നിലമ്പൂർ ഉപതെരഞ്ഞെടുപ്പിൽ വിജയം നൂറ് ശതമാനവും ഇടതുപക്ഷത്തിനൊപ്പമായിരിക്കുമെന്ന് ബിനോയ് വിശ്വം
തിരുവനന്തപുരം: നിലമ്പൂർ തെരഞ്ഞെടുപ്പുമായി ബന്ധപ്പെട്ട് ചർച്ച ചെയ്യേണ്ടത് വർത്തമാന കാല രാഷ്ട്രീയമെന്ന് സിപിഐ സംസ്ഥാന ജനറൽ സെക്രട്ടറി ബിനോയ് വിശ്വം. നിലമ്പൂർ വിധിയെഴുത്തിൽ നൂറ് ശതമാനവും വിജയം ഇടതുപക്ഷത്തിനായിരിക്കും. മറുഭാഗത്ത് ഉണ്ടാകുന്ന അങ്കലാപ്പാണ് ചില വിവാദങ്ങൾക്ക് പിന്നിൽ. യുഡിഎഫ് രാഷ്ട്രീയത്തിന്റെ പാപ്പരത്വം ഇടത് മുന്നണിക്ക് മേൽ കെട്ടിവയ്ക്കുന്നു. യുഡിഎഫിന് പരാജയ ഭീതിയുടെ അങ്കലാപ്പാണ്. അത് മനസിലാകും. എൽഡിഎഫിന് ആശങ്ക ഒട്ടുമില്ല. 50 വർഷം മുൻപുള്ള കാര്യമല്ല ചർച്ച ചെയ്യേണ്ടത്. അതും പറഞ്ഞ് തർക്കിക്കാൻ താനില്ല. എന്ത് കാര്യം എപ്പോൾ പറയണമെന്ന വ്യക്തത സിപിഐക്കുണ്ടെന്നും അദ്ദേഹം പറഞ്ഞു. എംവി ഗോവിന്ദന്റെ പ്രസ്താവന അനവസരത്തിലാണോ എന്ന ചോദ്യത്തിന് 'നോ കമന്റ്സ്' എന്നായിരുന്നു ബിനോയ് വിശ്വത്തിൻ്റെ മറുപടി.
