടുത്തിയത് സമൂഹമാധ്യമങ്ങളില് വലിയ ചർച്ചയായിരുന്നു.
ലോക്സഭാ തെരഞ്ഞെടുപ്പിന് തൊട്ടുപിന്നാലെ ആർഎസ്എസ്സിന്റെ അജണ്ട കേരളത്തില് നടക്കില്ലെന്ന് തെളിഞ്ഞെന്നും ബിജെപി മുന്നോട്ട് വെക്കുന്ന രാഷ്ട്രീയം കേരളത്തിലെ ജനത തള്ളിക്കളഞ്ഞതില് സന്തോഷമുണ്ടെന്നുമായിരുന്നു ഒരു അഭിമുഖത്തിൽ വിനായകൻ പറഞ്ഞതിന് പിന്നാലെ രൂക്ഷമായ ജാതീയ അധിക്ഷേപമാണ് വിനായകന് നേരിട്ടത്. ഇതിന് വിനായകന് നല്കിയ മറുപടി സമൂഹമാധ്യമങ്ങളില് ചര്ച്ചയായതിന് പിന്നാലെയാണ് യുവതി തനിക്ക് വിനായകനില് നിന്ന് നേരിട്ട അനുഭവം വ്യക്തമാക്കിയത്.