കൊച്ചി: നെടുമ്പാശ്ശേരി വിമാനത്താവളത്തിൽ യാത്രക്കാരുടെ പ്രതിഷേധം. ജിദ്ദയിലേക്ക് പോകേണ്ട എയർ ഇന്ത്യ വിമാനത്തിലെ യാത്രക്കാരാണ് പ്രതിഷേധിക്കുന്നത്. ഇന്നലെ വൈകുന്നേരം 5.40ന് പുറപ്പെടേണ്ട വിമാനം ഇതുവരെയും യാത്ര തുടങ്ങാത്തതാണ് പ്രതിഷേധത്തിന് കാരണം. 

യന്ത്രത്തകരാറിനെത്തുടർന്ന് ഇന്നലെ സർവീസ് റദ്ദാക്കിയതായി എയർ ഇന്ത്യ അധികൃതർ അറിയിച്ചിരുന്നു. ജിദ്ദയിലേക്ക് പുറപ്പെട്ട വിമാനം കൊച്ചി അന്താരാഷ്ട്ര വിമാനത്താവളത്തിൽ തിരിച്ചിറക്കിയ ശേഷമാണ് വിമാനം റദ്ദാക്കിയ വിവരം എയർ ഇന്ത്യ അറിയിച്ചത്. എന്നാൽ ഇതുവരെയും ബദൽ സംവിധാനം ഏർപ്പെടുത്താത്തതാണ് പ്രതിഷേധത്തിന്റെ കാരണം. രണ്ട് മണിക്കൂറിനകം വിമാനം പുറപ്പെടും എന്നാണ് വിമാനത്താവള അധികൃതരുടെ വിശദീകരണം. 

എ.ഐ 963 കൊച്ചി-ജിദ്ദ വിമാനമാണ് ഇന്നലെ റദ്ദാക്കിയത്. വൈകിട്ട് 5.30ന് കൊച്ചിയിൽ നിന്ന് ജിദ്ദയിലേക്ക് പറന്നുയർന്ന വിമാനം അരമണിക്കൂർ മാത്രം പറന്ന് തിരിച്ചിറക്കുകയായിരുന്നു. വിമാനത്തിൽ പോകേണ്ടിയിരുന്ന 217 യാത്രക്കാരെ ഇന്നലെ വിവിധ ഹോട്ടലുകളിലേക്ക് മാറ്റിയിരുന്നു.